រឿងរ៉ាវរបស់ EunHyuk សមាជិកក្រុម Super Juniors ប្រាកដជាធ្វើឱ្យអ្នកគាំទ្របង្ហូរ ទឹកភ្នែក ក្រោយគេបានចេញមកបង្ហើបឱ្យដឹងពីមូលហេតុដែលគេទិញផ្ទះដ៏ធំមួយ ដើម្បីបានរស់នៅជួបជុំគ្នាពិសេសអ្នកម្ដាយនៅគ្រាចុងក្រោយ។
នៅក្នុងកម្មវិធី Mr. House Husband Season 2 ដែលបានចាក់ផ្សាយកាលពីថ្ងៃទី ១៩ មិថុនា កន្លងទៅ EunHyuk ឬឈ្មោះដើមកំណើត Lee Hyuk-jae បានបង្ហើបឱ្យដឹងពីមូលហេតុដែលខ្លួនចាំបាច់ត្រូវទិញផ្ទះធំ ហើយមិនទិញ Apartment ប្រណិតនៅក្បែរដងទន្លេហាន ដូចជាសមាជិកក្រុមផ្សេងទៀត ដោយសមីខ្លួនបានឱ្យដឹងថា
«ខ្ញុំគិតថា ខ្ញុំគួរតែនៅជាមួយគ្រួសារ ដូច្នេះហើយទើបខ្ញុំសម្រេចចិត្តប្រើលុយពីបញ្ជី ហើយប្ដូរលុយមកជាអចលនទ្រព្យ»
កម្មវិធីក៏បានបង្ហាញឱ្យដឹងពីមូលហេតុពិតប្រាកដមួយទៀតដែលធ្វើឱ្យបានដឹងហើយមានអារម្មណ៍ស្រណោះនិងសោកសៅ ការដែល EunHyuk ទិញផ្ទះនេះ ដោយសារកាលពីឆ្នាំ ២០១៧ ម្ដាយរបស់គេត្រូវបានគ្រូពេទ្យវិនិច្ឆ័យជំងឺថា ម្ដាយគេមានជំងឺរលាកួតធ្ងន់ធ្ងរ សាច់សួតរបស់គាត់នៅសល់ត្រឹម ៣៧% ប៉ុណ្ណោះ។
«ខាងមន្ទីរពេទ្យបានណែនាំឱ្យម៉ាក់បណ្ដុះសួត បើម៉ាក់ខ្ញុំបណ្ដុះសួត គាត់អាចនឹងមានជីវិតរស់បានយូររហូតដល់៧ឆ្នាំ»
EunHyuk ក៏បានប្រាប់ហេតុផលហតុផលពិតដែលគេត្រលប់មករស់នៅជុំគ្រួសារព្រោះម៉ាក់របស់គេមានបញ្ហាសុខភាព ម្យ៉ាងទៀតគ្រូពេទ្យមិនប្រាប់គ្រួសារឱ្យដឹងពេលវេលាពិតប្រាកដនោះទេថា ម្ដាយរបស់លោកសល់ពេលវេលាប៉ុន្មានទៀត គ្រាន់តែប្រាប់ឱ្យលោកនិងគ្រួសារ ត្រៀមចិត្ត។
សមាជិកក្រុម Super Juniors រូបនេះនៅប្រាប់ឱ្យដឹងទៀតថា ការដែលខ្លួនបានមកនៅផ្ទះជិតម្ដាយធ្វើឱ្យមានភាពងាយស្រួលក្នុងការជួយមើលថែម្ដាយ ពេលណាដែលគាត់ក្អកខុសប្រក្រតី នឹងបានប្រញាប់រត់ចុះមកជួយមើល នៅរហូតដល់ទុកចិត្តហើយម្ដាយរបស់លោកមិនអី ទើបលោកត្រលប់ទៅបន្ទប់វិញ។
ចំណែកម្ដាយរបស់ EunHyuk ក៏បានទម្លាយឱ្យដឹងពីកូនប្រុសរបស់ខ្លួនថាបារម្ភពីអ្នកស្រីប៉ុណ្ណា
«EunHyuk គឺជាកូនប្រុសដែលធ្វើឱ្យខ្ញុំពេញចិត្តនិងមានមោទកភាពបំផុត ខ្ញុំចង់រស់នៅក្បែរកូនប្រុសរហូតទៅ សេចក្ដីសុខរបស់ខ្ញុំគឺបានរស់នៅក្បែរកូន»
EunHyuk ក៏បានបង្ហើបឱ្យដឹងដែរថា កាលពីគេនៅជាសមាជិកក្រុមចម្រៀង Super Juniors គេត្រូវរស់នៅជាមួយសមាជិកក្រុមរាប់សិបឆ្នាំ ធ្វើឱ្យមិនបានរស់នៅជួបជុំឪពុកម្ដាយ
«ពេលខ្ញុំនៅដើរប្រូម៉ូតចម្រៀងក្នុងឋានៈជាសមាជិក Super Juniors ខ្ញុំត្រូវរស់នៅបែកពីគ្រួសារជិត២០ឆ្នាំ ខ្ញុំមិនដែលបានធ្វើអ្វីឱ្យអ្នកមានគុណខ្ញុំនោះទេ ដូច្នេះហើយគោលដៅជីវិតរបស់ខ្ញុំគឺ ខ្ញុំត្រូវតែមើលថែគ្រួសាររបស់ខ្ញុំរហូតទៅ»៕
ប្រភព៖ Allkpop
