សិល្បៈអន្តរជាតិ៖ ក្រោយមានដំណឹងថាសេដ្ឋីនី ថៃទិញបានសិទ្ធិកម្មវិធី Miss Universe របស់អាមេរិក មកក្ដោបក្ដាប់ក្នុងដៃនោះ ស្រាប់តែស្ត្រីភេទទី៣រូបនេះបានចេញមកបញ្ជាក់ច្បាស់ៗ ថា លោកស្រីមិនមែនទិញកម្មសិទ្ធិនោះទេ ប៉ុន្តែលោកស្រីទិញយកក្រុមនោះតែម្ដង បានន័យថាចាប់ពីពេលនេះតទៅក្រុមហ៊ុនបង្កើតកម្មវិធីប្រកួតសម្រស់ដ៏ចំណាស់នេះមានម្ចាស់ជាជនជាតិថៃ។ ចំពោះមូលហេតុដែលធ្វើឱ្យលោកស្រីហ៊ានចាយលុយសុទ្ធ២០លានដុល្លារទិញក្រុមហ៊ុននោះគឺគ្មានអ្វីក្រៅពីជាតិនិយមនិងឈឺចិត្តចំពោះលទ្ធផលដែលបវរកញ្ញាចក្រវាឡថៃរបូតតំណែង Top 5 នោះឡើយ។
ម្ចាស់ក្រុមហ៊ុន JKN GLOBAL GROUP Public Limited លោកស្រី Anne Jakkaphong បានឡើងថ្លែងពីចំណាប់អារម្មណ៍របស់ខ្លួនជាពិសេសមូលហេតុដែលធ្វើឱ្យលោកស្រីសម្រេចចិត្តចាយទឹកលុយមហាសាលទិញយកអង្គភាព Miss Universe មកគ្រប់គ្រងជាក្រុមហ៊ុនបុត្រសម្ព័ន្ធមួយរបស់ខ្លួន នៅក្នុងកម្មវិធី Miss Universe Extravaganza នៅក្នុងប្រទេសថៃ កាលពីថ្ងៃទី៧ ខែវិច្ឆិកា ឆ្នាំ២០២២ នៅមហោស្រពភាពយន្ត Siam Pavalai Royal Grand ថាលោកស្រីសម្រេចចិត្ត ភ្លាមៗក្រោយឃើញអតីតបវរកញ្ញាចក្រវាឡថៃ Miss Universe Thailand 2020 កញ្ញា Amanda Obdam កូនកាត់ថៃ-កាណាដា មិនទទួលបានចំណាត់ថ្នាក់ឬឡើងទៅដល់វគ្គជម្រុះ Top 5។
ការលើកឡើងរបស់លោកស្រី ធ្វើឱ្យមានសាធារណៈមតិជជែកវែកញែកលើករណីនេះថា ការដែលម្ចាស់ថ្មីក្រុមហ៊ុនបវរកញ្ញាចក្រវាឡនិយាយដូច្នេះ បានសេចក្ដីថាលោកស្រីមិនទុកចិត្តអង្គភាពមួយនេះ ឬ អាចនិយាយបានថាអង្គភាពនេះមានអំពើពុករលួយ ឬក៏ការកាត់ក្ដីដោយលម្អៀង។ល។ ខណៈដែលមតិខ្លះទៀតបានលើកឡើងបែបក្រើនរំលឹកនិងដាស់តឿនដែរថា បើទិញដោយមូលហេតុបវរកញ្ញាប្រទេសថៃធ្លាក់ Top5 នោះ ក្នុងនាមម្ចាស់ផ្ទះត្រូវតែមានយុត្តិធម៌ កុំលម្អៀង កុំកាត់ក្ដីព្រោះតែយើងមានសិទ្ធិសម្រេចធំជាដើម។ល។ មានមតិមួយចំនួនទៀតបានសម្ដែងនូវក្ដីរំភើបចំពោះសេដ្ឋីនីរូបនេះព្រោះបានបង្ហាញឱ្យខ្សែភ្នែកពិភពលោកមើលឃើញពីភាពអស្ចារ្យរបស់ជនជាតិថៃ
ដោយឡែកលោកស្រី Anne ទម្លាយពីយុទ្ធសាស្ត្រតថ្លៃ តាំងពី៤០លានដុល្លារចុះមកនូវត្រឹម២០លានដុល្លារថា ចង់ទិញរបស់ត្រូវមានចិត្តសាស្ត្រ កុំធ្វើដូចយើងចង់បាន លោកស្រីថាលោកស្រីមានលុយ ប៉ុន្តែលោកស្រី ធ្វើដូចជារវល់ណាស់ពេលគេទាក់ទងមកលោកស្រីថាកំពុងជាប់រវល់តែតាមពិតកំពុងនាំកូនៗជិះយន្តហោះដើរលេង រហូតគេទម្លាក់មកត្រឹម៣៥លាន ៣០លាន និងចុងក្រោយលោកស្រីយល់ព្រមទិញនៅតម្លៃ២០លានដុល្លារ។ សម្រាប់កម្មវិធី Miss Universe នេះបវរកញ្ញតំណាងប្រទេសថៃធ្លាប់ឈ្នះមកុដចំនួន២ដងគត់ កាលពីឆ្នាំ ១៩៦៥ និងឆ្នាំ ១៩៨៨។ បវរកញ្ញាចក្រវាឡថៃឈ្នះមកុដឆ្នាំ១៩៦៥ គឺ លោកស្រី អាផាត់សារ៉ា ហុងសាគុឡា (Apasra Hongsakula) និង បវរកញ្ញាចក្រវាឡថៃឈ្នះមកុដ ឆ្នាំ ១៩៨៨ គឺ លោកស្រី ផនធីប ណាគិរុនកាណុក (Porntip Nakhirunkanok) ៕
ប្រភព៖ Youtube, Angelopedia, wiki, google,