សិល្បៈជាតិ៖ ឆ្នាំ២០២២នេះ ប្រទេសកម្ពុជា មានភាពមមាញឹកច្រើនលើវិស័យប្រកួតសម្រស់ព្រោះមានបេក្ខភាពតំណាងប្រទេសជាច្រើនរូបកំពុងតែត្រៀមលក្ខណៈនិងសម្រិតសម្រាំងខ្លួនដើម្បីប្រកួតប្រជែងយកមកុដជ័យលាភីកម្រិតពិភពលោក។ ក្នុងនោះបេក្ខនារីខ្លះបានបញ្ចប់បេសកកម្មរបស់ខ្លួនជាស្ថាពរហើយ ថែមទាំងទទួលបានការសាទរនិងពេញចិត្តពេញថ្លើមពីសំណាក់អ្នកគាំទ្រទាំងជាតិ និងអន្តរជាតិផងដែរ។
ថ្ងៃនេះត្រយងកម្សាន្តសូមណែនាំបេក្ខនារីបវរកញ្ញាចំនួន ១០រូប តំណាងឱ្យប្រទេសកម្ពុជានៅលើឆាកប្រកួតកម្រិតអន្តរជាតិ តើមានបេក្ខនារីរូបណាខ្លះ?
១. កម្មវិធីប្រកួត Miss Universe Cambodia 2022
បេក្ខនារីដែលនឹងតំណាងឱ្យព្រះរាជាណាចក្រកម្ពុជានៅក្នុងកម្មវិធីនេះគឺកញ្ញា ហង្ស ម៉ានីតា។ ហង្ស ម៉ានីតា គឺជាកូនកាត់ខ្មែរ-បារាំង ដែលកើតនៅលើទឹកដីខ្មែរ។ ម៉ានីតា មានអាយុ២០ឆ្នាំ ជានិស្សិតបានបញ្ចប់ថ្នាក់បរិញ្ញាប័ត្រផ្នែក គណនី និងហិរញ្ញាវត្ថុនៅសកលវិទ្យាល័យមួយនៅរាជធានីភ្នំពេញ។ យុវតីកូនកាត់រូបនេះ អាចប្រើប្រាស់ភាសាចំនួន ៤យ៉ាងស្ទាត់ជំនាញគឺ ខ្មែរ បារាំង អង់គ្លេស និងអេស្ប៉ាញ។ កាលពីឆ្នាំ២០១៦ កញ្ញាគឺជាម្ចាស់ជយលាភី បវរកញ្ញាឯកជយលាភីលេខ៣ ក្នុងកម្មវិធី Miss Tourism 2016។ បវរកញ្ញាចក្រវាឡតំណាងប្រទេសកម្ពុជា ក៏ត្រូវបានគេមើលឃើញថាមានមុខមាត់ស្រដៀងទៅនឹងបវរកញ្ញាពិភពលោកឆ្នាំ២០១៣ Megan Young ផងដែរ។
២. កម្មវិធី Miss World Cambodia 2021
កញ្ញា សារី សុវត្តី ដែលមានដើមកំណើតមកពីខេត្តក្រចេះ ក្រៅពីឈ្នះមកុដ Miss World Cambodia ហើយនោះកញ្ញាក៏ទទួលបានពានរង្វាន់ពិសេសមួយផ្សេងទៀតដែរគឺ «បេក្ខនារីស្រស់សោភាបែបខ្មែរ»។ យុវតីវ័យ២៤ឆ្នាំរូបនេះ មិនត្រឹមតែមានអាជីពជាតារាសម្ដែង ពិធីការិនីប៉ុណ្ណោះទេ កញ្ញាថែមទាំងជាគ្រូបង្រៀនមួយរូបផងដែរ។ រំដួលក្រចេះដែលមានកម្ពស់ ១.៦៣ ម៉ែត្រម្នាក់នេះ មិនត្រឹមតែមានរូបសម្រស់ស្អាត អាកប្បកិរិយាសមរម្យ សមត្ថភាពពូកែ រីឯចំណេះដឹងទៀតសោតក៏ខ្ពង់ខ្ពស់ណាស់ដែរ ព្រោះកញ្ញាធ្លាប់ជានិស្សិតអាហារូបករណ៍សិក្សាបរិញ្ញាប័ត្រអក្សរសាស្ត្រអង់គ្លេស ផ្នែកអប់រំនៅវិទ្យាស្ថានភាសាបរទេស IFL ហើយបានបញ្ចប់ការសិក្សានៅឆ្នាំ២០១៩។ កញ្ញាបានបន្តសិក្សាថ្នាក់បរិញ្ញាប័ត្រជាន់ខ្ពស់ផ្នែកអប់រំនៅសកលវិទ្យាល័យភូមិន្ទភ្នំពេញ ក្រោយទទួលបានអាហារូបករណ៍សិក្សានៅលើជំនាញនេះ។
៣. កម្មវិធី Miss International Cambodia 2022
កញ្ញា ជា ឆារ៉ានី គឺជានិស្សិត បញ្ចប់ការសិក្សាផ្នែកធនាគារ និងហិរញ្ញវត្ថុ បច្ចុប្បន្នមានអាយុ២៦ ឆ្នាំ មានកម្ពស់ ១,៦៥ គឺជាបេក្ខនារីជយលាភី Miss International Cambodia 2022 តំណាងកម្ពុជាចេញទៅប្រកួតប្រជែងកម្មវិធីបវរកញ្ញាអន្តរជាតិលើកទី៦០ នៅប្រទេសជប៉ុន នៅចុងឆ្នាំ២០២២នេះ។ តាមប្រភពពីខាងក្នុងបានឱ្យដឹងថា បេក្ខនារីតំណាងឱ្យប្រទេសកម្ពុជារូបនេះបានខិតខំប្រឹងប្រែងហ្វឹកហាត់យ៉ាងខ្លាំង ដើម្បីត្រៀមខ្លួនចេញទៅប្រកួតប្រជែងនៅលើឆាកអន្តរជាតិ ដោយមិនខ្លាចភាពនឿយហត់អ្វីទាំងអស់។
៤. កម្មវិធី Miss Earth Cambodia 2022
កញ្ញា ហង្ស សូរិយ៉ាន់ តារាបង្ហាញម៉ូដដ៏លេចធ្លោរ ដែលមានបទពិសោធយ៉ាងច្រើនជោគជាំ នៅក្នុងវិស័យប្រកួតនោះ ត្រូវបានតែងតាំងជា Miss Earth Cambodia 2022 ដើម្បីចេញទៅប្រកួតលើឆាកអន្តរជាតិ។ សូរិយ៉ាន់ ធ្លាប់ឆ្លងកាត់ការប្រកួតប្រជែងជាច្រើនដង ដូចជាក្នុងកម្មវិធី បវរកញ្ញាទេសចរណ៍ កម្មវិធី Miss Universe និងកម្មវិធី Miss Grand Cambodia។ យ៉ាងណាមិញ ដោយសារបញ្ហាសុខភាពនៅថ្ងៃទី៣១ ខែតុលា ឆ្នាំ២០២២ សូរិយ៉ាន់ បានប្រកួតថាកញ្ញាមិនបានចេញទៅប្រកួតនោះទេ។ អ្នកគាំទ្របានចូលរួមលើកទឹកចិត្តនិងជូនពរឱ្យអតីត First Runner Up of MGC 2022 និងជាម្ចាស់ពាន Popular Award រូបនេះឆាប់ជាសះស្បើយឡើងវិញផងដែរ។
៥. កម្មវិធី Miss Grand Cambodia 2022
កញ្ញា ពេជ្រ វត្តី សារ៉ាវឌ្ឍី Miss Grand Cambodia 2022 ធ្វើបានយ៉ាងល្អនៅក្នុងការបង្ហាញខ្លួនជាបេក្ខនារីបវរកញ្ញាតំណាងប្រទេសកម្ពុជាប្រកួតនៅប្រទេស ឥណ្ឌូនេស៊ី។ បេក្ខនារីរូបនេះបានធ្វើឱ្យក្រសែភ្នែកពិភពលោកផ្ដោតការចាប់អារម្មណ៍មកលើប្រទេសកម្ពុជា ដោយសារតែភាពក្លាហាន ជឿជាក់ ឆ្លាតវៃ និងជាមនុស្សប្រជាប្រិយចូលចិត្តជួយអ្នកដទៃ ទើបធ្វើឱ្យកញ្ញា ឆក់បានបេះដូងអ្នកគាំទ្រ ក៏ដូចជាបេក្ខនារីដែលប្រកួតជាមួយគ្នា។ ពេជ្រ វត្តីសារ៉ាវឌ្ឍី បង្កើតបានប្រវត្តិសាស្ត្រថ្មីនៅលើឆាកប្រកួត Miss Grand International 2022 ដោយអាចឈានចូលទៅដល់ Top10 ដោយសមត្ថភាពពិតប្រាកដរបស់ខ្លួន។
៦. កម្មវិធី Miss Supranational Cambodia 2022
កញ្ញា អ៊ិន លក្ខិណា ដែលជាអតីតបេក្ខនារីលំដាប់រងទី១ កម្មវិធី Miss Grand Cambodia 2021 និងជាម្ចាស់មកុដ Miss Supranational Cambodia 2022 បានចេញទៅប្រកួត រួចរាល់ហើយនៅប្រទេសប៉ូឡូញកាលពីខែ កក្កដា ឆ្នាំ២០២២នេះ។ យុវតីដ៏ស្រស់សោភារូបនេះថ្វីត្បិតតែមិនទទួលបានចំណាត់ថ្នាក់ក៏ពិតមែន ប៉ុន្តែនេះក៏ជាមោទកភាពមួយដែរ សម្រាប់ប្រជាជាតិកម្ពុជាដែលមានបេក្ខនារីតំណាងប្រទេសចេញទៅប្រកួតក្នុងកម្មវិធី Miss Supranational International 2022 ជាលើកដំបូង។
៧. Miss Intercontinental Cambodia 2022
កញ្ញា ស៊ីម ច័ន្ទស្រីមុំ ជាលំដាប់រងទី ១ នៃកម្មវិធី Miss World Cambodia ២០២១ ត្រូវបានតែងតាំងឱ្យតំណាងប្រទេសកម្ពុជាចូលរួមប្រកួត Miss Intercontinental ២០២២។ បវរកញ្ញារូបនេះបានចាកចេញទៅប្រកួតកាលពីថ្ងៃទី ២៧ ខែកញ្ញា ឆ្នាំ ២០២២ កន្លងទៅ។ កម្មវិធីប្រកួត Miss Intercontinental ឆ្នាំ២០២២ ប្រារព្ធឡើងនៅទីក្រុង SHARM EL SHEIK, ប្រទេសអេហ្ស៊ីប។
៨. Miss Eco International Cambodia 2023
បវរកញ្ញចក្រវាឡកម្ពុជា លំដាប់រងទី៣ កញ្ញា រតនា សុខាវត្តី គឺជាបេក្ខនារីតំណាងប្រទេសកម្ពុជាចូលរួមប្រកួតនៅក្នុងកម្មវិធីប្រកួត Miss Eco International 2023។ ស្រីស្អាតរូបនេះមិនត្រឹមតែមានតំណែងជាបវរកញ្ញាតំណាងប្រទេសប៉ុណ្ណោះទេ ថែមទាំងជាកីឡាការិនីជម្រើសជាតិការាត់តេមួយរូបផងដែរ។ និស្សិតឆ្នាំទីពីរ ជំនាញអភិវឌ្ឍន៍សេដ្ឋកិច្ច នៃសកលវិទ្យាល័យភ្នំពេញអន្តរជាតិរូបនេះ នឹងត្រូវចេញទៅប្រកួតនៅប្រទេសអេហ្ស៊ីប នាខែកុម្ភៈ ឆ្នាំ២០២៣ ខាងមុខនេះ។
៩. Miss Planet Cambodia 2020/2021
កញ្ញា ប៉ុន សុរ៉ាវត្តី ទទួល ជ័យលាភីលេខ១ ក្នុងកម្មវិធី Miss Planet Cambodia 2020។ ម្ចាស់មកុដតំណាងឱ្យប្រទេសកម្ពុជារូបនេះនឹងចេញទៅប្រកួតប្រជែងដណ្ដើមមកុដ Miss Planet International នៅប្រទេស Uganda នៅថ្ងៃទី១៥ ខែវិច្ឆិកា ឆ្នាំ២០២២ ខាងមុខនេះ។ និស្សិតផ្នែកទេសចរណ៍នៃសាកលវិទ្យាល័យជាតិគ្រប់គ្រងរូបនេះ ប្ដេជ្ញាថានឹងប្រឹងប្រែងធ្វើឱ្យបានល្អ នៅក្នុងការប្រកួតដើម្បីប្រទេសជាតិនិងប្រជាពលរដ្ឋកម្ពុជា។ គួរដឹងផងដែរថា កម្មវិធី Miss Planet International គឺជាកម្មវិធីមួយដែលបង្កើតឡើងដោយកូនខ្មែរ។
១០. Miss Queen Cambodia 2022
កញ្ញា វ៉ាន់ ប៊ី គឺជាម្ចាស់មកុដកញ្ញាឯកភេទទី៣ ឆ្នាំ២០២២ ក្រោយការប្រកួតបានបញ្ចប់ដោយជោគជ័យកាលពីរាត្រីថ្ងៃទី៣ ខែមេសា ឆ្នាំ២០២២ ក្រោមវត្តមានភ្ញៀវកិត្តិយសដ៏ច្រើនកុះករ មានទាំងអ្នកជំនួញ សិល្បករ ផលិតករ អ្នករចនាម៉ូដ និងអ្នកគាំទ្រវិស័យកញ្ញាឯក។ ម្ចាស់ជ័យលាភីដែលមានអាជីពជាតារាម៉ូដែលរូបនេះនឹងត្រូវតំណាងឱ្យប្រទេសកម្ពុជា នៅក្នុងកម្មវិធីប្រកួតលក្ខណៈអន្តរជាតិ Miss Queen International ឆ្នាំ២០២២៕