សិល្បៈជាតិ៖ មិនខុសពីបងប្អូនប្រជាពលរដ្ឋដែលមិនអាចទទួលយកបានចំពោះសំណងទឹកប្រាក់២៥០០ដុល្លារ ពីសំណាក់ជនបង្កទៅឱ្យគ្រួសារជនរងគ្រោះថ្នាក់ក្នុងហេតុការណ៍គ្រោះថ្នាក់ចរាចរណ៍ដែលបង្កឡើងដោយអ្នកបើកបរក្នុងសភាពស្រវឹង លោក ចែម ចាន់រ៉ា ហៅ ពាក់មី បានចេញមកបង្ហោះសំណេរសុំយោបល់អ្នកច្បាប់ចំពោះករណីនេះ ព្រោះលេចឮដំណឹងតៗគ្នាថា ជនបង្កបង់២៥០០$ រួចខ្លួន។ នាយពាក់មី ចង់ដឹងថាការបើកបរក្នុងស្ថានស្រវឹងបណ្ដាលឱ្យអ្នកដទៃស្លា-ប់ ទោសកម្រិតណា? ហើយអ្នកបង្កត្រូវបានច្បាប់ដោះស្រាយយ៉ាងម៉េចដែរ?
នៅក្នុងថ្ងៃទី៦ ខែធ្នូ នេះ មើលឃើញថាចលនាទាមទារឱ្យមានចំណាត់ការមួយច្បាស់លាស់ចំពោះជនបង្កកាន់តែពុះកញ្ជ្រោលខ្លាំងថែមទៀតនៅពេលដែលបានទទួលដំណឹងតៗគ្នាថាភាគីជនបង្កបង់ប្រាក់សំណងជំងឺចិត្តចំនួន២ពាន់៥រយដុល្លារ (2500$) ដើម្បីបញ្ចប់រឿង។ ខណៈដែលសំឡេងស្រែកទាមទាររកយុត្តិធម៌កំពុងតែដង្ហោយដើម្បីក្រុមគ្រួសារទារកតូចដែលកំពុងតែសង្គ្រោះបន្ទាន់នៅមន្ទីរពេទ្យ នាយពាក់មី ដែលជាតារាកំប្លែងឈានមុខនិងមានឈ្មោះបោះសំឡេងមួយរូបផងនោះ បានចេញមកបង្ហោះសំណេរដើម្បីជាសំឡេងមួយជួយអំពាវនាវរកយុត្តិធម៌ជូនគ្រួសាររងគ្រោះដោយលោកបានរៀបរាប់ថានិងចោទជាសំនួរថាដូច្នេះ៖
«
ជួយផុស កុំអោយស្ងាត់ លឺគេថា (អ្នកបង្កអោយ2500$រួចខ្លួន)ពិតអត់បងប្អូន? សុំសួរមួយបងប្អូនការបេីកឡានក្នុងស្ថានភាពស្រវឹងបណ្តាលឱ្យអ្នកដទៃស្លា-ប់ តេីមានទោសយ៉ាងម៉េចខ្លះ? តេីករណីគ្រោះថ្នាក់ចរាចរណ៍ខាងក្រោមនេះ អ្នកបង្កត្រូវបានច្បាប់ដោះស្រាយយ៉ាងម៉េចហេីយ? សូមបងប្អូនដែលដឹងព័ត៌មាននេះច្បាស់ ជួយខមមិនបញ្ចេញមតិផង។»
ការលើកឡើងនិងសំនួររបស់តារារូបនេះទទួលបានការចាប់អារម្មណ៍ច្រើនពីមហាជន និងមានអ្នកប្រើប្រាស់បណ្ដាញសង្គមចូលមកវែកញែកករណីនេះខុសៗគ្នា ក្នុងនោះមានការលើកឡើងដោយម្ចាស់គណនីមួយរូបដែលមានឈ្មោះថា គីម ពិសិដ្ឋ បានពន្យល់យ៉ាងក្បោះក្បាយតបតាមការចង់ដឹងរបស់នាយពាក់មីថា៖
«ច្បាប់ស្ដីពីចរាចរណ៍ផ្លូវគោកមាត្រា ៨៣.ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្តាលឱ្យមានរបួសដល់អ្នកដទៃ ហើយបណ្តាលឱ្យអ្នករងគ្រោះអសមត្ថភាពធ្វើការងារក្នុងរយៈពេលស្មើ ឬលើសពី ៨(ប្រាំបី)ថ្ងៃ គិតពីថ្ងៃកើតហេតុ ត្រូវផ្តន្ទាទោសដាក់ពន្ធនាគារពី ៦(ប្រាំមួយ)ខែ ទៅ ២(ពីរ)ឆ្នាំ និងពិន័យជាប្រាក់ពី ២ ០០០ ០០០(ពីរលាន)រៀល ទៅ ១០ ០០០ ០០០ (ដប់លាន) រៀល និងអាចត្រូវផ្តន្ទាទោសដោយទោសបន្ថែមមួយ ឬច្រើនដូចមានចែងក្នុងមាត្រា ៥៣ (ប្រភេទនៃទោសបន្ថែម) នៃក្រមព្រហ្មទណ្ឌ។អំពើល្មើសខាងលើនេះត្រូវផ្ដន្ទាទោសដាក់ពន្ធនាគារពី ១(មួយ)ឆ្នាំ ទៅ ៣(បី)ឆ្នាំ និងពិន័យជាប្រាក់ពី ៤ ០០០ ០០០ (បួនលាន) រៀល ទៅ ១៥ ០០០ ០០០ (ដប់ប្រាំលាន)រៀល កាលបើអំពើនេះបានប្រព្រឹត្តក្នុងករណីណាមួយ ដូចខាងក្រោម ៖
ក-បើកបរដោយគ្មានបណ្ណបើកបរ ឬមានបណ្ណបើកបរតែមិនត្រឹមត្រូវតាមប្រភេទយានយន្ត។
ខ-ស្ថិតក្នុងស្ថានភាពស្រវឹងដោយមានអត្រាជាតិអាល់កុលចាប់ពី ០,៤០ (សូន្យក្បៀសសែសិប) មីលីក្រាមក្នុងមួយលីត្រខ្យល់ ឬចាប់ពី ០,៨០ (សូន្យក្បៀសប៉ែតសិប) ក្រាមក្នុងមួយលីត្រឈាមឡើងទៅ។
គ-បណ្តាលឱ្យមានរបួសមនុស្សច្រើននាក់។ឃ-រត់គេចខ្លួនពីកន្លែងកើតហេតុក្នុងគោលបំណងគេចវេសពីការទទួលខុសត្រូវ។
មាត្រា ៨៥.ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិផ្លូវគោកតម្រូវ បណ្តាលឱ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី ១(មួយ)ឆ្នាំ ទៅ ៣(បី)ឆ្នាំ និងពិន័យជាប្រាក់ពី ៤ ០០០ ០០០ (បួនលាន) រៀលទៅ ១៥ ០០០ ០០០ (ដប់ប្រាំលាន) រៀន និងអាចត្រូវផ្ដន្ទាទោសដោយទោសបន្ថែមមួយ ឬច្រើន ដូចមានចែងក្នុងមាត្រា ៥៣ (ប្រភេទនៃទោសបន្ថែម នៃក្រមព្រហ្មទណ្ឌ)។អំពើល្មើសខាងលើនេះ ត្រូវផ្គន្ទាទោសដាក់ពន្ធនាគារពី ២(ពីរ) ឆ្នាំ ទៅ ៥(ប្រាំ) ឆ្នាំ និងពិន័យជាប្រាក់ពី ១០ ០០០ ០០០ (ដប់លាន) រៀល ទៅ ២៥ ០០០ ០០០ (ម្ភៃប្រាំលាន) រៀល កាលបើអំពើនេះ បានប្រព្រឹត្តក្នុងករណីណាមួយ ដូចខាងក្រោម ៖
ក-បើកបរដោយគ្មានបណ្ណបើកបរ ឬមានបណ្ណបើកបរ តែមិនត្រឹមត្រូវតាមប្រភេទយានយន្ត។
ខ-ស្ថិតក្នុងស្ថានភាពស្រវឹង ដោយមានអត្រាជាតិអាល់កុលចាប់ពី ០,៤០ (សូន្យក្បៀសសែសិប) មីលីក្រាមក្នុងមួយលីត្រខ្យល់ ឬចាប់ពី 0,៨០ (សូន្យក្បៀសប៉ែតសិប) ក្រាមក្នុងមួយលីត្រឈាមឡើងទៅ។
គ-បណ្តាលឱ្យមានស្លាប់មនុស្សច្រើននាក់។
ឃ-រត់គេចខ្លួនពីកន្លែងកើតហេតុក្នុងគោលបំណង់គេចវេះពីទំនួលខុសត្រូវ។
យ៉ាងណាមិញបន្ទាប់ពីមានការអំពាវនាវយ៉ាងសស្រាក់សស្រាំពីមហាជនឱ្យមានការលូកដៃចូលពីសំណាក់មេធាវីស្ម័គ្រចិត្តសម្ដេចតេជោក្នុងករណីនេះ លោក គី តិច បានឆ្លើយតបចំពោះសំណើរនេះហើយ ដូច្នេះគេមើលឃើញថារឿងនេះនឹងឆាប់រកបានយុត្តិធម៌ ជាពិសេសមហាជនចង់ឃើញជនបង្កត្រូវបានច្បាប់ដាក់ទោសឱ្យជាប់ពន្ធនាគារជាជាងប្រើលុយសងជំងឺចិត្តដើម្បីបញ្ចប់រឿង៕
