លោក អ៊ុត សុវណ្ណា អតីតជាអ្នកប្រដាល់នៅចន្លោះពាក់កណ្តាលទសវត្សទី៩០ ជាអ្នកនៅពីក្រោយខ្នងជំរុញកូន រហូតមានម្នាក់ អាចដណ្តើមបានមេដាយមាស១គ្រឿង និងម្នាក់ទៀតទទួលបានមេដាយសំរឹទ្ធិ ១គ្រឿង ពីការប្រកួតកីឡាប៊ូល និងប៉េតង់ ជើងឯកអាស៊ីលើកទី៤ (the 4th Asian Boules Sport Confederation Petanque Championship Tournament) ដែលធ្វើឡើងនៅទីករាជធានីបាងកក ប្រទេសថៃ។
កូនប្រុសលោក អ៊ុត សុវណ្ណា ជាម្ចាស់មេដាយមាសនោះគឺកីឡាករ អ៊ុត ដួងខែ ដែលជាអ្នករកមេដាយមាស១ ក្នុងចំណោម៣គ្រឿងជូនជាតិកម្ពុជា លើឆាកអន្តរជាតិលើកនេះ។ ដួងខែ ទើបតែវ័យ១៧ឆ្នាំ បានឈ្នះមេដាយមាសវិញ្ញាសាយុវជនអាយុក្រោម ១៨ឆ្នាំ វាយយកពិន្ទុ។
អត្ថបទពាក់ព័ន្ធ៖អត្តពលិកប៉េតង់កម្ពុជាដណ្តើមបានមេដាយគ្រប់គ្នាពីជើងឯកអាស៊ី
មុនក្លាយជាម្ចាស់មេដាយមាសប្រចាំទ្វីប លើកដំបូងក្នុងជីវិតរបស់ខ្លួនកីឡាករ ដួងខែ ជម្រុះចូលក្នុងវគ្គ៨នាក់ចុងក្រោយ ដោយរូបគេឈរចំណាត់ថ្នាក់លេខ៥ មាន២៤ពិន្ទុ។ នៅវគ្គ៨នាក់ចុងក្រោយរូបគេបានយកឈ្នះកីឡាករ Javen Lau របស់សិង្ហបុរី ដោយលទ្ធផល ២៤-២៤ (១១-៣) ហើយនៅវគ្គពាក់កណ្តាលផ្ដាច់ព្រ័ត្រ បន្តយកឈ្នះកីឡាករ Mohamad Muiz ដោយលទ្ធផល៥០ទល់៤៥ និងនៅវគ្គផ្ដាច់ព្រ័ត្រ រូបគេបន្តយកឈ្នះកីឡាករវៀតណាម Tran Haong Phuc ដោយលទ្ធផល៣៣ទល់១៣។
ចំណែកកូនម្នាក់របស់លោក អ៊ុត សុវណ្ណា កីឡាករ អ៊ុត សុខជា ឈ្នះមេដាយសំរឹទ្ធិ លើវិញ្ញាសាយុវជន ៣នាក់ទល់៣នាក់ អាយុក្រោម ១៨ឆ្នាំ (B) ខណៈដែលដៃគូរបស់ខ្លួនផ្សេងទៀតមាន កីឡាករ ភាព ផាឃិន, កីឡាការិនី ហាក់ ស្រីនុត និងកីឡាករ នូច សុខេមរៈ។ វិញ្ញាសាមួយនេះរបស់កម្ពុជា បានចាញ់ក្រុមម៉ាឡេស៊ី ដោយលទ្ធផល១៣ទល់៩ ឈ្នះមេដាយសំរឹទ្ធស្ទួនជាមួយម្ចាស់ផ្ទះថៃក្រុម B ហើយមេដាយមាសបានទៅក្រុមថៃ A និងមេដាយប្រាក់បានទៅម៉ាឡេស៊ី។
លោក អ៊ុត សុវណ្ណា បានប្រាប់អ្នកសារព័ត៌មានក្រោយរង់ចាំទទួលកូននៅអាកាសយាន្តដ្ឋានអន្តរជាតិភ្នំពេញ នារសៀលថ្ងៃចន្ទ ទី១៤ ខែវិច្ឆិកា ឆ្នាំ២០២២ នេះថា៖«កូនខ្ញុំបានហាត់ព្រោះគាត់មានដុងកីឡាពីកំណើតផង និងពេលគេរើសថ្នាលប៊ូលនៅខេត្តកណ្តាល លោកគ្រូក៏បានជ្រើសរើសគាត់ចូលហាត់តាំងពីអាយុ១០ឆ្នាំ។ ខ្ញុំក៏ឱ្យកូនបានហាត់ប៊ូលនិងជំរុញគាត់បានហាត់ ព្រោះខ្ញុំស្រលាញ់កីឡាណាស់»។
«សម្រាប់ខ្ញុំជាអ្នករត់ម៉ូតូឌុប ភរិយាខ្ញុំជាអ្នកកាត់ដេរ។ យើងមានការលំបាក តែខ្ញុំបានតស៊ូអោយកូនហាត់អោយបានល្អ ដើម្បីយកមេដាយជូនជាតិ សហព័ន្ធ និងលោកគ្រូៗមិនអោយខកចិត្តទេ។ ខ្ញុំរំភើបណាស់»។ ពលរដ្ឋមកពីខេត្តកណ្តាល ខាងលើបន្ថែម។
លោកបន្តថា៖«ខ្ញុំក៏ជាកីឡាករប្រដាល់ពីមុនដែរ ចន្លោះឆ្នាំ១៩៩៥-៩៧ រហូតដល់ពេលខ្ញុំរៀបការទើបខ្ញុំឈប់។ កាលហ្នឹងខ្ញុំបានវ៉ៃនៅប៉ុស្តិ៍លេខ៥ តែមិនសូវជោគជ័យខ្លាំង។ ដោយសារមិនសូវមានផ្លែផ្កាខ្លួនឯង ទើបខ្ញុំជំរុញអោយបានហ្វឹកហាត់រហូតទទួលបានមេដាយ»។
អត្ថបទពាក់ព័ន្ធ៖មន្រ្តីជំនាញ និយាយពីការដណ្តើមមេដាយមាស២គ្រឿងក្នុងកីឡា World Gamesលើទឹកដីអាមេរិក
ព្រឹត្តិការណ៍ការប្រកួតកីឡាប៊ូល និងប៉េតង់ ជើងឯកអាស៊ីលើកទី៤ នេះចាប់ផ្ដើមពីថ្ងៃទី១០ ដល់ថ្ងៃទី១៤ ខែវិច្ឆិកា ឆ្នាំ២០២២។ សម្រាប់កម្ពុជាបានបញ្ជូនប្រតិភូ គ្រូបង្វឹក និងអត្តពលិកម្ពុជា ទាំងអស់ ២៧នាក់ ខណៈដណ្ដើមមេដាយមេដាយមាស ចំនួន ៣គ្រឿង, មេដាយប្រាក់ចំនួន ២គ្រឿង និងមេដាយសំរឹទ្ធិចំនួន ២គ្រឿង និងឈ្នះពាន Nation Cup ផង៕