ប្រធានក្រុមជម្រើសជាតិនារីកម្ពុជា កីឡាការនៅ បាន ជាវៃ នឹងចូលហាត់ជាមួយឈុតបុរសយុវជនអាយុក្រោមអាយុ១៨ឆ្នាំភ្នំពេញក្រោន ចាប់ពីខែធ្នូ ចុងឆ្នាំ២០២២តទៅ ដើម្បីពង្រឹងសមត្ថភាពឲ្យកាន់តែល្អប្រសើរក្នុងគោលបំណងបំពេញចន្លោះខ្វះខាតឆ្ពោះទៅស៊ីហ្គេម ឆ្នាំ២០២៣ បើទោះបីរូបគេមិនអាចទៅហ្វឹកហាត់នៅចិន ដោយសារតែរវល់ការងារនៅក្លិបភ្នំពេញក្រោន។
កីឡាការនី បាន ជាវៃ ម្ចាស់ស្បែកជើងមាសនៃពានរង្វាន់ជម្រើសជើងឯកបាល់ទាត់នារី ឆ្នាំ២០២១ ក្រោយទាត់បញ្ចូលទីច្រើនជាងគេសរុប ៣៥ គ្រាប់ឲ្យក្លិបបាល់ទាត់ភ្នំពេញក្រោន ក្រោមការដឹកនាំរបស់គ្រូបង្វឹក ម៉ៅ សាវីន។
បាន ជាវៃ គឺជាកីឡាការិនីឆ្នើមម្នាក់ក្នុងក្រុមដែលត្រូវមានឈ្មោះទៅធ្វើការហាត់នៅប្រទេសចិនដើម្បីត្រៀមស៊ីហ្គេមឆ្នាំ២០២៣ផងដែរ ប៉ុន្តែដោយសារតែរវល់ការងារនៅក្លិបភ្នំពេញក្រោន ទើបសម្រេចជ្រើសរើសយកការហ្វឹកហាត់នៅក្លិបភ្នំពេញក្រោន និងធ្វើការផង ។ ជាមួយគ្នានោះកីឡាការិនីឆ្នើមបានដាក់ចិត្តដាក់កាយប្រឹងប្រែងហ្វឹកហាត់យ៉ាងខ្លាំង ពេលខ្លះហាត់លើសម៉ោងនៃកម្មវិធីហ្វឹកហាត់ផងក៏មានដែរ។
ការហ្វឹកហាត់ជាមួយU18អាចមានការហត់នឿយខ្លាំងបើធៀបជាមួយការហ្វឹកហាត់ក្នុងក្រុមនារីដូចគ្នា ។ ទោះជាយ៉ាងណា កីឡាការិនីដដែលជឿថា ក្រោយពេលក្រុមកីឡាការិនីត្រឡប់ពីហ្វឹកហាត់នៅចិនវិញនាខែមេសា ខ្លួននឹងទទួលបានការកោះហៅឲ្យចូលក្រុមវិញទៀតផង។
ក្មេងកំព្រាទាំងម្ដាយ និងឪពុករូបនេះបានឲ្យនិយាយ «ខ្ញុំមានថ្ងៃនេះដោយសារបាល់ទាត់ ខ្ញុំតស៊ូណាស់ក្នុងនាមជីវិតរស់ក្នុងមណ្ឌលកុមារកំព្រា»។ កីឡាការិនីវ័យ២៥ឆ្នាំរូបនេះបានចូលហាត់បាល់ទាត់នៅភ្នំពេញក្រោនបានចំនួន៤ឆ្នាំហើយ អ្វីដែលពិសេសសម្រាប់កូនអ្នកបាត់ដំបងគឺទទួលបានឱកាសរៀននៅសាលាបច្ចេកទេសថែទាំវេជ្ជសាស្ត្រសុខាភិបាលផ្នែកព្យាបាលដោយចលនា ដែលទទួលបានការជួយទាំងស្រុងពីក្លឹបភ្នំពេញក្រោន។
ជាវៃ បានចាប់ផ្ដើមលេងបាល់ទាត់ជាមួយក្រុមមួយរបស់ខេត្តបាត់ដំបងគឺ Might Girl ចន្លោះឆ្នាំ២០១០ ដល់២០១៥ ដែលក្រុមនេះគឺលេងពេលខ្លួនកំពុងស្ថិតនៅក្នុងមណ្ឌលកុមារកំព្រាខេត្តបាត់ដំបង។ ក្រោយពេលរៀនចប់ថ្នាក់ទី១២ ត្រូវមករៀននៅភ្នំពេញ ជាវៃ ត្រូវរកសាលារៀនដោយខ្លួនឯង ខណៈក្រុម Might Girl គេឈប់ជួយដល់ការរៀនសូត្រទៀតហើយ ដល់ឆ្នាំ២០១៥ក្មេងស្រីកំព្រាខាងលើក៏ទទួលបានឱកាសចូលហាត់បាល់នៅភ្នំពេញក្រោន ហើយភ្នំពេញក្រោនក៏បានជួយឲ្យខ្លួនបានរៀនចប់ចុងជាប់ដើមនៅឆ្នាំ២០១៩។
ពេលនេះ បាន ជាវៃ ជាកីឡាការិនីបាល់ទាត់របស់ក្រុមភ្នំពេញក្រោនផង និងជាគ្រូពេទ្យប្រចាំក្លិបផងដែរ។ ក្មេងកំព្រារូបនេះសប្បាយចិត្ត និងអរគុណដល់បាល់ទាត់ដែលធ្វើខ្លួនមានជីវិតល្អប្រសើរបើទោះការចាប់ផ្ដើមជីវិតរបស់ខ្លួនមកមិនល្អដោយត្រូវរស់ក្នុងមណ្ឌលកុមារកំព្រាក៏ដោយ៕