ខ្សែប្រយុទ្ធ Heung Min-Son បានមកដល់ទីក្រុងដូហា ប្រទេសកាតា ដើម្បីត្រៀមសម្រាប់ព្រឹត្តិការណ៍ FIFA World Cup 2022 ឱ្យក្រុមជម្រើសជាតិកូរ៉េខាងត្បូង ជាមួយស្រោមមុខការពារភ្នែក បន្ទាប់ពីរបួសប្រេះឆ្អឹងជិតភ្នែក។
របួសប្រេះឆ្អឹងជិតភ្នែករបស់ Son កើតឡើង បន្ទាប់ពីប៉ះទង្គិចយ៉ាងខ្លាំងជាមួយស្មារបស់ខ្សែការពារ Chancel Mbemba ក្នុងការប្រកួតរវាង Tottenham Hotspur ទល់នឹង Marseille ក្នុងក្របខណ្ឌ UEFA Champions League នៅកីឡដ្ឋាន Stade Vélodrome ក្នុងទីក្រុង Marseille ប្រទេសបារាំង ដោយមានការសង្គ្រោះបឋមយ៉ាងយូរនៅលើទីលាន មុនពេលត្រូវបានប្តូរចេញ។
ព្រឹត្តិការណ៍ World Cup 2022 នៅប្រទេសកាតា នឹងចាប់ផ្តើមដំណើរការប្រកួតនៅថ្ងៃទី២០ ខែវិច្ឆិកា រហូតដល់ថ្ងៃទី១៨ ខែធ្នូ ខាងមុខនេះ។ ខណៈក្រុមជម្រើសជាតិកូរ៉េខាងត្បូងស្ថិតក្នុងពូល H រួមជាមួយព័រទុយហ្គាល់ ហ្គាណា និងអ៊ុយរូហ្គាយ។
សម្រាប់ការប្រកួតបើកឆាករបស់ក្រុមជម្រើសជាតិកូរ៉េខាងត្បូង ត្រូវជួបជាមួយ ក្រុមជម្រើសជាតិអ៊ុយរូហ្គាយ នៅថ្ងៃទី២៤ ខែវិច្ឆិកា ឆ្នាំ២០២២ វេលាម៉ោង ៨:០០នាទីយប់ នៅកីឡដ្ឋាន Education City៕
