ពីវេទិកាអធិបតីនៃពិធីបើកការដ្ឋានកែលម្អផ្លូវជាតិលេខ៤១ ភ្ជាប់ពីខេត្តកំពង់ស្ពឺ ទៅខេត្តកំពត នាព្រឹកថ្ងៃទី២៦ ខែធ្នូ ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា បានមានប្រសាសន៍ថាគណបក្សប្រជាជនកម្ពុជាបានបើកកិច្ចប្រជុំមួយដើម្បីរៀបចំយុទ្ធសាស្រ្តក្នុងដំណើរឆ្ពោះទៅកាន់ការដឹកនាំប្រទេសពីឆ្នាំ២០២៣ដល់ឆ្នាំ២០២៨ ហើយដែលក្នុងនោះក៏បានដាក់ចេញយុទ្ធសាស្រ្តបំផ្លាញមីនឱ្យអស់ពីកម្ពុជានៅឆ្នាំ២០២៥ផងដែរ។
បើតាមសម្ដេចតេជោ ហ៊ុន សែន ការប្រែក្លាយតំបន់អតីតសមរភូមិយោធាដែលមានគ្រាប់មីននិងយុទ្ធភ័ណ្ឌឱ្យទៅជាតំបន់ទេសចរណ៍ និងកសិកម្ម គឺជាគោលដៅចម្បងដែលរាជរដ្ឋាភិបាលនៃគណបក្សប្រជាជនកម្ពុជាត្រូវពន្លឿន ពិសេសការដោះមីននៅសេសល់។ សម្ដេចបន្ថែមថា«សូម្បីតែជួបជាមួយរដ្ឋមន្រ្តីការពារជាតិរបស់ចិន ក្រៅពីជំនួយរបស់រដ្ឋបាលចិនដែលបានដោះមីន ខ្ញុំក៏បានស្នើឱ្យកងទ័ពចិនជួយដល់កងទ័ពកម្ពុជាដើម្បីបំផ្លាញគ្រាប់មីន»។
មានប្រសាសន៍អំពីការប្ដេជ្ញាចិត្តធ្វើឱ្យអស់មីនត្រឹមឆ្នាំ២០២៥ សម្ដេចបានអះអាងថាផែនការនេះ គឺដើម្បីបញ្ចៀសគ្រោះថ្នាក់សម្រាប់ប្រជាជន និងដើម្បីផ្ដល់ដីដោយសុវត្ថិភាពសម្រាប់ប្រជាជនបង្កើបង្កើនផល។ សម្ដេចព្រលយថា«នៅខែមករា ឆ្នាំ២០២៣ខាងមុខ គណបក្សប្រជាជនរៀបចំមហាសន្និបាតមួយ ដើម្បីដាក់ចេញយុទ្ធសាស្រ្តដឹកនាំប្រទេសពីឆ្នាំ២០២៣ដល់ឆ្នាំ២០២៨ ក្នុងនោះក៏មានយុទ្ធសាស្រ្តបំផ្លាញ់មីនឱ្យអស់ត្រឹមឆ្នាំ២០២៥ផងដែរ»។
សូមបញ្ជាក់ថាកម្ពុជាបានកំណត់វិសាលភាព និងទំហំផលប៉ះពាល់យ៉ាងច្បាស់ដោយសារគ្រាប់មីន និងយុទ្ធភណ្ឌមិនទាន់ផ្ទុះទូទាំងប្រទេស ដោយគិតត្រឹមឆ្នាំ២០២១ប្រទេសធ្លាប់ឆ្លងកាត់សង្គ្រាមស៊ីវិលមួយនេះនៅសល់ផ្ទៃដីមានមីន និងយុទ្ធភណ្ឌមិនទាន់ផ្ទុះប្រមាណ២០១៧ គីឡូម៉ែត្រការ៉េ ក្នុងនោះផ្ទៃដីមានមីន៧៨៨ គីឡូម៉ែត្រការ៉េ ដែលត្រូវបោសសម្អាតឱ្យអស់ត្រឹមឆ្នាំ ២០២៥ កំពុងនៅសល់ក្នុងរាជធានីខេត្តចំនួន ២៣ ទៀត៕