សៀមរាប៖ កាលពីថ្ងៃចន្ទ មន្ទីរពេទ្យកុមារអង្គរ បានធ្វើយុទ្ធនាការស្វែងរកជំនួយសង្គ្រោះជីវិតកុមារពីជំងឺមហារីក និងរៃអង្គាសមូលនិធិ ដែលផ្តោតទៅលើការព្យាបាលជំងឺមហារីកដែលកើតមាននៅលើកុមារ។ យុទ្ធនាការខាងលើនេះ មន្ទីរពេទ្យរំពឹងទុកថា ប្រជាពលរដ្ឋ តារាសម្តែង តារាចម្រៀង ក្រុមហ៊ុនអាជីវកម្ម រួមទាំងសប្បុរសជនទាំងក្នុង និងក្រៅប្រទេសចូលរួមបរិច្ចាគទាំងអស់គ្នា។
នាយកមន្ទីរពេទ្យកុមារអង្គរ វេជ្ជបណ្ឌិត ងួន ច័ន្ទភក្ត្រា បានលើកឡើងថា ដើម្បីដំណើរការផ្តល់សេវាពិនិត្យ ព្យាបាល និងថែទាំជំងឺមហារីក គឺមន្ទីរពេទ្យរបស់លោកត្រូវការថវិកាចន្លោះពី ៣សែន៥ម៉ឺនដុល្លារ ដល់ ៤សែន៥ម៉ឺនដុល្លារ ក្នុងមួយឆ្នាំៗ ដើម្បីកាត់បន្ថយអត្រាកុមារកើតជំងឺមហារីក និងស្លាប់ដោយសារជំងឺនេះ។
លោកវេជ្ជបណ្ឌិតបន្តថា ប្រសិនគ្មានមូលនិធិគ្រប់គ្រាន់នោះទេ គឺការពិនិត្យ ព្យាបាល និងថែទាំជំងឺមហារីកអាចនឹងកាត់បន្ថយ ឬប្រឈមទៅនឹងការបិទទ្វារ ដែលអាចបណ្តាលឱ្យប៉ះពាល់ដល់ជីវិតកុមារកម្ពុជាជាច្រើននាក់ ដែលកំពុងតែរងគ្រោះ និងស្វែងរកសេវាពិនិត្យ និងព្យាបាល នៅមន្ទីរពេទ្យកុមារអង្គរ។
នាយកមន្ទីរពេទ្យកុមារអង្គរ បានអំពាវនាវដល់មហាជនទាំងក្នុង និងក្រៅស្រុក ឱ្យបន្តគាំទ្រដល់កម្មវិធីសង្គ្រោះកុមារពីជំងឺមហារីក និងផ្តល់ជំនួយជាប្រចាំខែ ឬប្រចាំឆ្នាំ ដល់មន្ទីរពេទ្យកុមារអង្គរ ដើម្បីឱ្យដំណើរការសេវាពិនិត្យ និងព្យាបាលកុមារពីជំងឺមហារីក បន្តទៅមុខទៀត ដើម្បីសង្រ្គោះជីវិតកុមារទាំងបច្ចុប្បន្ន និងអនាគត។
សូមបញ្ជាក់ថា មន្ទីរពេទ្យកុមារអង្គរ គឺជាស្ថាប័នក្រៅរដ្ឋាភិបាលមួយ ដែលមិនស្វែងរកប្រាក់ចំណេញស្ថិតនៅខេត្តសៀមរាប។ ចាប់តាំងពីឆ្នាំ១៩៩៩ មន្ទីរពេទ្យកុមារអង្គរ បានពិនិត្យ ព្យាបាល ថែទាំដោយឥតគិតថ្លៃដល់កុមារប្រមាណជាង ២,៥លានករណី។
មន្ទីរពេទ្យកុមារអង្គរនេះ បានបើកដំណើរការផ្នែកជំងឺមហារីក កាលពីឆ្នាំ២០១២ ដើម្បីពិនិត្យ ព្យាបាល និងថែទាំកុមារ ដែលកើតមានជំងឺមហារីក។ លុះនៅឆ្នាំ២០២១ មន្ទីរពេទ្យនេះ បានដាក់ឱ្យដំណើរការ អគារដាច់ដោយឡែកដោយផ្តោតលើការពិនិត្យ ព្យាបាល ថែទាំកុមារកើតជំងឺមហារីកមានចំនួន ៥០៨ករណី៕