សិល្បៈជាតិ៖ កំពូលតារាសម្ដែង Angelina Jolie បានបង្ហោះរូបភាពចាស់ៗជាច្រើនសន្លឹកដែលស្ដែងឱ្យឃើញពីសកម្មភាពរបស់អ្នកនាងបីកូនប្រុសចិញ្ចឹមជនជាតិខ្មែរ Maddox ជាប់នឹងដៃគ្រប់ពេលវេលាដែលអ្នកនាងបានបំពេញបេសកកម្មនៅក្នុងប្រទេសកម្ពុជា។ កម្រងរូបភាពចាស់ៗទាំងនេះ គេជឿថាអ្នកគាំទ្រទាំងអស់ពិតណាស់មិនដែលបានឃើញនោះទេ។
គេនៅចាំបានថា Maddox ដែលជាកុមារកំព្រាកម្ពុជាត្រូវបានកំពូលតារាហូលីវូដ Angelina Jolie សុំមជ្ឈមណ្ឌលកុមារកំព្រាមួយកន្លែងយកទៅចិញ្ចឹមកាលពីឆ្នាំ២០០២។ កាលនោះ អ្នកនាងបានប្រាប់មូលហេតុថា អ្នកនាងបានឃើញក្មេងប្រុស Maddox នៅពេលកំពុងដេកលង់លក់។ ហើយពេលដែលគេភ្ញាក់ឡើងឃើញអ្នកនាង នោះគេក៏សើចដាក់ភ្លាម។ រំពេចនោះដែរ អ្នកនាងឃើញស្នាមញញឹមក្មេងប្រុសនេះ ក៏ផ្ដើមអារម្មណ៍ថា ពេលនៅជាក្មេងនេះធ្វើឱ្យអ្នកនាងមានភាពកក់ក្ដៅ។ Maddox មិនយំទាល់តែសោះ ពេលនៅក្នុងដៃអ្នកនាង។
សូមជម្រាបថា ចាប់ផ្ដើមពីពេលនោះហើយ អ្នកនាង Angelina Jolie បានធ្វើអ្វីៗគ្រប់យ៉ាងដើម្បីកូនប្រុសច្បងមួយនេះ អាចនិយាយបានថា Maddox គឺជាកំណប់ទ្រព្យពេញបេះដូងរបស់អ្នកនាង Angelina Jolie ។ ហើយថ្ងៃនេះដែរ ត្រយងនឹងនាំប្រិយមិត្តមកទស្សនារូបភាពជាច្រើនសន្លឹករបស់ អ្នកនាង Angelina Jolie និង Maddox ដែលជារូបអនុស្សារីយ៍ចាស់ៗនៃការចងចាំ៖
