សិល្បៈអន្តរជាតិ៖ កំពូលតារាចម្រៀង Park Bom នៃក្រុមចម្រៀង 2NE1 ត្រូវបានមហាជនយករូបរាងធាត់ធំហួសខ្នាតរបស់កញ្ញាទៅនិយាយសើចចំអក រហូតធ្វើឱ្យក្រុមអ្នកគាំទ្រចេញមកប្រតិកម្មតបតនឹងបង្ហាញអារម្មណ៍ខឹងសម្បារជំនួសសាមីខ្លួនថែមទៀតផង។
ថ្មីៗនេះ Park Bom បានធ្វើឱ្យអ្នកគាំទ្រមានការព្រួយបារម្ភយ៉ាងខ្លាំងដោយឃើញទំហំរូបរាងរបស់កញ្ញប្រែប្រួលត្រលប់មកធាត់ហួសខ្នាតជាថ្មី ដោយភាគច្រើនយល់ថាតារាចម្រៀងរូបនេះអាចនឹងមានជំងឺឬបញ្ហាសុខភាពណាមួយ។ ប៉ុន្តែបើតាមប្រភពពីក្រុមអ្នកគាំទ្របានឱ្យដឹងថាតារាស្រីរូបនេះមិនមានបញ្ហាអ្វីនោះឡើយ ចំណែកឯរូបរាងរបស់កញ្ញាក្លាយជាបែបនេះព្រោះតែមិនសូវមានសកម្មភាពនិងហាត់ប្រាណប៉ុណ្ណោះ។
យ៉ាងណាមិញក្រោយឃើញរូបរាងដែលប្រែប្រួលខ្លាំងពីនារីតូចច្រឡឹង មកជានារីមានមាឌធាត់នោះ ស្រាប់តែមានមនុស្សខ្លះបានយកបញ្ហារូបរាងរបស់ Park Bom ទៅនិយាយលេងសើច ដើម្បីជាការសប្បាយទៅវិញ។
ជាក់ស្ដែងបញ្ហានេះ មិនត្រូវបានក្រុមអ្នកគាំទ្ររបស់សមាជិក 2NE1 រូបនេះនៅស្ងៀមនោះឡើយពួកគេបានចេញមកតបតតាមរយៈ Social Media ព្រមទាំងអំពាវនាវឱ្យបញ្ឈប់នូវរាល់ទង្វើ Bully ព្រោះវាប៉ះពាល់ខ្លាំងណាស់ចំពោះសតិអារម្មណ៍របស់ម្ចាស់ខ្លួន ក៏ដូចជាមជ្ឈដ្ឋានជុំវិញ។
