វីដេអូរាំបែបស្រើបស្រាលរោលរាលជាច្រើនឃ្លីបដែលបង្ហោះដោយគណនី Tiktok ឈ្មោះ N_A_K_B_L និងមានគណនីហ្វេសប៊ុកឈ្មោះថា ចាន់ ណាក់ កំពុងតែផ្ទុះការចាប់អារម្មណ៍យ៉ាងសម្បើមពី Followers រហូតមានគណនីមួយឈ្មោះ Happy Watch បានយកវីដេអូមួយក្នុងចំណោមវីដេអូរាំចាក់ក្បាច់របៀបស្រើបស្រាលនោះទៅបង្ហោះបន្តនៅលើហ្វេសប៊ុក។
វីដេអូខ្លីមួយដែល Happy Watch បានបង្ហោះកាលពីថ្ងៃព្រហស្បតិ៍ ទី៣ ខែវិច្ឆិកា កន្លងទៅនោះ មានរយៈពេលត្រឹមតែ ៣៨ វិនាទីប៉ុណ្ណោះ ប៉ុន្តែមានចំនួន Views រាប់ម៉ឺនដង និងមានចំនួនចែករំលែកជាង ៣៦៤៣ដង គិតត្រឹមថ្ងៃទី៦ ខែវិច្ឆិកា។ ភាគច្រើនអ្នកលេងបណ្ដាញសង្គមបានបញ្ចេញយោបល់ និងទស្សនៈយល់ឃើញផ្សេងៗគ្នាពាក់ព័ន្ធនឹងវីដេអូនេះ ប៉ុន្តែក្នុងន័យរួមគឺសម្ដែងអារម្មណ៍មិនពេញចិត្តទាល់សោះចំពោះរូបភាពរាំបែបសិចស៊ីនិងស្រើបស្រាលក្នុងវីដេអូខាងលើនេះ។
តាមដឹង វីដេអូដែលត្រូវបានអ្នកលេងបណ្ដាញសង្គមរិះគន់យ៉ាងដំណំនេះគឺដកស្រង់ចេញពីការប្រគំតន្ត្រីមួយមាននៅទីតាំង ក្រុងតាខ្មៅ ទីរួមខេត្តកណ្ដាល នេះបើតាមការរៀបរាប់ពីអ្នកបង្ហោះខាងលើ។ បើតាមការជជែកវែកញែកគ្នាពីអ្នកលេងបណ្ដាញសង្គម វីដេអូនោះគឺជាការរាំប្រកួតគ្នាបទចម្រៀងរបស់តារាចម្រៀងយូរី ដោយជ្រើសរើសយុវជន និងយុវនារីក្លាហាន ឡើងមកចាប់ដៃគូជាមួយនឹងក្រុមរាំរបស់កញ្ញា អ្នករាំប្រុសគូនឹងយុវនារី ឯអ្នករាំស្រីគូនឹងយុវជនដែលក្លាហានហ៊ានឡើងសមត្ថភាពដូចគ្នា។
កម្មវិធីតម្រូវឱ្យឡើងមករាំ ចំពោះអ្នកដែលរាំបានស្អាតនិងលេចធ្លោហើយស៊ីសង្វាក់គ្នាជាងគេនឹងទទួលបានរង្វាន់ យ៉ាងណាមិញការបង្ហាញសមត្ថភាពដើម្បីទទួលបានរង្វាន់ពីយុវជននិងយុវនារីនៅក្នុងវីដេអូនោះបានធ្វើឱ្យសាធារណជន យល់ឃើញថាជាទង្វើអនាចារ អាសអាភាស និង អសីលធម៌ ដែលជាគំរូមិនល្អទាល់តែសោះសម្រាប់យុវជនជំនាន់ក្រោយ ពិសេសប្រទេសកម្ពុជាជាប្រទេសមានអារ្យធម៌ខ្ពង់ខ្ពស់និងវប្បធម៌ដ៏ផូរផង់មួយ។
បញ្ហានេះបើបន្ទោសទៅលើយុវជន-យុវនារីដែលឡើងប្រកួតក៏មិនត្រូវប៉ុន្មាននោះដែរ ព្រោះនៅពេលឡើងទៅលើឆាកនោះ ពួកគេម្នាក់ៗមិនចាប់អារម្មណ៍អ្វីច្រើន ក្រៅពីការផ្ដោតធ្វើយ៉ាងណាឱ្យខ្លួនឈ្នះ ដើម្បីទទួលបានរង្វាន់ ប្រាកដជាមិនចាប់ភ្លឹកនឹកដល់មតិរិះគន់ដែលអាចនឹងកើតមាននោះឡើយ ប៉ុន្តែអ្នកដែលគួរទទួលខុសត្រូវនិងគួរតែចេញមុខសុំទោសគួរតែជា Organizer ឬក៏ Producer ដែលជាអ្នកគ្រប់គ្រងកម្មវិធីធំទៅវិញនោះទេ ព្រោះនៅពេលឃើញរូបភាពបែបនេះហើយ មិនត្រឹមតែមិនហាមឃាត់នោះទេ បែរជាបណ្ដែតបណ្ដោយឱ្យយុវជន-យុវតីទាំងអស់នោះបន្តរាំប្រកួតប្រជែងគ្នាយ៉ាងរងើលទៅវិញ។
ជាការពិតណាស់ការប្រគំតន្ត្រីរបស់ស្រាបៀរ គ្រុឌ ធ្វើឡើងដើម្បីបង្កើតភាពសប្បាយរីករាយជូនដល់សាធារណជនមួយផ្នែក ហើយមួយផ្នែកទៀតគឺចូលរួមជាចំណែកលើកស្ទួយនិងអភិវឌ្ឍសិល្បៈចម្រៀង និងតន្ត្រីរបស់ប្រទេសកម្ពុជា តាមរយៈការបង្កើតវេទិកាតន្ត្រីដើម្បីឱ្យសិល្បករ តារាចម្រៀងមានទីផ្សារ និងមានអាជីពការងារដែលជាប្រភពចំណូលសំខាន់សម្រាប់ទ្រទ្រង់ជីវភាព។ កន្លងទៅថ្មីៗនេះ ស្រាបៀរគ្រុឌបានចូលរួមយ៉ាងសកម្មក្នុងនាមជាអ្នកឧបត្ថម្ភកម្មវិធី ធ្វើឱ្យកើតមានកម្មវិធី Cambodian Idol ដែលទើបតែបញ្ចប់ទៅថ្មីៗនេះដែរ ហេតុការណ៍ខាងលើនេះ តើអាចជាការបង្កើតព័ត៌មានចចាមអារ៉ាមលាបពណ៌បែបញ៉ុះញង់កេងចំណេញប្រយោជន៍ ដើម្បីបង្កាច់បង្ខូចកេរ្តិ៍ឈ្មោះកិត្តិយសរបស់ក្រុមហ៊ុននេះទេ?
ខណៈនេះភាគីពាក់ព័ន្ធដូចជាក្រសួងវប្បធម៌និងវិចិត្រសិល្បៈ មិនទាន់ដាក់បន្ទុកទៅលើក្រុមហ៊ុនវឌ្ឍនៈចំពោះការរៀបចំការប្រគំតន្ត្រី មានការរាំរែកដែលធ្វើឱ្យប៉ះពាល់ដល់វប្បធម៌នៅឡើយទេ ដោយទុកឱ្យជំនាញសិក្សាទៅតាមបច្ចេកទេស ថាតើការសម្ដែងនេះគឺជាការសម្ដែងនៅជ្រុងណាមួយហើយយកមកភ្ជាប់ជាមួយនឹងការប្រគំតន្ត្រីឬក៏យ៉ាងណា? សរុបសេចក្ដីមកគឺក្រសួងចង់រកឱ្យឃើញការពិតជៀសវាងចោទប្រកាន់ឬដាក់បន្ទុកខុស។
ដោយឡែកក្រុមហ៊ុនវឌ្ឍនៈក៏កំពុងតែដាក់ពាក្យបណ្ដឹង ដើម្បីឱ្យខាងសមត្ថកិច្ចពាក់ព័ន្ធយកមនុស្សដែលប្រព្រឹត្តិមកសួរនាំ ដើម្បីរកឱ្យឃើញការពិត ថាសកម្មភាពនេះពិតជានៅក្នុងការប្រគំតន្ត្រីរបស់ក្រុមហ៊ុនវឌ្ឍនៈឬក៏ជាសកម្មភាពរបស់ក្រុមណាមួយបង្កើតឡើងហើយយករូបភាពខនសឺតរបស់ក្រុមហ៊ុនទៅផ្សារភ្ជាប់។
ទស្សនាវីដេអូដែលរងការរិះគន់ខាងក្រោមនេះ៖