ព្រឹត្តិការណ៍ប្រកួតកីឡាពានរង្វាន់ «សម្តេចក្រឡាហោម ស ខេង » ឆ្នាំ២០២២ នៅខេត្តបាត់ដំបង បានដំណើរការប្រកួតហើយ ពោលគឺចាប់ពីថ្ងៃទី២៩ ខែតុលា ដល់ថ្ងៃទី២៩ ខែវិច្ឆិកា ឆ្នាំ២០២២ នៅក្រុងបាត់ដំបង ខេត្តបាត់ដំបង។
ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងឯកឧត្តម ស រដ្ឋា ប្រធានសហភាពសហព័ន្ធយុវជនកម្ពុជាខេត្តបាត់ដំបង បានអញ្ញើញក្នុងពិធីបើកព្រឹត្តិការណ៍នេះ កាលពីពេលថ្មីៗ ខណៈ ការប្រកួតកីឡាពានរង្វាន់ «សម្តេចក្រឡាហោម ស ខេង » ឆ្នាំ២០២២ កំណត់យក៣ប្រភេទវិញ្ញាសាកីឡាឱ្យចូលរួមប្រកួតប្រជែងរួមមាន៖ បាល់ទាត់ វាយសី និងប៉េតង់។
ឯកឧត្តម ស រដ្ឋា ប្រធានសហភាពសហព័ន្ធយុវជនកម្ពុជាខេត្តបាត់ដំបង បានថ្លែងអំណរគុណដល់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ឯកឧត្តម ស សុខា អនុប្រធានសហភាពសហព័ន្ធកម្ពុជា ទទួលបន្ទុក៣ខេត្ត ដែលបានអនុញ្ញាតឱ្យមានការរៀបចំព្រឹត្តិការណ៍កីឡានេះឡើង។ ជាមួយគ្នានោះដែរឯកឧត្តម ក៏បានថ្លែងអំណរគុណដល់ សាលាខេត្តបាត់ដំបង កងកម្លាំងប្រដាប់អាវុធទាំង៣ប្រភេទ មន្ទីរអប់រំយុវជននិងកីឡាខេត្ត សាកលវិទ្យាល័យជាតិបាត់ដំបង និងសប្បុរសជននានា ដែលបានរួមចំណែកធ្វើឱ្យព្រឹត្តិការណ៍កីឡាពានរង្វាន់សម្តេចក្រឡាហោម ស ខេង ឆ្នាំ២០២២ នេះដំណើរទៅដោយរលូន។
ឯកឧត្តម បានបន្តថាគោលបំណងសំខាន់ដែលជំរុញឱ្យមានព្រឹត្តិការណ៍កីឡានេះឡើង គឺដើម្បីបំផុស និងកៀរគរយុវជនគ្រប់ស្រទាប់ឱកាសស្រលាញ់វិស័យកីឡា ជ្រៀសផុតពីការសេពគ្រឿងញៀន គ្រឿងស្រវឹង និងល្បែងអបាយមុខផ្សេងៗ។
បើតាមការបញ្ជាក់របស់ឯកឧត្តមប្រធាន ការប្រកួតនេះមានក្រុមចូលរួមដូចជា៖
–វិញ្ញាសាកីឡាបាល់ទាត់បុរស មានចំនួន 32ក្រុម មានកីឡាករ សរុប ចំនួន 832 នាក់។
–វិញ្ញាសាកីឡាវាយសី មានចំនួន 53ក្រុម មានកីឡាករ សរុប ចំនួន 106 នាក់។
–វិញ្ញាសាកីឡាប៉េតង់ មានចំនួន 61ក្រុម មានកីឡាករ សរុប ចំនួន 244 នាក់។
សូមបញ្ជាក់ថា វិញ្ញាសាទាំង០៣នេះ នឹងត្រូវធ្វើការប្រកួតផ្តាច់ព្រ័ត្រ និងប្រកាសជ័យលាភីប្រគល់ ពានរង្វាន់ នៅថ្ងៃទី៣០ ខែវិច្ឆិកា ឆ្នាំ២០២២ ខាងមុខនេះ។
នេះអាចនិយាយបានថាជាសកម្មភាពមួយដែលចូលរួមចំណែកជាមួយ រាជរដ្ឋាភិបាល ក្នុងការលើកកម្ពស់វិស័យកីឡាឱ្យកាន់តែរីកចម្រើន ឆ្ពោះទៅកាន់ការរៀបចំព្រឹត្តការណ៍កីឡាស៊ីហ្គេមឆ្នាំ ២០២៣ (SEA Game 2023) ក្រោមពាក្យស្លោក «កីឡា រស់នៅក្នុងសន្តិភាព» ៕
