កាលពីរាត្រីម្សិលមិញនេះ (៩ មិថុនា) តារាចម្រៀងប្រចាំផលិតកម្ហង្សមាសលោក ណុប បាយ៉ារិទ្ធិបានចែករំលែករឿងរីករាយមួយគឺលោកបានសម្រេចក្ដីប្រាថ្នាធ្វើជាអ្នកនិពន្ធមួយរូបដូចជាម្ដាយបង្កើតរបស់លោក។
សូមចុចអាន៖ ហ្វេនៗសរសើរ តារាសម្ដែង កុសម៉ា ភីរ៉ាផា មានទម្រង់មុខស្រដៀងនឹងតួឯកស្រីថៃ៣នាក់!
តារាចម្រៀងឈានមុខមួយរូបក្នុងផលិតកម្មហង្សមាសលោក ណុប បាយ៉ារិទ្ធិបានរៀបរាប់នៅក្នុងសំណេរមួយដែលបង្ហោះចែករំលែកជាមួយនឹងមិត្តភក្ដិនិងអ្នកគាំទ្រតាមបណ្ដាញសង្គមហ្វេសប៊ុកថា លោកធ្លាប់មានក្ដីស្រមៃចង់ធ្វើជាអ្នកនិពន្ធដូចជាម្ដាយរបស់លោកគឺ អ្នកស្រី សំកុល សុទ្ធាវី ជាអ្នកនិពន្ធប្រលោមលោកមួយរូប កាលពីជំនាន់ទសវត្សរ៍ទី៩០ និងជាអ្នកនិពន្ធភាពយន្តតាំងពីឆ្នាំ១៩៩១។
តួឯកប្រុសពីភាពយន្តល្បីល្បាញរឿង «រាជិនីភូមិគ្រឹះ» បានបន្តទៀតថាស្នាដៃលោកគឺស្ថិតក្នុង Project Album ចម្រៀង «បេះដូងមនុស្សស្រី» ដែលស្នាដៃរបស់លោកគឺជាសាច់រឿងខ្លី (Short Film) ។ ស្នាដៃរឿងខ្លីរបស់លោកនេះនឹងដឹកនាំសម្ដែងដោយលោក ខេមរៈ ដារ៉ា ជាអ្នកដឹកនាំសម្តែងនិងនិពន្ធប្រកបដោយទេពកោសល្យក្នុងផលិតកម្មហង្សមាស និង រស្មីហង្សមាស និង រួមសម្តែងដោយតារាល្បីៗដែលមានសមត្ថភាពខ្ពស់ក្នុងប្រទេសរបស់យើង។
ស្នាដៃសាច់រឿងខ្លី «បេះដូងមនុស្សស្រី» ដែលរួមសម្ដែងដោយតារាល្បីៗជាច្រើនរូបក្នុងព្រះរាជាណាចក្រកម្ពុជាដូចជាលោក ខាត់ វ៉ៃហាំង កញ្ញា ដួង ម៉ានិច និង អ្នកនាង សិទ្ធី នីកា នឹងមានផ្សាយជូនអ្នកទស្សនាតាមដានកម្សាន្តនៅថ្ងៃអាទិត្យទី១៣ ខែមិថុនា ឆ្នាំ២០២១ ខាងមុខវេលាម៉ោង១២ថ្ងៃត្រង់៕