សិល្បៈជាតិ៖ ខណៈដែលមានការជជែកវែកញែកគ្នាច្រើនលើការលួចបទភ្លេង ការទិញភ្លេង ការប្រើប្រាស់ Loop ជាដើម រហូតដល់រឿងនេះ បានក្លាយជាប្រធានបទក្ដៅ ស្រាប់តែថ្មីៗនេះតារាចម្រៀង Rap ប្រុសឡាក៏ ចេញមកបង្ហាញការយល់ឃើញខ្លីគួរឱ្យសរសើរ ដែលជាគតិដាស់តឿនស្មារតីពាក់ព័ន្ធនឹងការបង្កើតស្នាដៃ។
ខណៈដែល Top Rapper ពីរដួងរបស់កម្ពុជាកំពុងតែមានសង្គ្រាម Diss Track កក្រើកប្រទស ប៉ុន្តែតារាចម្រៀងរូបសង្ហា Bross La ក៏មិនបានបង្ហាញគោលជំហថាខ្លួនគាំទ្រ ឬស្ថិតនៅក្នុងបក្សណាមួយនោះទេ។ កាលពីថ្ងៃទី៣១ ខែតុលា ឆ្នាំ២០២២ ប្រុសឡា ធ្លាប់បានចេញសំណេរបញ្ជាក់ច្បាស់ៗថាខ្លួនមិននៅក្នុងសង្គ្រាម Diss Track នោះឡើយ៖ «សូមបញ្ជាក់ No Diss Track from me. It’s not my កម្មវិធី ហើយក៏អត់មានបទចម្រៀងចេញពី CG ក្នុងអំឡុងពេលសប្តាហ៍នេះដែរ សូមអរគុណ #CGmovement»
ប៉ុន្តែប្រុសឡា (Bross La) បានបង្ហាញទស្សនៈផ្ទាល់ខ្លួនចែករំលែកជាមួយនឹងក្រុមអ្នកគាំទ្ររបស់លោកតាមរយៈបណ្ដាញសង្គមហ្វេសប៊ុកថា៖ «យើងរស់នៅក្នុងសង្គមមួយដែលពោរពេញទៅដោយការប្រកួតប្រជែង យើងគេចមិនផុតពីការវាយតម្លៃនិងការប្រៀបធៀបនោះទេ ការបង្កើតស្នាដៃក៏មិនទាមទារទាល់តែឈ្នះអ្នកដទៃនោះដែរ តែត្រូវឈ្នះអតីតខ្លួនឯង មានការអភិវឌ្ឍខ្លួនទាំងចំណេះនិងជំនាញ បង្កើតស្នាដៃអោយគេចងចាំថា បុគ្គលមួយនេះ បានបង្កើតរបស់នេះ ធ្វើរឿងមួយនេះ ម្ចាស់បទមួយនេះ #CGmovement»
ការលើកឡើងរបស់លោកថ្វីត្បិតតែខ្លីពិតមែន ប៉ុន្តែទទួលបានការសរសើរពីអ្នកគាំទ្រនិងសាធារណជនចំពោះការយល់ឃើញបែបសន្តិភាពរបស់លោក។ គេសង្កេតឃើញថាអ្វីដែលប្រុសឡា និយាយនេះគឺជាពិតត្រឹមត្រូវខ្លាំងណាស់ យើងមិនគួរឱ្យពេលវេលាទៅប្រៀបធៀបជាមួយនឹងអ្នកដទៃ ចង់ចាញ់ ចង់ឈ្នះ បង្កើតទៅភាពច្រណែន ខឹង និង ស្អប់ ប៉ុន្តែយកពេលវេលាមកអភិវឌ្ឍខ្លួន កែប្រែចំណុចខ្វះខាតរបស់ខ្លួនឯងគឺជារឿងដែលប្រពៃបំផុត។
នៅក្នុងប្រយោគដែលប្រុសឡា បានលើកយកមកនិយាយនោះគេអាចនិយាយបានថាតារាចម្រៀងរូបនេះ កំពុងតែប្រដៅចំពោះអ្នកដែលប្រើប្រាស់ស្នាដៃកូពី មិនមែន Original ឱ្យមានការគិតគូរឡើងវិញ ជាពិសេសប្រឹងប្រែងធ្វើអ្វី ឬបង្កើតអ្វីដែលជារបស់ខ្លួនឯង ដើម្បីឱ្យអ្នកផងគេចងចាំស្នាដៃ ថាអ្នកណាគឺជាអ្នកចម្រៀង ឬជាម្ចាស់បទគឺជារឿងល្អប្រសើរបំផុត។