អតីតខ្សែប្រយុទ្ធជម្រើសជាតិកាណាដា Marcus Haber និងក្លិបបាល់ទាត់វិសាខា សុទ្ធតែបានបង្កើតកំណត់ត្រាថ្មីនៅលីគកំពូលកម្ពុជា Metfone Cambodian League 2021 នេះក្នុងជំនួបជ័យជម្នះលើក្រុមម្ចាស់ផ្ទះអាស៊ីអឺរ៉ុបយូណាយធីត រសៀលថ្ងៃសៅរ៍ ទី១០ ខែកក្កដា ឆ្នាំ២០២១ នេះលើទីលានកីឡដ្ឋាន AEU Sport Park។
៩គ្រាប់ជ័យជម្នះរបស់វិសាខា រកបានដោយកីឡាករ Marcus Haber ចំនួន ៤គ្រាប់ កីឡាករនីហ្សេរីយ៉ា Ajayi Opeyemi Korede ២គ្រាប់ កីឡាករ កែវ សុខផេង ២គ្រាប់ និងកីឡាករ ទិត្យ ឌីណា ១គ្រាប់។
ដូច្នេះកំណត់ត្រាថ្មីរបស់កីឡាករ Marcus Haber ជាកីឡាករដំបូងដែលរកគ្រាប់បាល់បានច្រើនជាងគេក្នុង១ប្រកួត គឺ៤គ្រាប់ម្នាក់ឯង ច្រើនជាងកីឡាករកាមេរ៉ូន Abbee Ndjoo របស់អាស៊ីអឺរ៉ុប កីឡាករប្រេស៊ីល Marques Marcio របស់ប្រេស៊ីល និងកីឡាករ ចាន់ វឌ្ឍនាកា ធ្លាប់រកបានម្នាក់៣គ្រាប់ក្នុង១ប្រកួត។
ចំណែកកំណត់ត្រារបស់ក្រុមវិសាខា វិញបានបង្កើតកំណត់ត្រាថ្មីដែរ ដោយជាក្រុមដែលទាត់បញ្ចូលទីគូប្រកួតបានច្រើនគ្រាប់ជាងគេ គឺរហូតដល់៩គ្រាប់ ក្នុង១ប្រកួត ខណៈក្រុមដែលធ្លាប់ទាត់បញ្ចូលទីគូប្រកួតក្នុងជ័យជម្នះច្រើនគ្រាប់គឺពេលភ្នំពេញក្រោន ឈ្នះសូលទីឡូអង្គរ ៧ទល់១ និងវិសាខា យកឈ្នះអគ្គីសនីកម្ពុជា ៧ទល់០ នាពេលកន្លងមក។
អ្វីដែលគួរឱ្យកត់សម្គាល់នោះគឺប្រកួតនេះជាប្រកួតដែលបំប៉ោងសំណាញ់ទីគ្នាច្រើនគ្រាប់ជាងគេដែរ ខណៈប្រកួតដែលទាត់ចូលទីគ្នាច្រើនគ្រាប់ជាងគេកន្លងមកត្រឹម៨គ្រាប់ប៉ុណ្ណោះ គឺពេលភ្នំពេញក្រោន ឈ្នះសូលទីឡូអង្គរ ៧ទល់១ ដែលបូកទៅមាន៨គ្រាប់។
លទ្ធផលដំណាលគ្នាក្នុងសប្ដាហ៍ទី៧ នេះក្រុមម្ចាស់ផ្ទះបឹងកេត យកឈ្នះក្រុមគីរីវង់សុខសែនជ័យ ១ទល់០ លើទីលានកីឡដ្ឋាន Cambodia Airway Stadium ហើយក្រុមខេត្តព្រៃវែង បានចាញ់មជ្ឍមណ្ឌលកងយោធពលខេមរភូមិន្ទ (ទ័ព) ដោយលទ្ធផល២ទល់១ លើទីលានកីឡដ្ឋានខេត្តព្រៃវែង ខ្លួន៕
