សិល្បៈជាតិ៖ ភាពយន្តដែលមានចំណងជើងថា «អូណូដា-មួយម៉ឺនរាត្រីនៅក្នុងព្រៃ» គឺជាខ្សែភាពយន្តពីជីវិតរបស់នាយទាហានជប៉ុនម្នាក់នៅក្នុងសង្គ្រាមលោកលើកទីពីរ ដែលថតនៅក្នុងប្រទេសកម្ពុជា ដោយក្រុមការងារខ្មែរជាង៦០នាក់ បានចាក់បញ្ចាំងហើយ ចាប់ពីថ្ងៃទី២៥ ខែតុលាកន្លងទៅ នៅគ្រប់រោងភាពយន្ត Legend Cinemas និង Major Cineplex Cambodia។
ភាពយន្តដែលដឹកនាំដោយលោក Arthur Harari នេះបានថតនៅក្នុងប្រទេសកម្ពុជាកាលពីចុងឆ្នាំ២០១៨ នៅក្នុងតំបន់មួយចំនួនក្នុងខេត្តកំពត ខេត្តកែប និងខេត្តព្រះសីហនុ ដោយរឿងនេះដែរក៏មានក្រុមការងារខ្មែរដែលមានជំនាញ និងទេពកោសល្យជាង៦០នាក់ ចូលរួមធ្វើការងារនេះជាមួយនឹងក្រុមការងារមកពីប្រទេស ជប៉ុន បារាំង ប៊ែលហ្សិក ថៃ និងហ្វីលីពីន។
សាច់រឿងរបស់ភាពយន្តនេះគឺផ្អែកទៅលើសាច់រឿងពិតរបស់ទាហានជប៉ុនម្នាក់ឈ្មោះ ហ៊ីរ៉ូ អូណូដា ក្នុងកំឡុងសង្គ្រាមលោកលើកទីពីរ។ លោកបានលាក់ខ្លួនអស់រយៈពេល៣០ឆ្នាំ នៅក្នុងព្រៃនៅលើកោះមួយរបស់ប្រទេសហ្វីលីពីន ដោយមិនបានដឹងសោះថាសង្គ្រាមលោកបានបិទបញ្ចប់នោះឡើយ។
កាលពីឆ្នាំ២០២១ កន្លងទៅ ភាពយន្ត «អូណូដា-មួយម៉ឺនរាត្រីនៅក្នុងព្រៃ» ត្រូវបានគណៈកម្មការជ្រើសរើសឱ្យចូលរួមប្រកួតប្រជែងផ្នែក Un Certain Regard ដែលជាពានរង្វាន់ធំលំដាប់ពីរក្នុងមហោស្រពភាពយន្តទីក្រុងកាន។ ពានរង្វាន់នេះគឺផ្តោតទៅផលិតកម្មតូចៗ ដើម្បីបើកឱកាសដល់អ្នកនិពន្ធវ័យក្មេងបានបញ្ចេញស្នាដៃរបស់ខ្លួន។
ខ្សែភាពយន្តដែលមានមូលដ្ឋានថតនៅប្រទេសកម្ពុជាភាគច្រើននេះមិនអាចធ្វើទៅបានឡើយបើមិនមានការគាំទ្រយ៉ាងពេញទំហឹងពីរាជរដ្ឋាភិបាលកម្ពុជា ក្រសួងវប្បធម៌និងវិចិត្រសិល្បៈ ក្រសួងការពារជាតិ ក្រសួងមហាផ្ទៃ ក្រសួងបរិស្ថាន នាយកដ្ឋានសិល្បៈភាពយន្តនិងផ្សព្វផ្សាយវប្បធម៌នៃក្រសួងវប្បធម៌និងវិចិត្រសិល្បៈ Cambodia Cinema Department មជ្ឈមណ្ឌលបណ្ដុះបណ្ដាលជំនាញ និងទទួលការថតភាពយន្តនៅកម្ពុជា Film Commission សាលាភាពយន្តនៃអង្គការដើម្បីភាពញញឹមនៃកុមារ (PSE) សហគមន៍ជនជាតិជប៉ុន និងសហគមន៍ជនជាតិហ្វីលីពីននៅប្រទេសកម្ពុជា៕
ប្រភព៖ ក្រសួងបរិស្ថាន