តារាសម្ដែង Zhao Lusi គឺជាតារាសម្ដែងដែលមានភាពល្បីល្បាញខ្លាំងទាំងនៅក្នុងប្រទេសចិនជាប្រទេសកំណើត និងបណ្ដាប្រទេសដែលនិយមទស្សនារឿងភាគចិន ដោយក្នុងនោះរួមមានប្រទេសកម្ពុជានិងទស្សនិកជនខ្មែរផងដែរ។ យ៉ាងណាមិញអ្នកទស្សនាប្រាកដជាមិនទាន់ដឹងទេថា Zhao Lusi កំពុងតែមាន Project ថតភាពយន្តភាគថ្មីចំនួនពបីរឿង រួមជាមួយនឹងបុរសសង្ហា៣រូបគឺ Xu Kaicheng, Leo Wu Lei និង Yang Yang។
សូមចុចអាន៖ តិចស្ដាយក្រោយ! កុំភ្លេចមើលភាពយន្តភាគចិនល្អ ផ្ដាច់គេប្រចាំខែឧសភានេះ
Zhao Lusi ទើបតែឃ្លាតឆ្ងាយពីអារម្មណ៍អ្នកគាំទ្រមួយរយៈតូច តាមរយៈភាពយន្តភាគបុរាណបែបប្រវត្តិសាស្ត្រ The Long Ballad ព្រមទាំងកំពុងតែមានស្នាដៃរឿងសម័យថ្មីកំពុងតែបម្រើអារម្មណ៍អ្នកទស្សនាតាមរយៈរឿង «Mr.Ling Feel At Ease» រួមជាមួយនឹងបុរសសង្ហាមហាស្នេហ៍ Terry Liu។ រឿងនេះក៏ទទួលបានការគាំទ្រយ៉ាងច្រើនដែរពីសំណាក់អ្នកទស្សនា។ ងាកមកនិយាយពីភាពយន្តភាគថ្មីវិញ បើនិយាយថា Zhao Lusi មិនល្បី ស្នាដៃសម្ដែងមិនល្អប្រាកដជាមិនមានអ្នកណាជឿនោះទេ ព្រោះខណៈនេះកំពុងតែមាន Project ភាពយន្តធំចំនួនបី ដែលក្នុងនោះតួឯកប្រុសសុទ្ធតែខ្ពស់ស្អាត និងសង្ហាប្រៀបដូចព្រះអង្គម្ចាស់ជិះសេះសក្នុងរឿងនិទានថែមទៀតផង។
១. A Female Student Arrives at the Imperial College [Xu Kaicheng]
រឿងភាគបុរាណដែលបានតួឯកប្រុសដ៏ល្បីពីភាពយន្តភាគបុរាណរឿង «I’m A Pet Dali Temple» កាលពីឆ្នាំ២០១៨ គឺ Xu Kaicheng មករួមសម្ដែងជាមួយនឹង Zhao Lusi និយាយពីរឿងរ៉ាវរបស់តួឯកស្រីមួយរូបដែលមានបំណងប្រាថ្នាចង់នៅក្បែរតួឯកប្រុស ដើម្បីយកឈ្នះការភ្នាល់គ្នា ដូច្នេះប្រតិបត្តិការណ៍រកវិធីសាស្ត្រនៅក្បែរតួឯកប្រុសនឹងនាំអ្នកទស្សនាឱ្យ សើច រីករាយ និង ពេញទៅដោយមនោសញ្ចេតនាផ្អែមល្ហែម។
២. Who Rules The World [Yang Yang] – WeTV
រឿងភាគបុរាណទីពីររបស់ Zhao Lusi បានរួមសម្ដែងជាមួយនឹង Yang Yang បុរសសង្ហាដែលឆក់យកបេះដូងអ្នកទស្សនាយ៉ាងច្រើនពីភាពយន្តភាគសម័យ «LoveO2O» កន្លងមក។ រឿងភាគបុរាណ Who Rules The World នេះ គឺជារឿងដែលថតយកលំនាំតាមប្រលោមលោកចិនរបស់អ្នកនិពន្ធ Qing Ling Yue ។ គ្រាន់តែឈ្មោះតួសម្ដែងទាំងពីរនាក់នេះធ្វើឱ្យអ្នកទស្សនាសឹងតែត្រដរខ្យល់ព្រោះអត់ទ្រាំចាំរឿងនេះសឹងមិនបាន រហូតធ្វើឱ្យ We TV អត់អាណិតមិនបានបញ្ចេញ Trailer (ឈុតខ្លីៗ) ពីក្នុងរឿងនេះឱ្យអ្នកទស្សនាបានឃើញទម្រាំដល់រឿងថតចប់និងបញ្ចាំងជូនទស្សនា។
៣. Love Like The Galaxy [Leo Wu Lei] – WeTV
ចុងក្រោយគេគឺជារឿងថ្មីនិងចុងក្រោយបំផុតរបស់ Zhao Lusi ដែលមានចំណងជើងថា «Love Like The Galaxy» ដែលជារឿងទីមួយសម្ដែងគូជាមួយនឹង Wu Lei (Leo Wu) ក្រោយអ្នកទាំងពីរបានជួបគ្នាម្ដងរួចមកហើយ កាលពីរឿង The Long Ballad ដែលទើបតែបញ្ចាំងចប់ថ្មីៗនេះ។ គ្រាន់តែ WeTV បញ្ចេញចំណងជើងរឿង និង ឈ្មោះតួសម្ដែងប៉ុណ្ណឹង មិនទាន់ទាំងបង្ហាញឱ្យដឹងពីសាច់រឿង និងដំណើរដើមទងសាច់រឿងអ្វីសោះ អ្នកទស្សនាចេញមកទាមទារឱ្យឆាប់ថត ឆាប់បញ្ចាំង ព្រោះចង់ឃើញអ្នកទាំងពីរនេះរួមសម្ដែងជាមួយគ្នាជាតួឯកប្រុសស្រីយ៉ាងច្រើន ព្រោះ Chemistry របស់អ្នកទាំងពីរស៊ីសង្វាក់គ្នាខ្លាំងនៅក្នុងរឿង The Long Ballad ដែលអ្នកទាំងពីរបានសម្ដែងជាមួយគ្នា ប៉ុន្តែមិនបានសម្ដែងជាគូនឹងគ្នា។
