សិល្បៈជាតិ៖ បុរសដែលត្រូវគេផ្ដល់នាមឱ្យក្រៅមួយទៀតថាជាបណ្ឌិតច្នៃម៉ូដ លោក ឯម រៀម កំពុងតែរងព្រនង់ពីអ្នកលេងបណ្ដាញសង្គម ក្រោយមានគណនីហ្វេសប៊ុកមួយបានដកស្រង់លើកយកឈុតសិចស៊ីចំហក្រោមចំហលើ ចំនួន ៣ម៉ូដរបស់លោកបង្ហោះជាសាធារណៈ ព្រមទាំងដង្ហើយសុំឱ្យក្រសួងវប្បធម៌មានចំណាត់ការ។
គណនីមួយបានយករូបថតចំនួន៣សន្លឹក របស់លោក ឯម រៀម មកបង្ហោះព្រមទាំងភ្ជាប់ជាមួយនឹងសំណេរខ្លី មួយដែលទម្លាក់បន្ទុកទាំងស្រុងទៅឱ្យក្រសួងវប្បធម៌ ដែលជាម៉ែជាឪ ជាអាណាព្យាបាលរបស់អ្នកសិល្បៈឱ្យពិនិត្យនិងមានចំណាត់ការទៅលើលោក ឯម រៀម យ៉ាងដូច្នេះថា៖ «ក្រសួងវប្បធម៌ និងវិចិត្រសិល្បៈមើលមិនដឹង ឬមើលមិនឃើញ? ល្មមដុសក្អែលចេញម្ដង កុំឱ្យតម្លៃខ្មែរកាន់តែធ្លាក់ចុះ! រូបថតស្រង់ចេញពីហ្វេសប៊ុក»
មតិរិះគន់ត្រង់ៗមិនបញ្ឆិតបញ្ឆៀង របស់ម្ចាស់គណនីខាងលើនេះ ត្រូវបានបងប្អូនអ្នកលេងបណ្ដាញសង្គមចែករំលែកបន្តគ្នា ហើយមានអ្នកបញ្ចេញទស្សនៈមិនពេញចិត្ត និងមិនគាំទ្រចំពោះការស្លៀកពាក់របស់លោក ឯម រៀម ដែលតែងស្លៀកពាក់ និងតុបតែងខ្លួនបែ្លកៗនៅតាមកម្មវិធីនោះឡើយ។ មតិមិនពេញចិត្តចំពោះបុរសនិយមលេងម៉ូដប្លែករូបនេះមានដូចជា៖
«ប្រុសឬស្រីមិនដឹងខ្លួនផង គេហៅថាមនុស្សមិនប្រក្រតី ឬ មិនពេញលក្ខណៈ»
«មនុស្សហ្នឹងគួរតែក្រសួងវប្បធម៌ចាត់ចែងទៅ រាងអីចឹងឃើញខ្ពើមណាស់ ប្រហែលក្រសួងវប្បធម៌ងងឹតភ្នែកអស់ហើយ បានទុកបុគ្គលនេះឲ្យបំផ្លាញវប្បធម៌ខ្មែរដូច្នេះ មើលរាងដូចប្រេត»
«សង្គមខ្ញុំ ប្រពៃណីជាតិខ្ញុំ វប្បធម៌ជាតិខ្ញុំអើយ ទៅជាយ៉ាងណាខ្ញុំដឹងថាជាសិទ្ធិសេរីភាពរបស់អ្នក តែអ្នកជាអ្នកសិល្បៈ គួរតែបង្ហាញអ្វីដែលខ្មែរមាន អ្វីដែលជារបស់ខ្មែរដើម្បីជាគំរូ វប្បធម៌រលត់ជាតិរលាយ ពេលដែលគេយកបាត់តាំងយំស្រែក តែមិនចេះការពារថែរក្សា។ តើក្រសួងសាម៉ីពាក់ព័ន្ធរវល់ធ្វើអី ????»
«រឿងគាត់ច្នៃម៉ូត ខ្ញុំសូមសរសើរគាត់ តែរឿងគាត់ស្លៀកពាក់មិនសមរម្យបែបនេះ ខ្ញុំក៏សម្ដែងការរិះគន់ ឲ្យគិតឡើងវិញរាល់ទង្វើដែលធ្វើទៅលើការស្លៀកពាក់បែបនេះ។»
ថ្វីត្បិតតែមតិភាគច្រើនវាយប្រហារ និងរិះគន់ទៅលើលោក ឯម រៀម បែបមិនសំចៃមាត់ក្ដី ប៉ុន្តែក្នុងនោះក៏មានមតិខ្លះបានលើកឡើងបែបកណ្ដាល មិនវាយប្រហារជេរបញ្ចោរដល់លោក ឯម រៀម នោះទេ ថែមទាំងលើកជាទស្សនៈដើម្បីឱ្យអ្នករិះគន់ដល់លោក ឯម រៀម បានត្រិះរិះពិចារណា៖
«ចំពោះខ្ញុំវិញយើងមិនគួរវាយតម្លៃពួកគាត់ទេ ព្រោះនេះគឺជាសិទ្ធិមនុស្សរៀងៗខ្លួន ទោះបីពួកគាត់ធ្វើចំឡែកខុសពីគេមែន ប៉ុន្តែគាត់មិនបានឆក់ប្លន់លួចយកដី ឬ សម្លាប់បុគ្គលណាមួយនោះទេ បើយើងប្រកាន់ខ្លួនឬចង់បានសង្គមប្រជាធិបតេយ្យ បែរមានការរើសអើងចំពោះមនុស្ស ដែលគេចូលចិត្តខុសពីយើងនោះក៏យើងមិនខុសពីមានគំនិតផ្តាច់ការនោះដែរ»។
មែនទែនទៅ នេះមិនមែនជាលើកទីមួយនោះឡើយ ដែលបុរសមានទេពកោសល្យច្នៃម៉ូដរូបនេះរងព្យុះភ្លៀងនិងការវាយប្រហារពីអ្នកដែលមិននិយមការច្នៃម៉ូដប្លែកៗ ឬការច្នៃម៉ូដបែបសហសម័យ ដែលលោកតែងតែព្យាយាមបង្កើតឡើងថ្មីៗនោះ។
ជាក់ស្ដែង ឯម រៀម នៅតែបន្តរក្សាគោលជំហរបង្កើតស្នាដៃម៉ូដសហសម័យ ដដែលទោះជាលោកត្រូវគេរិះគន់ ជេរស្ដី និងប្រមាថយ៉ាងណាក្ដី នេះបើយោងតាមការដកស្រង់ចេញពីអ្វីដែលលោកធ្លាប់បានលើកឡើងកាលពីពេលថ្មីៗនេះនៅលើបណ្ដាញសង្គម៖
«មានអ្នក Comment សួរថា ពេលគេជេរចេះឈឺអត់? គឺឈឺ ឈឺខ្លាំងណាស់…ពេលអាន Comment ម្តងៗទឹកភ្នែកហូរដោយមិនដឹងខ្លួន តែគ្រូធំបានផ្តាំថា យើងជាសិល្បៈករ ត្រូវមានចិត្តខន្តី បើមិនមានចិត្តខន្តីទេវានិងខាតបង់ ហើយបើចង់ធ្វើអ្វីមួយគឺធ្វើអោយលើស ដើម្បីអោយទស្សនិកជនរន្ធត់។»
ជាធម្មតាមនុស្សម្នាក់ៗរមែងមានអ្នកពេញចិត្តនិង មិនពេញចិត្ត ដូច្នេះករណីលោក ឯម រៀម នេះក៏មិនខុសគ្នាដែរ លោកមានអ្នករិះគន់ច្រើន តែក៏មានអ្នកស្រលាញ់ និងគាំទ្រលោកច្រើនដូចគ្នាដែរ។
ងាកមកបញ្ហាដែលកំពុងតែក្លាយជាប្រធានបទក្ដៅនេះ អ្នកដែលមិនពេញចិត្តចំពោះលោក កំពុងរង់ចាំមើលថាតើ នឹងមានចំណាត់ការបែបណាចំពោះលោក? ខណៈដែលអ្នកគាំទ្រវិញ ក៏លើកទឹកចិត្តឱ្យលោកឆ្លងកាត់ការលំបាកផ្សេងៗដែលកំពុងជួបប្រទះផងដែរ។
