នៅពេលកម្ពុជាត្រូវទទួលប្រតិភូបរទេសមកចូលរួមកិច្ចប្រជុំកំពូលអាស៊ានលើកទី៤០ និង៤១ ចាប់ពីថ្ងៃទី១០ ដល់ថ្ងៃទី១៣ ខែវិច្ឆិកាខាងមុខនេះ រាជធានីភ្នំពេញបានស្នើសុំការចូលរួមគាំទ្រពីប្រជាពលរដ្ឋរស់នៅរាជនីភ្នំពេញដើម្បីគាំទ្រឱ្យកិច្ចប្រជុំនេះបានប្រព្រឹត្តិទៅដោយរលូន និងជោគជ័យ។ រដ្ឋបាលរាជធានីភ្នំពេញ បានសំណូមពរប្រជាពលរដ្ឋរស់នៅក្នុងរាជធានីភ្នំពេញចូលរួមអនុវត្តតាមការណែនាំ៤ចំណុច។
ទីមួយ សាលារាជធានី ស្នើពលរដ្ឋរៀបចំបោសសម្អាត ធ្វើអនាម័យបរិស្ថាន និងរបៀបរៀបរយនៅទីធ្លាមុខផ្ទះ ព្រមទាំងរៀបចំលម្អសោភ័ណភាពផ្ទះឱ្យបានស្អាត ជាពិសេសបោសសម្អាត ប្រមូល និងវេចខ្ចប់សំរាមឱ្យបានត្រឹមត្រូវកុំទុកចោលនៅមុខផ្ទះ ដោយត្រូវរង់ចាំបញ្ចេញសំរាមនៅពេលសេវាកម្មរថយន្តប្រមូល និងដឹកជញ្ជូនសំរាមមកទទួលយកសំរាមទាំងនោះតាមកម្មវិធីពេលវេលាដែលបានកំណត់។
ចំណែកទី២វិញ រដ្ឋបាលរាជធានី សុំឱ្យពលរដ្ឋរៀបចំដាក់ដងទង់ជាតិ និងចងទង់ជាតិនៅមុខផ្ទះឱ្យបានត្រឹមត្រូវមានរបៀបរៀបរយល្អ ជាពិសេសត្រូវពិនិត្យមើលក្រណាត់ទង់ជាតិដែលស្អាតល្អមិនមានរហែក ឬស្លក់ពណ៌ ដើម្បីបង្ហាញអត្តសញ្ញាណជាតិក្នុងការលើកកម្ពស់កិត្យានុភាពជាតិសក្ដិសមជាប្រជាជាតិមួយដែលមានវប្បធម៌ និងប្រពៃណីជាតិដ៏ផូរផង់ សម្រាប់ចូលរួមអបអរសាទរដែលព្រះរាជាណាចក្រកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាននេះ។
«ចំពោះបងប្អូនប្រជាពលរដ្ឋដែលជាម្ចាស់ទីតាំងដីទំនេរ និងម្ចាស់ការដ្ឋានសាងសង់សំណង់នានា ដែលស្ថិតនៅអមតាមដងផ្លូវសាធារណៈទាំងអស់សូមចូលរួមរៀបចំធ្វើរបងបិទបាំងនៅមុខទីតាំងដីទំនេរ និងរបងហ៊ុព័ទ្ធការដ្ឋានរបស់ខ្លួន ដោយកែលម្អឱ្យមានសោភ័ណភាពរបៀបរៀបរយ និងអនាម័យបរិស្ថាន ឱ្យបានល្អប្រសើរ»។ ភ្ជាប់ដោយការស្នើសុំក្នុងចំណុចទី៣នេះ សាលារាជធានី បន្តសុំឱ្យម្ចាស់ការដ្ឋានសាងសង់សំណង់នានាទាំងអស់ ត្រូវធ្វើការផ្អាកការសាងសង់ជាបណ្ដោះអាសន្ន នៅក្នុងអំឡុងពេលដែលគណៈប្រតិភូជាន់ខ្ពស់ជាតិ និងអន្តរជាតិធ្វើដំណើរឆ្លងកាត់។
ចំណុចចុងក្រោយ សាលារាជធានីបានស្នើសុំការយោគយល់អធ្យាស្រ័យ និងសូមអភ័យទោសទុកជាមុន ចំពោះប្រជាពលរដ្ឋដែលធ្វើដំណើរតាមដងផ្លូវក្នុងរាជធានីភ្នំពេញ ដោយសារតែកិច្ចប្រជុំកំពូលអាស៊ាននេះ រដ្ឋបាលរាជធានីភ្នំពេញត្រូវ រៀបចំកិច្ចសហការក្នុងការការពារសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ជូនគណ: ប្រតិភូជាតិ និងអន្តរជាតិ ដែលអាចមានការរំខាន និងកកស្ទះតាមដងផ្លូវមួយចំនួន។
កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធបានរៀបចំនៅកម្ពុជាចាប់តាំងពីខែមករា ឆ្នាំ ២០២២ ហើយបន្តរហូតដល់ខែធ្នូ ឆ្នាំ ២០២២ ដោយមានកិច្ចប្រជុំសរុបប្រមាណ ៥៤ ក្នុងនោះកិច្ចប្រជុំធំៗមាន ២ គឺកិច្ចប្រជុំកំពូលអាស៊ានលើកទី៤០ កាលពីខែមេសា ក្នុងក្របខ័ណ្ឌសមាជិកអាស៊ាន និងកិច្ចប្រជុំកំពូល អាស៊ានលើកទី៤១ រៀបចំក្នុងខែវិច្ឆិកាខាងមុខ រវាងប្រទេសសមាជិកអាស៊ានជាមួយបណ្ដាប្រទេសដៃគូ រាប់តាំងពីចិន ជប៉ុន អាមេរិក រុស្ស៊ី និងសហភាពអឺរ៉ុបជាដើម។
បើតាមអគ្គស្នងការដ្ឋាននគរបាលជាតិ មកដល់ពេលនេះមានគណៈប្រតិភូបរទេសអញ្ជើញមកចូលរួម កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធក្នុងឆ្នាំ ២០២២ នៅកម្ពុជា ប្រមាណ ២៨ គណៈប្រតិភូ ដូចជាគណៈប្រតិភូប្រទេសសមាជិកអាស៊ានដោយមិនរាប់កម្ពុជា គណៈប្រតិភូលេខាធិការដ្ឋានអាស៊ាន គណៈប្រតិភូដៃគូពិភាក្សាប្រមាណ ១០ គណៈប្រតិភូទៀត និងគណៈប្រតិភូដៃគូអភិវឌ្ឍន៍ រួមទាំងវិស័យផ្សេងៗប្រមាណ ៨ ទៀត៕