ក្រុមបាល់ទាត់ជម្រើសជាតិកម្ពុជា ត្រូវប្រកួតបិទពូល C ជាមួយក្រុមជម្រើសជាតិអ៊ីរ៉ង នៅវេលាម៉ោង៩:៣០នាទីយប់ថ្ងៃសុក្រ ទី១១ ខែមិថុនា ឆ្នាំ២០២១ នេះលើទីលានកីឡដ្ឋាន Khalifa Sports City Stadium ប្រទេសបារ៉ែន ក្នុងវគ្គជម្រុះជុំទី២ នៃពានរង្វាន់បាល់ទាត់ជើងឯកពិភពលោក 2022 FIFA World Cup និងវគ្គជម្រុះពាន AFC Asian Cup 2023 ជើងឯកទ្វីបអាស៊ី។
«សារព័ត៌មានត្រយង» បានទាញអារម្មណ៍ប្រិយមិត្តត្រឡប់ទៅកាន់កាលពីជិត៥០ឆ្នាំ ក្នុងរជ្ជកាលដល់កំពូលនៃបាល់ទាត់ខ្មែរ ដែលកាលនោះកម្ពុជា បានឈរចំណាត់ថ្នាក់លេខ៤ ក្នុងពានរង្វាន់ជើងឯកប្រចាំទ្វីបអាស៊ី 1972 AFC Asian Cup។
អត្ថបទពាក់ព័ន្ធ៖ប្រធានសហព័ន្ធ៖«ចាញ់ឬឈ្នះ តែអ្នកគាំទ្រចង់ឃើញជម្រើសជាតិលេងដោយបច្ចេកទេសនិងមោះមុត»
ក្នុងនាមជាក្រុមជើងឯករងនៅតំបន់អាស៊ីកណ្ដាល ក្រុមកម្ពុជា មានឈ្មោះឡើងទៅប្រកួតនៅជុំចុងក្រោយដែលមាន៦ក្រុម សុទ្ធតែជើងខ្លាំងៗមកពីតាមតំបន់នានានៅក្នុងអាស៊ី ដោយធ្វើឡើងនៅរាជធានីបាងកក ប្រទេសថៃ អំឡុងខែឧសភា ឆ្នាំ១៩៧២។
រូបមន្តកាលនោះត្រូវឱ្យក្រុមទាំង៦ចាប់គូគ្នា ដើម្បីប្រកួតចែកពូល។ កម្ពុជា ចាប់គូជួបអ៊ីរ៉ង់ ហើយបានបរាជ័យ ដោយលទ្ធផល២ទល់០ ក្រោមការកាត់សេចក្តីពីសំណាក់លោកអាជ្ញាកណ្ដាលជនជាតិកូរ៉េខាងត្បូង Kim Jo-Wong។
ក្រោយមកក្រុមទាំង៦ត្រូវបែងចែកពូល ដោយពូល A មានអ៊ីរ៉ង់ ថៃ និងអ៊ីរ៉ាក់ ហើយពូល B មានកូរ៉េខាងត្បូង កម្ពុជា និងគុយវ៉ែត។ ក្រុមកម្ពុជា បានចាញ់កូរ៉េខាងត្បូង ៤ទល់១ តែឈ្នះគុយវ៉ែត ៤ទល់០ វិញ។ ២ប្រកួតរកបាន៥គ្រាប់គ្រានោះ រកបានដោយកីឡាករ ឌឿ សុខុម ២គ្រាប់ម្នាក់ឯង(១ប្រកួតរកបាន១គ្រាប់), សុក ស៊ុនហៀន, ទេស សៀន និង សៀ ចេងអេង។
ក្នុងនាមជាក្រុមខ្លាំងលេខ២នៅពូល B កម្ពុជា ត្រូវប៉ះក្រុមអ៊ីរ៉ង នៅពូល A នៅវគ្គពាក់កណ្ដាលផ្ដាច់ព្រ័ត្រ។ ប្រកួតក្រោមការកាត់សេចក្តីពីលោកអាជ្ញាកណ្ដាលជនជាតិម៉ាឡេស៊ី Matolozi ក្រុមកម្ពុជា បន្តចាញ់អ៊ីរ៉ង់ ២ទល់១ ហើយគ្រាប់បាល់១គ្រាប់កាលពី៤៩ឆ្នាំមុននេះ របស់កម្ពុជា រកបានដោយកីឡាករ ឌឿ សុខុម។
អត្ថបទពាក់ព័ន្ធ៖ជម្រុះ World Cup៖ខ្មែរម្នាក់នៅប្រទេសបារ៉ែន ស្កាត់ជួយចម្អិនម្ហូបដល់ក្រុមជម្រើសជាតិកម្ពុជា
ដូច្នេះកីឡាករ ឌឿ សុខុម ជាម្ចាស់គ្រាប់បាល់ដែលកម្ពុជា ទាត់ចូលទីក្រុមអ៊ីរ៉ង់ តែម្នាក់គាត់ក្នុងប្រវត្តិសាស្ត្រពេលក្រុមទាំង២ជួបគ្នា ក្នុងចំណោមជំនួប៣លើកជាប្រវត្តិសាស្ត្រនៃប្រទេសទាំង២ តែបើបូកជំនួបចុងក្រោយកាលពីឆ្នាំ២០១៩ កម្ពុជា បន្តចាញ់អ៊ីរ៉ង់ ១៤ទល់០ នោះអ៊ីរ៉ង់ ទាត់ចូលទីកម្ពុជា បាន១៨គ្រាប់ និងកម្ពុជា ទាត់ចូលទីក្រុមអ៊ីរ៉ង់ វិញបាន១គ្រាប់ប៉ុណ្ណោះ។
សូមបញ្ជាក់ថាកម្ពុជា ជាក្រុមឈរចំណាត់ថ្នាក់លេខ៤ នៅឆ្នាំ១៩៧២ ខណៈអ៊ីរ៉ង់ វិញឈ្នះជើងឯក៣ជំនាន់ជាប់ៗគ្នា គឺនៅឆ្នាំ១៩៦៨,១៩៧២ និង១៩៧៦ ស្រប ពេលពានរង្វាន់ AFC Asian Cup ធ្វើឡើងនៅរាល់៤ឆ្នាំម្តងចាប់ពីឆ្នាំ១៩៥៦ ដល់បច្ចុប្បន្ន។
ងាកមកកាន់បច្ចុប្បន្នកាលវិញរបស់ក្រុមអ៊ីរ៉ង់ កំពុងតែឈរចំណាត់ថ្នាក់៣១ពិភពលោក ដែលដាក់ពិន្ទុដោយសហព័ន្ធកីឡាបាល់ទាត់អន្តរជាតិ FIFA ស្របពេលកម្ពុជា ឈរចំណាត់ថ្នាក់លេខ១៧៤ ពិភពលោក ក្នុងចំណោមប្រទេស២១០ ជាសមាជិក។
អត្ថបទពាក់ព័ន្ធ៖FIFA Ranking៖បែលហ្សិក លេខ១ពិភពលោក ជប៉ុន លេខ១នៅអាស៊ី កម្ពុជា លេខ១៧៤
បើក្រឡេកមកមើលសមាជិកក្រុមទាំង២វិញ កម្ពុជា មិនមានកីឡាករចេញទៅប្រកបអាជីពនៅក្រៅប្រទេសនោះទេ ស្របពេលក្រុមអ៊ីរ៉ង់ វិញមានតែកីឡាករ៩នាក់ប៉ុណ្ណោះដែលប្រកបអាជីពនៅក្នុងស្រុក ហើយក្រៅពីនោះភាគច្រើនប្រកបអាជីពនៅក្លិបល្បីៗក្នុងទ្វីបអឺរ៉ុប ដូចជាខ្សែប្រយុទ្ធ Sardar Azmoun លើកពានលីគកំពូលប្រទេសរុស្ស៊ី ជាមួយក្លិប Zenit Saint Petersburg ហើយកីឡាករ Mehdi Taremi ជាអ្នកបញ្ជូនបាល់ឱ្យមិត្តរួមក្រុមទាត់បញ្ចូលទីបានច្រើនជាងគេនៅលីគកំពូលព័រទុយហ្គាល់ ក្នុងក្លិប Porto។ ខ្សែបម្រើ Saman Ghoddos ជាផ្នែកមួយជួយឱ្យក្រុមBrentford ឡើងទៅលេងលីគកំពូលអង់គ្លេសរដូវកាលថ្មីផងដែរ។
A little friendly competition during 🇮🇷#TeamMelli last training session before their match tomorrow vs. Cambodia.
— Persian Soccer (@PersianFutbol) June 10, 2021
Who did it best? pic.twitter.com/mh49ePHQGV
ដោយឡែកសម្រាប់វគ្គជម្រុះជុំទី២ នៃពានរង្វាន់បាល់ទាត់ជើងឯកពិភពលោក 2022 FIFA World Cupពូល C នេះវិញកម្ពុជា បានអស់ឱកាសឡើងទៅជុំបន្ទាប់ហើយ និងជាប្រកួតចុងក្រោយប្រចាំពូលផងដែរ។ តែអ៊ីរ៉ង់ វិញមិនទាន់ប្រាកដកៅអីនៅឡើយនោះទេ ក្រោយជួបកម្ពុជា ក្រុមអ៊ីរ៉ង់ ត្រូវបន្តជួបក្រុមអ៊ីរ៉ាក់ ដើម្បីកាត់សេចក្តីរកជើងខ្លាំងប្រចាំពូលផងដែរ៕
