បាត់ដំបង៖ នគរបាលស្រុកសំឡូត បង្រ្កាបករណីគ្រឿងញៀនមួយករណី ឃាត់ខ្លួនមុខសញ្ញារក្សាទុកគ្រឿងញៀនចំនួន០៣នាក់ កាលពីថ្ងៃទី១៨ ខែធ្នូ ឆ្នាំ២០២២វេលាម៉ោង១៨ និង៣០នាទី។
អធិការនគរបាលស្រុកសំឡូត បានដឹកនាំកម្លាំងផ្នែកប្រឆាំងគ្រឿងញៀន រួមជាមួយកម្លាំងប៉ុស្ដិ៍នគរបាលរដ្ឋបាល សំឡូត នៃអធិការដ្ឋាននគរបាលស្រុក ចុះបង្ក្រាបករណីរក្សាទុកដោយខុសច្បាប់នូវសារធាតុញៀន០១ករណី និងឃាត់ខ្លួនបានជនសង្ស័យចំនួន០២នាក់ ។
ជនសង្ស័យទី១ មានឈ្មោះ ញឹម សេងហុង ហៅឌុល ភេទប្រុស អាយុ២០ឆ្នាំ មានទីលំនៅភូមិឆករកា ឃុំសំឡូត ស្រុកសំឡូតខេត្តបាត់ដំបង ជាអ្នករក្សាទុកគ្រឿងញៀន។ និងទី២.ឈ្មោះ សួន ធា ភេទប្រុស អាយុ២៤ឆ្នាំ មានទីលំនៅភូមិអូរច្រាប ឃុំសំឡូត ស្រុកសំឡូត ខេត្តបាត់ដំបង អ្នករក្សាទុកគ្រឿងញៀន។
ក្នុងប្រតិបត្តិការនោះដែរ សមត្ថកិច្ចដកហូតបានម្សៅក្រាមពណ៌សថ្លា ច្រកក្នុងថង់ប្លាស្ទិកពណ៌សថ្លា ចំនួន០៣ថង់ ទម្ងន់០,៦៨ក្រាមសង្ស័យជាសារធាតុញៀន ,ទូរស័ព្ទដៃ១គ្រឿង ,ម៉ូតូម៉ាកហុងដាឌ្រីមចំនួន០២គ្រឿង មួយគ្រឿង ពាក់ស្លាកលេខប៉ៃលិន 1A-2672 និងមួយគ្រឿងទៀត ស៊េរីឆ្នាំ2019 ពាក់ស្លាកលេខបាត់ដំបង 1-AG 7886 ។
តាមចម្លើយរបស់ជនសង្ស័យទាំងពីរ និងដោយបានការអនុញ្ញាតពីឯកឧត្តម កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង សមត្ថកិច្ចបានបន្តកិច្ចប្រតិបត្តិការ ដោយចាប់ឃាត់ខ្លួនជនសង្ស័យបានចំនួន០១នាក់ទៀតនៅថ្ងៃទី១៩ ខែ ធ្នូ ឆ្នាំ ២០២២វេលាម៉ោង៨និង០០នាទី នៅចំណុច ភូមិឆករកា ឃុំសំឡូត ស្រុកសំឡូត ខេត្តបាត់ដំបងជនសង្ស័យឈ្មោះ ឯក សំ ភេទស្រី អាយុ៤៨ ឆ្នាំ មានទីលំនៅចំណុច ផ្ទះលេខ១២៨ ក្រុមទី០៥ ភូមិឆករកា ឃុំសំឡូត ស្រុកសំឡូត ខេត្តបាត់ដំបង។
បច្ចុប្បន្នជនសង្ស័យ រួមទាំងវត្ថុតាង ត្រូវបានកម្លាំងសមត្ថកិច្ចរៀបចំក៏សាងសំណុំរឿង បញ្ជូនទៅការិយាល័យជំនាញ នៃស្នងការដ្ឋាននគរបាលខេត្តបាត់ដំបង ដើម្បីអនុវត្តបន្តតាមផ្លូវច្បាប់៕
អត្ថបទ៖ សង្គម
