កាលពីរាត្រីម្សិលមិញនេះ (៩ មិថុនា ២០២១) Facebook អ្នកនាង យក់ ឋិតរដ្ឋាបានបង្ហោះនូវសំណេរខ្លីតែអាចធ្វើឱ្យអារម្មណ៍អ្នកគាំទ្រត្រេកអរគ្រប់ៗគ្នាព្រោះការទន្ទឹងរង់ចាំបទចម្រៀងថ្មីៗរបស់អ្នកនាងបានមកដល់ទីបញ្ចប់។
តារាចម្រៀងកូន៣ដែលទើបតែទទួលបាន Blue Verifiy ពីក្រុមហ៊ុនហ្វេសប៊ុកកាលពីថ្ងៃទី២៧ខែឧសភា បានបង្ហោះរូបថតចំនួន៦សន្លឹក ដោយក្នុងរូបថតនោះមានរូបសិល្បករសិស្សប្អូនគឺលោក សុគន្ធ ថេរ៉ាយុ និងអ្នកនិពន្ធបទភ្លេង Foung Moon ព្រមជាមួយនឹងសំណេរច្បាស់ៗថា៖ «Good Night! ចា ជិតមានចំរៀងថ្មីៗសំរាប់ការទន្ទឹងរង់ចាំរបស់បងប្អូន» ព្រមទាំង Tag ឱ្យតារាចម្រៀងរួមទ្រនំលោក សុគន្ធ ថេរ៉ាយុ និងអ្នកនិពន្ធបទភ្លេង Foung Moon ផងដែរ។
កាន់តែច្បាស់ថែមទៀតនោះ លោក សុគន្ធ ថេរ៉ាយុ ក៏បានបង្ហោះនូវសំណេរខ្លីដែលកាន់តែសបញ្ជាក់យ៉ាងច្បាស់ថាលោក និង អ្នកនាង យក់ ឋិតរដ្ឋា កំពុងថតសំឡេងបទថ្មីជាមួយគ្នាយ៉ាងពិតប្រាកដមែន។ «New song with jj soon» ដែលមានអត្ថន័យថា«បទថ្មីជាមួយនឹងបងស្រី ឆាប់ៗនេះ»។ ជាងនោះទៀតលោក Foung Moon ដែលជាអ្នកនិពន្ធក៏បាន Share ចែករំលែកបន្តនូវសំណេររបស់តារាចម្រៀងទាំងពីររូបរបស់ផលិតកម្មថោន ព្រោះទាំងសរសេរ Caption ឱ្យអ្នកគាំទ្ររង់ចាំស្ដាប់បទចម្រៀងថ្មីរបស់តារាទាំងពីរដួងផងដែរ។
ថ្វីត្បិតតែអ្នកគាំទ្រដែលនិយមចូលចិត្តស្ដាប់ការបកស្រាយចម្រៀងរបស់តារាចម្រៀង យក់ ឋិតរដ្ឋា ប៉ុន្តែគេនៅមិនទាន់បានដឹងទេថាបទចម្រៀងថ្មីរបស់តារាចម្រៀងរូបនេះជាបទញាក់ មនោសញ្ចេតនា ឬជាបទចម្រៀងប្រភេទណានៅឡើយទេ។
រំលឹកឡើងវិញតារាចម្រៀង យក់ ឋិតរដ្ឋា បានរៀបអាពាហ៍ពិពាហ៍ជាមួយនឹងអតីតតារាចម្រៀង លោក ឃុំ ប៉ុណ្ណាដែត ជាមិត្តរួមក្រុមចម្រៀង EV Band (ផលិតកម្មរស្មីស្ទឹងសង្កែ) និង បានសាងសុភមង្គលគ្រួសារមានកូនដ៏គួរឱ្យស្រលាញ់ចំនួន៣រូបជាចំណងដៃនៃសេចក្ដីស្នេហាអ្នកទាំងពីរ៕