សប្ដាហ៍ទី៧ នៃពានរង្វាន់លីគកំពូលកម្ពុជា Metfone Cambodian League 2021 បានបញ្ចប់ការប្រកួតចំនួន៤គូហើយ នៅថ្ងៃសៅរ៍ ទី១០ ខែកក្កដា ឆ្នាំ២០២១ នេះ ខណៈក្រុមវិសាខា បឹងកេត មជ្ឍមណ្ឌលកងយោធពលខេមរភូមិន្ទ (ទ័ព) និងព្រះខ័នរាជស្វាយរៀង សុទ្ធតែឈ្នះដូចគ្នា។
ក្រុមវិសាខា ឈ្នះក្រុមអាស៊ីអឺរ៉ុប ៩ទល់០ លើទីលានកីឡដ្ឋាន AEU Sport Park ខណៈកីឡាករ Marcus Haber ចំនួន ៤គ្រាប់ កីឡាករនីហ្សេរីយ៉ា Ajayi Opeyemi Korede ២គ្រាប់ កីឡាករ កែវ សុខផេង ២គ្រាប់ និងកីឡាករ ទិត្យ ឌីណា ១គ្រាប់។
អត្ថបទពាក់ព័ន្ធ៖កីឡាករ Marcus Haberនិងវិសាខា បង្កើតកំណត់ត្រាថ្មីនៅលីគកំពូលកម្ពុជារដូវកាលនេះ
ចំណែកក្រុមបឹងកេត បានឈ្នះលើក្រុមគីរីវង់សុខសែនជ័យ ១ទល់០ លើទីលានកីឡដ្ឋាន Cambodia Airway Stadium។ គ្រាប់បាល់ជ័យជម្នះរបស់បឹងកេត រកបានដោយកីឡាករ ឪ ភារុណ នៅនាទី៩០+៥។
ចំពោះក្រុមខេត្តព្រៃវែង បានចាញ់មជ្ឍមណ្ឌលកងយោធពលខេមរភូមិន្ទ ដោយលទ្ធផល២ទល់១ លើទីលានកីឡដ្ឋានខេត្តព្រៃវែង ខ្លួន។ ដំបូងឡើយកីឡាករអ៊ូបេគីស្ថាន Alisher Mirzaev នៅនាទី២០ ហើយ២គ្រាប់វាយបករបស់ទ័ព ដោយកីឡាករ គីម សុបញ្ញា (ធ្វើឱ្យបូតចូលទីខ្លួនឯងដោយអចេតនា) នៅនាទីទី២២ និងចុងក្រោយកីឡាករ ញាណ សុស៊ីដែន នៅនាទីទី៩០+១។
ដោយឡែកក្រុមព្រះខ័នរាជស្វាយរៀង បានយកឈ្នះលើក្រុមសូលទីឡូអង្គរ ដោយលទ្ធផល ២ទល់១ លើទីលានកីឡដ្ឋានខេត្តស្វាយរៀង។ កីឡាករកាមេរ៉ូន Privat និងកីឡាករជប៉ុន Kobayashi Daisuke រកបានគ្រាប់បាល់ម្នាក់១គ្រាប់ឱ្យម្ចាស់ផ្ទះ ខណៈកីឡាករជប៉ុន Kageyama Reo រកបានគ្រាប់បាល់វាយបកឱ្យសូលទីឡូអង្គរ។
សម្រាប់គូប្រកួតនៅថ្ងៃអាទិត្យ វិញមានអគ្គស្នងការដ្ឋាននគរបាលជាតិ ប៉ះភ្នំពេញក្រោន នៅវេលាម៉ោង៣:៣០នាទីរសៀលលើទីលានកីឡដ្ឋាន 7NG និងក្រុមអង្គរថាយហ្គឺរ ប៉ះក្រុមអគ្គីសនីកម្ពុជា នៅវេលាម៉ោងដំណាលគ្នា តែលើទីលានកីឡដ្ឋាន SRU Stadium ក្នុងក្រុងសៀមរាប៕
