ពានរង្វាន់បាល់ទះសម្តេចអគ្គមហាសេនាបតីតេជោ ហ៊ុន សែន ឆ្នាំ២០២២ បានបញ្ចប់ដោយជោគជ័យ ខណៈពិធីបិទធ្វើឡើងនៅល្ងាចថ្ងៃអាទិត្យ ទី៣០ ខែតុលា ឆ្នាំ២០២២ លើទីលានកីឡដ្ឋានព្រីនស៍ ក្នុងរាជធានីភ្នំពេញ។
ឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានសហព័ន្ធកីឡាបាល់ទះកម្ពុជា ឯកឧត្តម ស សុខា អនុប្រធានសហព័ន្ធ និងមន្រ្តីរបស់សហព័ន្ធជាច្រើនរូបទៀតបានអញ្ញើញចូលរួមក្នុងពិធីបិទព្រឹត្តិការណ៍ប្រកួតបាល់ទះធំប្រចាំឆ្នាំនេះ។
ឯកឧត្តម នេត សាវឿន បានថ្លែងអំណរគុណគ្រប់ភាគីពាក់ព័ន្ធដែលរួមចំណែកសហការគ្នា ដំណើរការប្រកួតរហូតបញ្ចប់ដោយរលូននិងជោគជ័យ។ ឯកឧត្តម បានបញ្ជាក់ថាការរៀបចំពានរង្វាន់សម្តេចតេជោ នេះឡើងក្នុងគោលបំណងសំខាន់ៗដូចជា៖«១) ផែនការ ១ ក្នុងការធ្វើឱ្យកីឡាបាល់ទះកម្ពុជា កាន់តែមានគុណភាពខ្ពស់និងឈានទៅរកស្តង់ដារកម្រិតពិភពលោក ២) ពង្រឹងវិស័យបាល់ទះឱ្យកាន់តែមានប្រជាប្រិយភាព និងមានការគាំទ្រកាន់តែខ្លាំងពីសំណាក់យុវជន រួមចំណែកធ្វើឱ្យប្រជាជនកម្ពុជា មានសុខភាពល្អ ជៀសផុតពីអំពើអសកម្មនានាក្នុងសង្គម។ ៣) បង្កើនកម្រិតសមត្ថភាពឱ្យកាន់តែប្រសើរឡើង សម្រាប់ត្រៀមប្រកួតសំខាន់ៗនាពេលខាងមុខ ជាពិសេសការជ្រើសរើសកីឡាករចូលក្នុងជម្រើសជាតិ សម្រាប់ត្រៀមស៊ីហ្គេម២០២៣ ដែលកម្ពុជា ធ្វើជាម្ចាស់ផ្ទះ ៤) ពង្រឹងក្រុមជម្រើសជាតិកម្ពុជា ដើម្បីឈ្នះមេដាយមាសស៊ីហ្គេមលើកទី៣២ និងប្រកួតអន្តរជាតិនានា»។
សូមបញ្ជាក់ថាពានរង្វាន់សម្តេចតេជោ ហ៊ុន សែន ឆ្នាំ២០២២ មានក្រុមចំនួន១១ចូលរួម ដោយក្នុងនោះក្រុមចំនួន៥ក្រុម (បានពីការអញ្ជើញ) និង៦ក្រុមដែលឡើងមកពីពានរង្វាន់សម្តេចក្រឡាហោម កន្លងទៅ ដោយបែងចែកជាពូលជម្រុះតាំងពីថ្ងៃទី១៥ ខែតុលា មកម៉្លេះ លើទីលានកីឡដ្ឋានព្រីនស៍ ស្របពេលដែលជើងឯកបានទៅក្រុមបាល់ទះវិសាខា ហើយជើងឯករងបានទៅក្រុមក្រសួងមហាផ្ទៃ ចំណាត់ថ្នាក់លេខ៣ បានទៅក្រុមបញ្ជាការដ្ឋានអង្គរក្ស ក្រុមលេខ៤បានទៅក្រុមកងពលធំអន្តរាគមន៍លេខ៣៕