ក្រុមបាល់ទះជាសមាជិកទាំង១១ក្រុម ក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២២ បានគណៈកម្មការរៀបចំការប្រកួត ចាប់ឆ្នោតបែងចែកពូលរួចរាល់ នៅព្រឹកថ្ងៃអង្គារ ទី១១ ខែតុលា ឆ្នាំ២០២២ នេះ នៅមជ្ឈមណ្ឌលជាតិហ្វឹកហ្វឺនកីឡា ខណៈការប្រកួតចាប់ដំណើរទៅថ្ងៃទី១៥ ខែតុលា ឆ្នាំ២០២២ តទៅ។
លទ្ធផលនៃការចាប់ឆ្នោតឃើញថា៖
ពូល A៖ រដ្ឋបាលរាជធានីភ្នំពេញ, សមាគមបាល់ទះវិសាខា, ស្នងការដ្ឋាននគរបាលខេត្តបាត់ដំបង
ពូល B៖ បញ្ជាការដ្ឋានកងអង្គរក្ស, ស្នងការដ្ឋាននគរបាលខេត្តត្បូងឃ្មុំ, សមាគមបាល់ទះខេត្តសៀមរាប
ពូល C៖ ក្លិបកងពលធំអន្តរាគមន៍លេខ៣, ក្លិបកូននាគឧត្តរ, ស្នងការដ្ឋាននគរបាលខេត្តព្រះសីហនុ
ពូល D៖ សមាគមបាល់ទះក្រសួងមហាផ្ទៃ, ស្នងការដ្ឋាននគរបាលខេត្តស្វាយរៀង
លោក តែន ឡន អគ្គលេខាធិការរងសហព័ន្ធកីឡាបាល់ទះកម្ពុជា បញ្ជាក់ថាក្រុមដែលមានឈ្មោះចូលរួមនេះមាន ៥ក្រុម (បានពីការអញ្ជើញ) និង៦ក្រុមដែលឡើងមកពីពានរង្វាន់សម្តេចក្រឡាហោម កន្លងទៅ។ ជាដំបូងនេះក្រុមដែលចូលរួមទាំង១១នេះត្រូវបែងចែកជា៤ពូល ប្រកួតវិលជុំ១ជើងសន្សំពិន្ទុ ហើយក្រុមលេខ១និងលេខ២តាមពូលនីមួយៗ មានឈ្មោះឡើងទៅប្រកួតវគ្គ៨ក្រុមចុងក្រោយ ដែលការប្រកួតវិលជុំ ហើយក្រុមដែលឈ្នះ មានឈ្មោះបន្តកៅអីឡើងទៅវគ្គពាក់កណ្ដាលផ្ដាច់ព្រ័ត្រនិងផ្ដាច់ព្រ័ត្រ។
លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានបញ្ជាក់ នេះជាសកម្មភាពប្រកួតមួយក្នុងចំណោមសកម្មភាពមួយចំនួនដែលសហព័ន្ធរៀបចំឡើងនៅឆ្នាំ២០២២ នេះ៖«ព្រឹត្តិការណ៍នេះនឹងកក្រើកក្នុងពិភពបាល់ទះ យើងបានជីកកាយពានរង្វាន់នេះឡើយវិញ ខណៈនៅទសវត្សទី៩០ធ្លាប់បានរៀបចំម្តងរួចមកហើយ។ ព្រឹត្តិការណ៍នេះក៏យើងទទួលបានការឯកភាពពីសម្តេចផងដែរ។ ខ្ញុំជឿជាក់ថានិរន្តរភាពនៃពានរង្វាន់នេះនឹងរៀបចំឡើងរៀងរាល់ឆ្នាំ ព្រោះថា បើចង់បានគុណផលសម្រាប់ជាតិបានទាល់តែមានព្រឹត្តិការណ៍នៃការប្រកួតឱ្យបានច្រើន។ ហើយព្រឹត្តិការណ៍នៃការប្រកួតនេះគឺយើងត្រូវបែងចែកជាកម្រិតនៃការប្រកួតផងដែរ។ ពានរង្វាន់កាន់តែធំ កីឡាករអាជីពមានកាន់តែច្រើន»។
តាមគម្រោងការប្រកួតដណ្តើមពានរង្វាន់សម្តេចតេជោ ហ៊ុន សែន នេះនឹងរៀបចំប្រកួតពីថ្ងៃ ១៥ ដល់ថ្ងៃទី៣០ខែតុលា ឆ្នាំ២០២២ នៅកីឡដ្ឋានព្រីនស៍ (ម្តុំហ្រ្គេនភ្នំពេញ)។ សម្រាប់ក្រុមជ័យលាភីវិញនឹងទទួលបានដូចជា៖
-ក្រុមជើងឯក៖ ពានរង្វាន់ធំ១ មេដាយមាសម្នាក់១ អមដោយថវិកា១ម៉ឺនដុល្លារ
–ជើងឯករង៖ មេដាយប្រាក់ម្នាក់១ អមដោយថវិកា៥ពាន់ដុល្លារ
–លេខ៣៖ មេដាយសំរឹទ្ធិ ម្នាក់១ អមដោយថវិកា៣ពាន់ដុល្លារ
-លេខ៤៖ ថវិកា ២ពាន់ដុល្លារ
អ្វីដែលពិសេសថែមទៀតនោះក្នុងការប្រកួតពានរង្វាន់បាល់ទះសម្តេចតេជោ ហ៊ុន សែន ឆ្នាំ២០២២ នេះ ក៏មានការប្រកួតមិត្តភាពអន្តរជាតិចំនួន២គូដែរ ដោយក្នុងនោះ៖
-១៥ តុលា ២០២២ ក្រុមបាល់ទះជម្រើសជាតិកម្ពុជា ប៉ះ សិង្ហបុរី វេលាម៉ោង៧យប់
-២០ តុលា ២០២២ ក្រុមបាល់ទះជម្រើសជាតិកម្ពុជា ប៉ះ គុយបា វេលាម៉ោង៧យប់
