បច្ចុប្បន្នអ្នកទស្សនាភាគច្រើននិយមចូលចិត្តនិងគាំទ្រភាពយន្តបែបឆ្លងភព ពិសេសរឿងរ៉ាវអភិនិហារ មានឈុតឆាកប្រយុទ្ធ ប្រើយុទ្ធសិល្ប៍ ក្បួនច្បាំង និងយុទ្ធសាស្ត្រផ្សេងៗ នៅក្នុងសម័យកាលចិនបុរាណ ដូច្នេះហើយផលិតកម្មធំៗបានព្យាយាមសម្រិតសម្រាំង និង រិះរកឆ្អឹងសាច់រឿងប្លែកៗដើម្បីតម្រូវទីផ្សារ និងបំពេញបំណងអ្នកទស្សនា។ ថ្ងៃនេះត្រយងសូមលើកយករឿងភាគចិនបែបអភិនិហារ ឆ្លងភពជ្រែកពេលវេលា ចំនួន៥រឿង ដែលជារឿងល្បីល្បាញនិងមានប្រជាប្រិយភាពបំផុតក្នុងចំណោមអ្នកចូលចិត្តទស្សនារឿងភាគចិន។ រឿងទាំង៥ដែលសារព័ត៌មានត្រយងនឹងបញ្ហាញជូនរួមមាន៖
១.Palace (39 ភាគ បញ្ចាំងឆ្នាំ២០១១)
˗ សម្តែងដោយ Yang Mi និង William Feng
˗ បើនិយាយដល់រឿងឆ្លងភព អ្នកចូលចិត្តតាមដានរឿងភាគចិន ប្រហែលជានឹកដល់រឿងនេះមុនគេ ព្រោះជារឿងដែលល្បីខ្លាំងកាលពីឆ្នាំ២០១១។ តួឯកស្រី Luo Qingchuan (សម្តែងដោយ Yang Mi) កូនស្រីថៅកែហាងលក់វត្ថុបុរាណជាមនុស្សម្នាក់ស្រលាញ់ប្រវត្តិសាស្ត្រចិនបុរាណ នាងបានឆ្លងភពទៅកាន់រជ្ជកាលឆេង ដោយសាររត់តាមគំនូរមួយផ្ទាំង នៅថ្ងៃភ្ជាប់ពាក្យរបស់នាង។ ដំណើរជីវិតផ្សងព្រេង ជួបជាមួយនឹងតួឯកប្រុសព្រះអង្គម្ចាស់ទី៨ (សម្តែងដោយ William Feng) និងស្នេហាប្រទាក់ក្រឡាជាមួយព្រះអង្គម្ចាស់ទី៤ និងព្រះអង្គម្ចាស់ដទៃទៀត។ ក្រោយពីឆ្លងកាត់រឿងរ៉ាវតូចធំជាច្រើន ធ្វើឱ្យ Luo Qingchuanបានយល់ពីការពិតជាច្រើន ចេះស្រឡាញ់ថែរក្សាអ្វីដែលនៅចំពោះមុខ និងយល់ច្បាស់ពីការបាត់បង់។ ទីបំផុត ធ្វើឱ្យនាងបានរកឃើញស្នេហាពិតរបស់នាង។
សូមចុចអាន៖ តិចស្ដាយក្រោយ! កុំភ្លេចមើលភាពយន្តភាគចិនល្អ ផ្ដាច់គេប្រចាំខែឧសភានេះ
២.Scarlet Heart (35 ភាគ បញ្ចាំងឆ្នាំ២០១១)
˗ សម្តែងដោយ Liu Shi Shi និង Nicky Wu
˗ រឿងនេះផ្ដើមចេញដោយសារគ្រោះថ្នាក់ចរាចរណ៍មួយ ធ្វើឱ្យតួស្រី Zhang Xiao (សម្តែងដោយ Liu Shi Shi) ឆ្លងភព ហើយក្លាយទៅជានាងច្រមក់ Maertai Ruoxi អាយុ១៦ឆ្នាំ។ ដោយសារអត្តចរិតហ៊ានស៊ីហ៊ានសង ធ្វើឱ្យនាងតូចរូបនេះមានភាពខុសប្លែកពីមនុស្សស្រីសម័យមុន ដែលមានអត្តចរិតសុភាពរម្យទម ធ្វើឱ្យព្រះមហាក្សត្រក៏លាន់មាត់ពីចរិតរបស់នាងដែរ។ ដោយសារតែព្រហ្មលិខិត នាំឱ្យក្មេងស្រីតូចច្រមក់ដែលបានធំដឹងក្តី ត្រូវចូលមកពាក់ព័ន្ធជាមួយការដណ្តើមរាជបល្ល័ងរបស់ព្រះអង្គម្ចាស់ទាំង៩អង្គ។ ក្តីស្រឡាញ់របស់នាង ចំពោះព្រះអង្គម្ចាស់ទី៤ (សម្តែងដោយ Nicky Wu) ក៏ត្រូវស្ថិតនៅរវាងអំណាច និងស្នេហា ដែលធ្វើឱ្យជីវិតរបស់នាងចុងក្រោយត្រូវជួបនឹងការឈឺចាប់ខ្លាំងមិនអាចដឹងពីខ្សែជីវិតកំសត់របស់ខ្លួន ទាំងដែលនាងពូកែខាងប្រវត្តិសាស្ត្រ និងអាចដឹងពីខ្សែជីវិតរបស់ព្រះអង្គម្ចាស់ទាំង៩អង្គនេះ។ រឿងនេះបានផលិតចំនួនពីរវគ្គនៅឆ្នាំ២០១១និងនៅឆ្នាំ២០១៤។
៣.The Romance of Tiger and Rose (២៤ភាគ, បញ្ចាំង២០២០)
˗ សម្តែងដោយ Zhao Lusi និង Ryan Ding
˗ ជារឿងឆ្លងភពល្បី និងទទួលបានការគាំទ្រច្រើន នៅក្នុងឆ្នាំ២០២០ ដែលជារឿងភាគក្នុងអ៊ីនធឺណេត ប៉ុន្តែមានគ្រប់ឈុតឆាកទាំងកំប្លែង ឆ្នាស់ឆ្នើម ផ្អែមល្អែម ឌឺដង ម្យ៉ាងទៀតរឿងនេះមានលក្ខណៈពិសេសខុសពីរឿងផ្សេងៗ ដែលមនុស្សប្រុសមិនសូវមានសិទ្ធអ្វីឡើយ។ Chen Xiaoqian (សម្តែងដោយ Zhao Lusi) គឺជាអ្នកនិពន្ធ បែរជាត្រូវភ្ញាក់ដឹងខ្លួនឡើង ដោយបានឆ្លងភពចូលទៅក្នុងសៀវភៅដែលនាងនិពន្ធ។ ប៉ុន្តែ ជីវិតនៅរឿងនាងបែរជាក្លាយទៅជាតួស្រីឆ្នាសឆ្នើម Chen Qianqian មិនមែនជាតួឯកស្រីនៅក្នុងរឿងទៅវិញ។ ដើម្បីអាចបន្តជីវិតបាន នាងត្រូវខិតខំធ្វើយ៉ាងណាឱ្យតួឯកប្រុស Han shuo (សម្តែងដោយ Ryan Ding) មានអារម្មណ៍ល្អចំពោះនាង ប៉ុន្តែធ្វើបែប គឺត្រូវដើរខុសសាច់រឿងដើមជ្រុល។ ដោយសារបានទាក់ទងជីវិតគូជាមួយតួប្រុស ធ្វើឱ្យស្រីតូចម្នាក់នេះ ដកចិត្តមិនរួច បង្កើតជាដំណើរស្នេហាមួយដែលទាក់ទាញចិត្តអ្នកទស្សនាគ្រប់ៗគ្នា។
៤.The Eternal Love វគ្គទី១ (២៤ភាគ,បញ្ចាំង២០១៧), វគ្គទី២ (៣០ភាគ,បញ្ចាំង២០១៨), វគ្គទី៣ (បញ្ចាំង២០២១)
˗ សម្តែងដោយ Xing Zhao Lin និង Jie Liang
˗ ជឿជាក់ថាប្រាកដជាមានអ្នកស្គាល់រឿងនេះច្រើនហើយ ដោយសាររឿងនេះចេញរហូតដល់វគ្គ៣ ដែលកំពុងចាក់ផ្សាយក្នុងឆ្នាំនេះ។ ព្រលឹងរបស់តួស្រី Qu Xiaotan (សម្តែងដោយ Jie Liang) បានឆ្លងភព និងត្រូវមកស្ថិតក្នុងរាងកាយរបស់ Qu Tan’er ដែលព្យាយាមសម្លាប់ខ្លួនដោយសារតែស្នេហា។ ចាប់ពីពេលនោះមក នាងមានចរិតពីរប្លែកពីគ្នា ដែលម្តងស្លូតបូតទន់ភ្លន់ ម្តងកាចឆ្នាស ហើយជានិស្ស័យបាននាំឱ្យនាងត្រូវមកជួបព្រះអង្គម្ចាស់ទី៨ Mo Liancheng។ ប៉ុន្តែ ដោយសារ Qu Tan’er ម្ចាស់ខ្លួននៅតែអាឡោះអាល័យជាមួយនឹងរាជបុត្រ នាំឱ្យក្លាយជាចំណងស្នេហ៍ប្រទាក់ក្រឡា វិញជំពាក់មុខប្រៀបដូចសរសៃអំបោះហើយបន្តដល់ការរៀបយុទ្ធវិធីដើម្បីឱ្យរាជបុត្របានស្នងរាជបល្ល័ង្កថែមទៀតផង។
៥.Love Weaves Through a Millennium (២៤ភាគ,ឆ្នាំ២០១៥)
˗ សម្តែងដោយ Jing Bo Ran និង Zheng Shuang
˗ ជារឿងឆ្លងភព ដែលបានទិញសិទ្ធិ និងយកលំនាំតាមរឿងកូរ៉េ Queen and I ដោយបានកែប្រែតាមប្រវត្តិសាស្ត្រចិនជាច្រើន។ ខុសពីរឿងបានដែលបរិយាយមុនៗ សាច់រឿងនេះ តួបុ្រស Gongming (សម្តែងដោយ Jing Bo Ran) មិនគាំទ្រ និងប្រឆាំងក្នុងការបណ្តេញម្ចាស់ក្សត្រី Xu ចុះចេញពីដំណែង ធ្វើឱ្យខ្សែរាជវង្ស និងមន្រ្តី ជាន់ខ្ពស់មួយចំនួន ដែលគាំទ្រ Zhao Feiyan ក្លាយជាម្ចាស់ក្សត្រី ដេញតាមសម្លាប់។ ដោយសារគុជទិព្វ Gongming បានឆ្លងភពមកសម័យថ្មី ជួបជាមួយតារាសម្តែងស្រី Lin Xiangxiang (សម្តែងដោយ Zheng Shuang) និងបានស្គាល់នូវភាពជឿនលឿនក្នុងសម័យនេះ និងដឹងពីប្រវត្តិសាស្ត្រ។ ប៉ុន្តែ Gongming នៅតែមិនរាថយ ហើយតាំងចិត្តត្រូវតែកែប្រែប្រវត្តិសាស្ត្រឱ្យបាន ដោយមានការសហការពី Lin Xiangxiang ដែលកំពុងព្យាយាមអភិវឌ្ឍខ្លួនទៅជាតារាស្រីជួរមុខដូចគ្នា។
បកប្រែអត្ថបទ៖ ក. លីម ជីងហួន
សម្រួលអត្ថបទ៖ លួង ភីរ៉ូនីកា
