លោកជំទាវ Jacinda Ardern នាយករដ្ឋមន្ត្រី នៃប្រទេសនូវែលហ្សេឡង់ បានអញ្ជើញដឹកនាំគណៈប្រតិភូធ្វើដំណើរមកដល់អាកាសយានដ្ឋានអន្តរជាតិភ្នំពេញហើយ នារសៀលថ្ងៃទី១២ ខែវិច្ឆិកា ឆ្នាំ២០២២នេះ។ ដូចបណ្ដាឥស្សរជនបរទេសដៃគូអាស៊ានផ្សេងទៀតដែរ វត្តមានលោកជំទាវនាយកដ្ឋមន្រ្តីនាពេលនេះ គឺដើម្បីចូលរួមកិច្ចប្រជុំកំពូលអាស៊ីបូព៌ា លើកទី១៧ និងកិច្ចប្រជុំកំពូលពាក់ព័ន្ធនៅកម្ពុជា។
លោកជំទាវ អ៊ឹង កន្ថាផាវី រដ្ឋមន្រ្តីក្រសួងកិច្ចការនារី គឺជាឥស្សរជនតំណាងរាជរដ្ឋាភិបាលកម្ពុជា ដែលបានទៅទទួលបដិសណ្ឋារកិច្ចលោកជំទាវ Jacinda Ardern នៅអាកាសយានដ្ឋានអន្តរជាតិ។ លោកជំទាវ Jacinda Ardern នាយរដ្ឋមន្រ្តីនៃប្រទេសនូវែលហ្សេឡង់ គឺជាមេដឹកនាំស្រ្តីមួយរូប ដែលត្រូវបានគេចាប់អារម្មណ៍ជុំវិញពិភពលោក ក៏ព្រោះតែលោកជំទាវ ធ្លាប់បានបីកូនតូចចូលរួមក្នុងមហាសន្និបាតអង្គការសហប្រជាតិ និងកិច្ចប្រជុំនានា។
សូរម្លឹកថា ក្រោយពេលថ្លែងសុន្ទរកថាក្នុងមហាសន្និបាតអង្គការសហប្រជាជាតិ កាលពីខែកញ្ញា ឆ្នាំ២០២២ លោកជំទាវនាយករដ្ឋមន្ត្រីនូវែលហ្សេឡង់ ក៏ធ្លាប់បានឆ្លៀតជជែកគ្នារយៈពេលខ្លីលើបញ្ហាមួយចំនួនជាមួយសម្តេចតេជោ ហ៊ុន សែននាយករដ្ឋមន្ត្រីកម្ពុជាដែរ។ លោកជំទាវ កាលនោះ បានជម្រាបសម្តេចតេជោថានឹងអញ្ជើញមកចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនៅកម្ពុជា៕
