ឯកឧត្តម ស សុខា រដ្ឋលេខាធិការក្រសួងអប់រំ យុវជននិងកីឡា បានរំលឹកដល់ភាគីពាក់ព័ន្ធ ឱ្យយកចិត្តទុកដាក់ខ្ពស់ សហការគ្នាឱ្យបានជោគជ័យ ប្រកបដោយកិត្តយស ក្នុងពេលទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម ឆ្នាំ២០២៣ ដែលនៅសល់តែប៉ុន្មានខែទៀតប៉ុណ្ណោះ នឹងមកដល់ហើយ។
ការថ្លែងនេះ ក្នុងពេលដែលឯកឧត្តម ស សុខា បានតំណាងឱ្យឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ចូលរួមក្នុងកិច្ចប្រជុំពិភាក្សាការងាររៀបចំការប្រកួតកីឡាទោចក្រយាន ក្នុងព្រឹត្តិការណ៍កីឡាជាតិលើកទី៣ ឆ្នាំ២០២៣ និងព្រឹត្តិការណ៍អង្គរសង្រ្កាន្ត ឆ្នាំ២០២៣ លើការងារផ្សព្វផ្សាយស៊ីហ្គេម ភូមិបេតិកភណ្ឌនិងគុនល្បុក្កតោ ដែលធ្វើឡើងនៅថ្ងៃអង្គារ ទី១៣ ខែតុលា ឆ្នាំ២០២២ ក្នុងខេត្តសៀមរាប។ កិច្ចប្រជុំនេះក៏មានការចូលរួមពីភាគីពាក់ព័ន្ធដូចជាអគ្គនាយកដ្ឋានកីឡា សហព័ន្ធកីឡាទោចក្រយាន រដ្ឋបាលខេត្តសៀមរាប ជាដើម។
ឯកឧត្តម ស សុខា បានលើកជាមតិ និងអនុសាសន៍ សំខាន់ៗចំនួន៥ ចំណុចជុំវិញខេត្តសៀមរាប ក៏ដូចជាពេលកម្ពុជា ទាំងមូលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ២០២៣ ថា៖«១) ភាគីពាក់ព័ន្ធដែលជាអ្នកទទួលបន្ទុករៀបចំព្រឹត្តិការណ៍នេះ សូមយកចិត្តអោយបានខ្ពស់ ហើយសម្រាប់សហព័ន្ធ (ទោចក្រយាន) ជាអ្នកគ្រប់គ្រងផ្ទាល់ក្នុងការប្រកួត ចំណែកភាគីក្រសួងអប់រំយុវជននិងកីឡា និងក្រុមបច្ចេកទេស នានា ជាអ្នកសម្របសម្រួលបន្ថែម។ ទី២) ដើម្បីឱ្យមានប្រសិទ្ធភាពការងាររៀបចំបានរលូន គប្បីបែងចែកតួនាទីភារកិច្ច អោយបានច្បាស់លាស់ គ្រប់ផ្នែកពាក់ព័ន្ធ ទាំងអ្នកបច្ចេកទេស សហព័ន្ធ សន្តិសុខ ចរាចរណ៍ សណ្ដាប់ធ្នាប់ ជាដើម។ ទី៣) ក្នុងនាមជាប្រទេសម្ចាស់ យើងត្រូវរៀបចំទទួល បដិសណ្ឋារកិច្ចចំពោះប្រតិភូ អត្តពលិក ពីបណ្តាប្រទេសជាមិត្តឱ្យបានល្អ កុំអោយគេវាយតម្លៃ ថា [ក្រទ្រព្យហើយ ក្រចិត្តទៀត] តែត្រូវបញ្ជាក់ឱ្យគេឃើញថា [កម្ពុជាជា ប្រទេសតូចតែបេះដូងធំ]។ កុំអោយដូចប្រទេសមួយចំនួនដែលរៀបចំបដិសណ្ឋារកិច្ចមិនបានល្អនាពេលកន្លងមក»។
«ទី៤) ត្រូវបង្កើនការផ្សព្វផ្សាយអោយបានទូលំទូលាយ អោយប្រជាជនលោកបានដឹង ថាកម្ពុជា នឹងធ្វើជាម្ចាស់ផ្ទះស៊ីហ្គេម ជាលើកដំបូងប្រវត្តិសាស្ត្រ និងធ្វើឱ្យមានការចូលរួម ទាំងពីសំណាក់ប្រជាជន ឬ យុវជនអោយបានអស់ពីលទ្ធភាព។ ទី៥) ត្រូវយកព្រឹត្តិការណ៍កីឡាស៊ីហ្គេម ២០២៣ ជាមធ្យោបាយ មកផ្សព្វផ្សាយកម្ពុជា របស់យើងទាំងការអភិវឌ្ឍន៍ សោភ័ណភាព អនាម័យ សណ្ដាប់ធ្នាប់ របៀបរៀបរយ ធ្វើអោយគេទទួលស្គាល់ថាយើងអាចធ្វើបាន ទោះក្នុងបរិបទកូវីដ-១៩ ក្តី ឬ ក្នុងគោលគំនិតមួយស្របតាមពាក្យស្លោក [កីឡារស់ក្នុងសន្តិភាព]។ ក្នុងន័យអោយគេឃើញថាប្រទេសយើងជាប្រទេសវិជ្ជមាន មួយ ខុសពីការផ្សព្វផ្សាយពីភាពអវិជ្ជមានផ្សេងៗ ទៅលើឆាកអន្តរជាតិ»។ នេះសារបន្ថែមរបស់ឯកឧត្តម។
សូមបញ្ជាក់ថាសហព័ន្ធកីឡាអាស៊ីអាគ្នេយ៍ បានយល់ស្របតាមការកំណត់របស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ថាការប្រកួតកីឡាស៊ីហ្គេមនឹងធ្វើឡើងនៅតាមបណ្តាខេត្តមួយចំនួនក្រៅពីរាជធានីភ្នំពេញ។ ខេត្តទាំងនោះមានដូចជា ខេត្តកំពត មានការប្រកួតកីឡា ទូកប្រពៃណី ទូកកានូ និងកាយ៉ាក់ ខេត្តសៀមរាប សម្រាប់ការប្រកួតប្រណាំងកង់ ខេត្តព្រះសីហនុ រៀបចំការប្រកួតម៉ូតូទឹក និងកីឡាទូកក្ដោង ហើយខេត្តកែប ត្រូវប្រកួតកីឡា ទ្រីយ៉ាងត្លុង។ ចំណែកប្រភេទកីឡាភាគច្រើន ត្រូវប្រកួតនៅរាជធានីភ្នំពេញ ពិសេសនៅពហុកីឡដ្ឋានជាតិមរតកតេជោ និងពហុកីឡដ្ឋានជាតិ៕