កាលពីថ្ងៃទី៩ វិច្ឆិកា អតីតតារាចម្រៀង Rock ម៉ូលីកា ដែលក្លាយជាមេតុងទីនធំមួយនោះត្រូវបានក្រុមជនអានាមិកផ្ញើសារ ជាអក្សរ ជាសំឡេង និង រូបភាពកាំភ្លើងខ្លីកាំភ្លើងអាកា គំរាមមកលើអ្នកនាង ដោយខ្លះបាននិយាយបង្ខូចកេរ្ដិ៍ឈ្មោះ និងខ្លះទៀតបង្ខំឲ្យនាងប្រគល់លុយជាថ្នូរពួកគេមិនធ្វើឲ្យនាងជួបគ្រោះថ្នាក់។
ក្រោយកើតករណីដ៏រសើបនេះ អ្នកម៉ូលីកា បានចេញមកប្រតិកម្មតបតភ្លាមៗតាមរយៈវីដេអូ Live ថា «អ្នកនាងមិនខ្លាចការគម្រាមទាំងនោះទេ ហើយកំពុងតែ ចង់វែក មុខថាអ្នកណាជាអ្នកនៅពីក្រោយខ្នងរឿងនេះ។ នៅពេលវែកមុខឃើញអ្នកនាង នឹងចាត់ការតាមផ្លូវច្បាប់តែម្ដង ពោល គឺ មិនឲ្យជនបាតសង្គមទាំងនោះរួចខ្លួនជាដាច់ខាត។»
សារដែលជនអនាមិកផ្ញើមកគំរាមម៉ូលីកានោះ ប្រើប្រាស់គណនីហ្វេសប៊ុកឈ្មោះ Kim Sophary ដោយក្នុងនោះមានប្រើពាក្យពេចន៍ថាដូច្នេះ៖ «មេតុងទីន ជំពាក់លុយតុងទីនរាប់លានដុល្លារ ហើយសុំមិនឲ្យគេផុស គ្នាខ្លាចអត់បានលុយចេះតែចាញ់បោកវា តែខ្ញុំអត់ ព្រមទេ វាយកលុយគេទិញឡានហ៊ឺហា ដេញតុងទីន មិនដែលបានលុយគ្រប់ម៉េច ឲ្យគេរំលស់ កូនស្គាល់វា បើមិនជំពាក់គេវ័នក បើមិនចឹងវាជំពាក់កូនរាប់រយនាក់ រាល់ថ្ងៃ ហើយវានឹងប្រមូលលុយអ្នកថ្មីសងអ្នកចាស់ ចឹងមានន័យថាចង់បោកអ្នកថ្មីសងចាស់ដែលវាបោកមែន វីដេអូមានទៀតចាំផុស ឲ្យអស់ព្រោះ អាណិត អ្នក ក្រោយគ្នាមិនដឹងអី ខ្ញុំអ្នកមុនអត់បានលុយ ហើយខ្ញុំយល់អារម្មណ៍។»
យ៉ាណាមិញអ្នកនាងម៉ូលីកា បានតបចំពោះជនដែលចោទប្រកាន់ខ្លួនយ៉ាងខ្លីថា៖ «ចង់និយាយថាធ្វើចឹង បានអីមកវិញ? ផុសនិងចង់បានអីឱ្យប្រាកដ? ម៉េចមិនយកអាខោនពិតមកផុសមកបើខ្លាំង?»
គណនីក្លែងក្លាយអស់ទាំងនោះក្រៅពីផ្ញើសារ មកគម្រាមឱ្យអ្នកនាង ត្រៀមខ្លួនហើយនោះ មានគណនីខ្លះទៀតផ្ញើជាសំឡេង ផ្ញើជារូបភាពកាំភ្លើងខ្លី និងវែង ឱ្យអ្នកនាងផ្ញើលុយឱ្យពួកគេបើចង់សុខខ្លួន មិនដូច្នោះទេគេនឹងសម្លាប់អ្នកនាងចោល…។ល។
ត្រលប់មកវិញ អ្នកនាង ម៉ូលីកា បាននិយាយនៅក្នុងការ Live Video បកស្រាយកាលពីរសៀលថ្ងៃពុធ ម្សិលមិញនេះថា អ្នកនាងអត់មានស្គាល់តាមបំផ្លាញកិត្តិយសអ្នកនាងទេ ហើយអ្នកទាំងនោះក៏មិនមែនជាកូនតុងទីនអ្នកនាងដែរ។ អ្នកនាងបានបញ្ជាក់ដដែលៗថា បើថាអ្នកនាងបោកលុយតើអ្នកនាងបោកប៉ុន្មាន? អ្នកនាងបានឱ្យដឹងទៀតថាក្រុមដែលប្រើគណនីប្លែកៗនោះគំរាមឱ្យអ្នកនាងប្រគល់ លុយ បើមិនចង់ឱ្យគេបាញ់សម្លាប់ចោល។
ទោះជារងការគម្រាមកំហែងដល់អាយុជីវិតក្ដី ម៉ូលីកា បាន ព្រមាន វិញថាអ្នកណាដែលចង់បង្ខូចកេរ្តិ៍ឈ្មោះរបស់នាងគឺនាងមិនឲ្យពួកគេរួចខ្លួនជាដាច់ខាត ព្រោះអ្វីៗនឹងត្រូវធ្វើ ទៅតាមផ្លូវច្បាប់ទាំងអស់ ខណៈដែលពេលនេះនាងបានដឹងតម្រុយខ្លះៗ ថាអ្នកណានៅក្រោយខ្នងជនទុច្ចរិត ទាំងនោះហើយ ប៉ុន្ដែនាងមិនទាន់បង្ហើបថាជាសាធារណៈទេ ព្រោះស្ថិតក្នុងតំណាក់កាលស៊ើបអង្កេត ពីក្រុមការងាររបស់នាង។
អ្នកនាង ម៉ូលីកា បានឱ្យដឹងថាក្រោយមានជនមួយក្ដាប់តូចមកចោទប្រកាន់អ្នកនាងដោយគ្មានមូលដ្ឋាន ច្បាស់លាស់ បែបនេះ មិនបានប៉ះពាល់ដល់សេចក្ដីទុកចិត្តរបស់កូនតុងទីនអ្នកនាងឡើយ ព្រោះពួកគេនៅតែមានជំនឿមកលើនាងដូចដើមដដែល។
គួរបញ្ជាក់ថាម៉ូលីកា ជាម្ចាស់ក្រុមហ៊ុនអិនខេ ម៉ូលីកា ប៊ីយូធី ត្រេឌីង ឯ.ក(Nk Molika Beauty Trending Co.Ltd) បានចុះហត្ថលេខាសហការណ៍ជាមួយ ក្រុមហ៊ុនមេធាវី អេជ អេន អេស (HSN law Group) កាលពីថ្ងៃសុក្រ ទី២២ ខែកក្កដា ឆ្នាំ២០២២ រយៈពេល១ឆ្នាំ ដោយផោ្ដតលើសេវាកម្មការពារផ្លូវច្បាប់ប្រកបដោយប្រសិទ្ធិភាព និងជួយ សម្រួល ដល់តំណើរការប្រតិបត្តិការរបស់ក្រុមហ៊ុន ក៏ដូចជាបង្កើននូវជំនឿចិត្តដល់អតិថិជនរបស់ក្រុមហ៊ុន ដើម្បីឲ្យក្រុមហ៊ុនកាន់តែមានភាពរីកចម្រើនទៅមុខជាលំដាប់ ហេតុនេះរាល់ពេលមានបញ្ហាវិវាទឬជនណាចង់ ធ្វើឲ្យ ប៉ះពាល់ដល់ក្រុមហ៊ុននាងនោះរឿងរ៉ាវទាំងនោះត្រូវធ្វើទៅតាមផ្លូវច្បាប់ទាំងអស់។ ដូច្នេះករណីមានក្រុមជន ផ្ញើសារគម្រាមកំហែងអាយុជីវិតនាងបែបនេះ ក្រុមនោះមិនអាច គេចផុត ពីសំណាញ់ច្បាប់បានឡើយ ហើយនាងនឹងវែកមុខលាតត្រដាងពួកគេនាពេលខាងមុខនេះហើយ៕