កម្លាំងជាង១ម៉ឺននាក់នឹងត្រូវដាក់ពង្រាយដើម្បីបំពេញភារកិច្ចការពារសន្តិសុខ និងសណ្ដាប់ធ្នាប់សម្រាប់កិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំពាក់ព័ន្ធ ចាប់ពីថ្ងៃទី៨ ដល់ថ្ងៃទី១៣ខែ វិច្ឆិកា ឆ្នាំ២០២២។ នេះបើតាមឯកឧត្ដម ឧត្ដមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ។
បើតាមឯកឧត្ដម ឆាយ គឹមខឿន ថ្លែងប្រាប់ទីភ្នាក់ងារសារព័ត៌មានកម្ពុជា AKP កងកម្លាំងទាំងអស់នោះ ត្រូវបានដាក់ផែនការយ៉ាងលម្អិតលើការងារសន្តិសុខ សណ្ដាប់ធ្នាប់នៅតាមបណ្ដាគោលដៅសំខាន់ៗ មានជាអាទិ៍ គោលដៅភ្ញៀវអន្តរជាតិឆ្លងកាត់ ស្នាក់នៅ និងប្រារព្ធកម្មវិធីផ្សេងៗទៅតាមព្រឹត្តិការណ៍នៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។
«អគ្គស្នងការដ្ឋាននគរបាលជាតិ បានសហការជាមួយនគរបាលអន្តរជាតិអាំងទែប៉ូល ស្ថាប័ននគរបាលក្នុងតំបន់អាស៊ានប៉ូល ជាមួយការិយាល័យ FBI អគ្គស្នងការដ្ឋាននគរបាលប្រទេសសិង្ហបុរី សហការជាមួយជប៉ុន នគរបាលវៀតណាម នគរបាលចិន អូស្ត្រាលី និងដៃគូមួយចំនួនទៀត»។ អ្នកនាំពាក្យបានបន្ថែមយ៉ាងដូច្នេះ។
ឯកឧត្តមក៏បានឱ្យដឹងដែរថា អគ្គស្នងការដ្ឋាននគរបាលជាតិ ក៏ទទួលបានការគាំទ្រ និងសហការក្នុងការផ្លាស់ប្ដូរព័ត៌មានផ្នែកសន្តិសុខ ដើម្បីទប់ស្កាត់នូវបញ្ហាភេរវកម្ម និងផ្លាស់ប្ដូរព័ត៌មានដែលពាក់ព័ន្ធដល់កិច្ចការពារដល់កិច្ចប្រជុំកំពូលអាស៊ាន រួមទាំងការសន្យាផ្ដល់បទពិសោធន៍ ផ្ដល់ការបណ្តុះបណា្ដល ដើម្បីជួយគាំទ្រដល់កិច្ចការពារកិច្ចប្រជុំកំពូលអាស៊ាននេះ។
អគ្គស្នងការដ្ឋាននគរបាលជាតិ ទទួលបានការគាំទ្រផ្នែកមធ្យោបាយសម្ភារ មួយចំនួន ដូចជា ម៉ាស៊ីន X-Ray ក្លោងទ្វារសុវត្ថិភាព រថយន្តនាំក្បួន រថយន្តការពារគ្រាប់ រថយន្តដឹកកម្លាំង ម៉ូតូហែអម ម៉ូតូល្បាត ឧបករណ៍សម្ភារ ត្រួតពិនិត្យជាតិពុលជាតិផ្ទុះជាដើម។ សម្រាប់ជំនួយទាំងអស់នោះ គឺមានភាគី ជប៉ុន វៀតណាម និងចិន ដែលបានជួយគាំទ្រ៕