កីឡាករបាល់ទះឆ្នើម Yuji Nishida របស់ក្រុមជម្រើសជាតិជប៉ុន បានជាសះស្បើយពីរបួសជង្គង់ស្ដាំរបស់ខ្លួនហើយកាលពីពេលថ្មីៗ ព្រមទាំងចូលហ្វឹកហាត់ឡើងវិញផងដែរ ក្រោយចំណាយពេលព្យាបាលអស់ជាង១ខែមកនេះ។
កីឡាករវ័យ២១ឆ្នាំរូបនេះ បានរងរបួសក្នុងប្រកួតនៅរសៀលថ្ងៃអាទិត្យ ទី៩ ខែឧសភា ឆ្នាំ២០២១ កន្លងទៅ ដោយប៉ះចំកជើងស្ដាំបន្ទាប់ពីព្យាយាមលោតប៉ារ៉ាស់បាល់ ហើយរូបគេមិនអាចងើបដើរដោយខ្លួនបាននោះទេនៅកាលណោះអំឡុងពេលប្រកួតមិត្តភាពក្នុងស្រុក។ តែបច្ចុប្បន្នជប៉ុន រូបគេបានចូលរួមហ្វឹកហាត់ជាមួយសមាជិកក្រុមដែលនៅសេសសល់ក្នុងប្រទេសជប៉ុន ឡើងវិញផងដែរ។
អត្ថបទពាក់ព័ន្ធ៖តារាបាល់ទះជប៉ុន Yuji Nishida របួសជើងស្ដាំ មុនទទួលធ្វើម្ចាស់ផ្ទះអូឡាំពិក
របួសនេះបានធ្វើឱ្យ Yuji Nishida មិនអាចជួយក្រុមជម្រើសជាតិជប៉ុន ក្នុងបេសកកម្មពានរង្វាន់បាល់ទះពិភពលោក 2021 FIVB Volleyball Men’s Nations League កំពុងតែធ្វើនៅទីក្រុង Rimini ប្រទេសអ៊ីតាលី ដែលមានសុទ្ធតែក្រុមខ្លាំងៗមកពីជុំវិញពិភពលោក។
ប៉ុន្តែជារឿងវិជ្ជមានដែរ ដែលកីឡាកររូបនេះបានជាសះស្បើយមុនពេលជប៉ុន ធ្វើជាម្ចាស់ផ្ទះក្នុងព្រឹត្តិការណ៍កីឡា អូឡាំពិកក្នុងខែកក្កដា ខាងមុខ ខណៈម្ចាស់ផ្ទះជប៉ុន ស្ថិតក្នុងពូល A ជាមួយប៉ូឡូញ អ៊ីតាលី កាណាដា អ៊ីរ៉ង់ និងវេណេហ្ស៊ុយអេឡា ហើយពូល B មានប្រេស៊ីល អាមេរិក រុស្ស៊ី អាហ្សង់ទីន បារាំងនិងទុយណេស៊ី៕
