«ល្ងាចនេះ ខ្ញុំនឹងចោទសួរទៅប្រធានាធីបតីអ៊ុយក្រែន តើវាយ៉ាងម៉េចអារឿងបញ្ហានាំចេញធញ្ញជាតិ នាំចេញស្បៀងពីអ៊ុយក្រែន»។ សម្ដេចតេជោបានថ្លែងយ៉ាងដូច្នេះនាពិធីប្រគល់សញ្ញាបត្រជូននិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នាព្រឹកថ្ងៃទី១ ខែវិច្ឆិកា ឆ្នាំ២០២២នេះ។
កាលពីថ្ងៃសុក្រសប្តាហ៍មុន រុស្ស៊ីបានបញ្ជាក់អំពីការសម្រេចព្យួរការអនុវត្តកិច្ចសហព្រមព្រៀងនាំចេញគ្រាប់ធញ្ញជាតិរបស់អ៊ុយក្រែនចេញទៅក្រៅប្រទេស បន្ទាប់បានអនុញ្ញាតបានមួយរយៈ។ ការសម្រេចនេះ ធ្វើឡើង បន្ទាប់ពី អ៊ុយក្រែន បានបញ្ជាយានដ្រូន វាយប្រហារលើនាវារុស្ស៊ីនៅកំពង់ផែ អូដេសា។
នៅដើមសប្ដាហ៍នេះ ទោះបីជាគ្មានការយល់ព្រមពីរុស្ស៊ី ប៉ុន្តែអង្គការសហប្រជាជាតិ តួកគី និងអ៊ុយក្រែន នៅតែនាំចេញគ្រាប់ធុញ្ញជាតិអ៊ុយក្រែនតាមសមុទ្រខ្មៅ។ សកម្មភាពនេះ ត្រូវបានរុស្ស៊ីចេញការព្រមានថាអាចប្រឈមនឹងហានិភ័យ ហើយឈានដល់គ្រោះថ្នាក់ធំផង។
យោងតាមរបាយការណ៍អង្គការសហប្រជាជាតិ ស្បៀងជាប្រភេទគ្រាប់ធុញ្ញជាតិដែលដឹកចេញពីតំបន់ជម្លោះរុស្ស៊ីនិងអ៊ុយក្រែន គឺជាអាហារផ្គត់ផ្គង់ប្រទេសប្រមាណ៤៥ ក្នុងនោះមាន៣៣ប្រទេសនៅទ្វីបអាហ្វ្រិក។ កិច្ចព្រមព្រៀងសហការនាំគ្រាប់ធុញ្ញជាតិចូលជាធរមាណពីថ្ងៃទី១តុលា ដល់១៩វិច្ឆិកា ឆ្នាំ២០២២។
សូមបញ្ជាក់ថានៅល្ងាចថ្ងៃទី៣១ ខែតុលា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្រ្តីនឹងជួបសុន្ទនាតាមទូរសព្ទជាមួយឯកឧត្តមប្រធានាធិបតីអ៊ុយក្រែន។ ជំនួបនេះធ្វើឡើង១សប្ដាហ៍ មុននាយករដ្ឋមន្រ្តីកម្ពុជាដឹកនាំកិច្ចប្រជុំកំពូលអាស៊ានដែលមានការចូលរួមមេដឹកនាំរុស្ស៊ី ចិន និងអាមេរិកជាដើម៕