បវកញ្ញាទេសចរណ៍ ឆន ស្រីណេត បានចាកចេញពីប្រទេសកម្ពុជា ហោះទៅកាន់ប្រទេសម៉ាឡេស៊ី ដើម្បីតំណាងឱ្យប្រទេសកម្ពុជាប្រកួតនៅលើវេទិការអន្តរជាតិ Miss Tourism International 2022 ។
នៅព្រឹកថ្ងៃទី ១០ ខែ វិច្ឆិកា ឆ្នាំ ២០២២នេះ កញ្ញា ឆន ស្រីណេត បានបង្ហាញរូបភាពជាច្រើនសន្លឹកដែលស្ដែងឱ្យឃើញថា កញ្ញាត្រៀមខ្លួនធ្វើដំណើរទៅកាន់ប្រទេសម៉ាឡេស៊ី ក្នុងការចូលរួមដណ្ដើមមកុដពីកម្មវិធី Miss Tourism International 2022 ដែលប្រព្រឹត្តិឡើងនៅថ្ងៃទី ១១ ដល់ថ្ងៃទី ២៧ ខែ វិច្ឆិកា ឆ្នាំ ២០២២នេះ។
កញ្ញា ឆន ស្រីណេត ធ្លាប់បានប្រាប់អ្នកសារព័ត៌មានត្រយងថា កញ្ញាបានត្រៀមខ្លួនរួចជាស្រេចក្នុងការចូលរួមប្រកួត ដោយកញ្ញាអះអាងថានឹងបង្ហាញ ផ្សព្វផ្សាយ ពីសិល្បៈវប្បធម៌ខ្មែរ ជាពិសេសតំបន់ទេសចរណ៍ក្នុងប្រទេសកម្ពុជា។ ស្រីណេតថា ខ្លួនបានត្រៀមបង្ហាញណែនាំឱ្យអ្នកគាំទ្រកម្មវិធីទូទាំងពិភពលោកបានស្គាល់ពីរមណីដ្ឋានភ្នំព្រះរាជទ្រព្យ ឬភ្នំឧត្តុង្គ ដែលជាទីតាំងប្រវត្តិសាស្ត្ររបស់ប្រទេសកម្ពុជា។
យ៉ាងណាមិញ ស្រីណេត ធ្លាប់ប្រាប់ដែរថា ដោយសារពីមុនកញ្ញាធ្លាប់កើតជំងឺមហារីក និង ឆ្លងកាត់ជីវិតពឹងផ្អែកលើរទេះរុញរហូតដល់ថ្នាក់ធ្លាប់គិតបញ្ចប់ជីវិតរបស់ខ្លួន ប៉ុន្តែទោះបីបាក់ទឹកចិត្តខ្លាំងប៉ុណ្ណាក៏ដោយ ក៏កញ្ញាមិនបោះបង់ខ្លួនឯងចោលឡើយ មានតែប្រឹងតស៊ូរហូតអាចក្រោកឈរជាថ្មីម្ដងទៀត។ ហើយកញ្ញាថានឹងនាំសារនេះទៅប្រាប់អ្នកគាំទ្រទាំងអស់នៅពេលបង្ហាញខ្លួននៅលើវេទិការប្រកួត។
ជាមួយគ្នានេះដែរ ការប្រកួត Miss Tourism International 2022 ស្រីណេត បានត្រៀមឈុតក្បាច់គុនល្បុក្កតោ និងឈុតអប្សរា ដើម្បីបង្ហាញនៅលើវេទិការ។ ការចេញទៅប្រទេសម៉ាឡេស៊ី គឺកញ្ញាទៅតែម្នាក់ឯង មិនថា ការស្លៀកពាក់ ផាត់មុខ ធ្វើសក់ រៀបចំខ្លួនគឺកញ្ញាពឹងលើខ្លួនឯងទាំងស្រុង។ កញ្ញារំពឹងថា កញ្ញានឹងនាំភាពជោគជ័យមកប្រទេសកម្ពុជាវិញឱ្យទាល់តែបាន ហើយកញ្ញាអំពាវនាវឱ្យបងប្អូនខ្មែរយើងជួយគាំទ្រកញ្ញាផងដែរ៕
