ខ្សែបម្រើ ច្រឹង ពលរដ្ឋ បានបន្តបង្កើតកំណត់ត្រាថ្មីមួយទៀត បន្ទាប់ពីជួយក្រុមបាល់ទាត់វិសាខា ឈ្នះពានរង្វាន់បាល់ទាត់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២២ (Hun Sen Cup) ថ្មីៗនេះ ពោលគឺរូបគេបានក្លាយជាកីឡាករដែលឈ្នះពានរង្វាន់នេះច្រើនលើកជាងកីឡាករផ្សេងៗទាំងអស់។
សមាជិកក្រុមជម្រើសជាតិកម្ពុជា រូបនេះធ្លាប់ឈ្នះម្នាក់ឯងរហូតដល់ទៅ៦លើកឯណោះ គឺ៖
លើកទី១៖ ឆ្នាំ២០១១ ជាមួយព្រះខ័នរាជស្វាយរៀង
លើកទី២៖ ឆ្នាំ២០១២ ជាមួយព្រះខ័នរាជស្វាយរៀង
លើកទី៣៖ ឆ្នាំ២០១៦ ជាមួយ Tiffy Army FC (ក្រសួងការពារជាតិ)
លើកទី៤៖ ឆ្នាំ២០២០ ជាមួយវិសាខា
លើកទី៥៖ ឆ្នាំ២០២១ ជាមួយវិសាខា
លើកទី៦៖ ឆ្នាំ២០២២ ជាមួយវិសាខា
អត្ថបទពាក់ព័ន្ធ៖Hun Sen Cup៖វិសាខា ឈ្នះពានទាំង៣ឆ្នាំ ជាមួយកំណត់ត្រាមិនចាញ់ទាល់តែសោះទាំង៣ឆ្នាំ
សូមបញ្ជាក់ថា ចឹ្រង ពលរដ្ឋ ជាកីឡាករម្នាក់ក្នុងចំណោម២នាក់ ដែលក្លិបបាល់ទាត់នៅលីគកំពូលថៃ ចុះកុងត្រាត្រៀមជួយក្រុមក្នុងកូតារ កីឡាករអាស៊ាន គឺនៅអំឡុងឆ្នាំ២០១៩ ប៉ុន្តែរូបគេត្រូវខកខានវិញ ដោយសារតែបញ្ហារបួស។ បើនិយាយពីក្រុមជម្រើសជាតិវិញ គេធ្លាប់ចូលរួមតាំងពីឈុតយុវជនរហូតដល់ឈុតធំ បើរាប់ត្រួសៗគិតពីឆ្នាំ២០១១មក។
រូបគេត្រូវបានក្លិបបាល់ទាត់ព្រះខ័នរាជស្វាយរៀង តំឡើងពីឈុតយុវជនចូលក្រុមធំនៅឆ្នាំ២០១០ ហើយនៅឆ្នាំ២០១៣ បានចេញទៅចូលរួមក្រុមត្រាយអាស៊ី (អង្គរថាយហ្គឺរ បច្ចុប្បន្ន) ខណៈពីឆ្នាំ២០១៥ដល់២០១៩ ជាសមាជិកក្រុម Tiffy Army FC និងពីឆ្នាំ២០២០ ដល់បច្ចុប្បន្ន បានចូលរួមក្រុមវិសាខា៕
អត្ថបទពាក់ព័ន្ធ៖Hun Sen Cup៖ក្រៅពីឈ្នះពានប្រចាំឆ្នាំ ក្រុមវិសាខា ជាក្រុមទាត់ចូលទីគូប្រកួតច្រើនគ្រាប់ជាងគេ
