ក្រុមបាល់ទាត់ជម្រើសជាតិកម្ពុជា បានបន្តប្រកួតចាញ់ក្រុមជម្រើសជាតិបង់ក្លាដេស ជាលើកទី៥ហើយ លើកទឹកដីខ្លួនឯង ក្នុងជំនួបរវាងក្រុមជម្រើសជាតិ នារាត្រីថ្ងៃព្រហស្បត្តិ៍ ទី១៥ ខែមិថុនា ឆ្នាំ២០២៣ លើទីលានពហុកីឡដ្ឋានជាតិ ក្នុងរាជធានីភ្នំពេញ ដោយលទ្ធផល១-០ ក្នុងថ្ងៃ FIFA Day។
តាមរយ:បញ្ជីឈ្មោះផ្លូវការនៅពេលប្រកួតមានកីឡាករចំនួន ៤រូបដែលមិនបានបង្ហាញវត្តមានក្នុងជំនួបនេះមានដូចជាង៖ អ្នកចាំទី អ៊ុ វិចិត្រ និង ទេស សម្បត្តិ កីឡាករ ស៊ិន សុវណ្ណមករា និងសៀង ចន្ធា។ បើតាមលោកគ្រូបង្វឹក Félix Dalmás គ្រូបង្វឹករបស់ក្រុមជម្រើសជាតិកម្ពុជា ប្រាប់អ្នកសារព័ត៌មានក្រោយចប់ប្រកួតថា មូលហេតុដែលធ្វើឲ្យកីឡាករទាំង ៤រូបនេះមិនមានវត្តមានក្នុងប្រកួត នារាត្រីថ្ងៃព្រហស្បតិ៍ ទី១៥ ខែមិថុនា ឆ្នាំ២០២៣ ដោយសាមូលហេតុដូចខាងក្រោម៖
- ចំពោះអ្នកចាំទី អ៊ុ វិចិត្រ មានបញ្ហារបួសនៅអំឡុងពេលហ្វឹកហាត់
- ដោយឡែកខ្សែការពារ ទេស សម្បត្តិ មានបញ្ហារបួសនៅអំឡុងពេលហ្វឹកហាត់ជាមួយក្លិបបាល់ទាត់វិសាខា មុនកោះហៅចូលក្រុមជម្រើសជាតិ
- សម្រាប់ខ្សែប្រយុទ្ធ សៀង ចន្ធា មានបញ្ហារបួសបន្តិចបន្តួចហើយណាមួយរូបគេតែងតែត្រូវកោះហៅចូលក្រុមជម្រើសជាតិគ្រប់កម្មវិធី ខណ:នៅក្លិបបឹងកេត ក៏បង្ហាញខ្លួនគ្រប់ប្រកួត ដូច្នេះលោកចង់ឲ្យកីឡាកររូបនេះបានសម្រាក
- ចំណែកកីឡាករ ស៊ិន សុវណ្ណមករា លោកថារូបគេនៅក្មេង ហើយខ្សែបម្រើក្នុងបញ្ជីក្រុមជម្រើសជាតិកម្ពុជា មានច្រើន ដូច្នេះលោកចង់ឲ្យរូបគេទទួលយកបទពិសោធន៍ឲ្យបានច្រើន ណាមួយនេះគ្រាន់តែការប្រកួតមិត្តភាពប៉ុណ្ណោះ
សហព័ន្ធកីឡាបាល់ទាត់កម្ពុជា បានចេញបញ្ជីឈ្មោះកីឡាករជម្រើសជាតិកម្ពុជា ចំនួន៣០នាក់ នៅព្រឹកថ្ងៃទី០៥ ខែមិថុនា ឆ្នាំ២០២៣ ពោលគឺមុនការប្រកួត១០ថ្ងៃ ដែលជ្រើសរើសចេញពីក្លិបចំនួន ៥មាន រួមមាន៖
- វិសាខា មាន ១១រូប៖ គឺ កីឡាករ ឆេង ម៉េង, អ៊ិន សូដាវីដ, អ៊ុក សុវណ្ណ, កែន ច័ន្ទសុភ័ក្ត្រា, ស៊ិន កក្កដា, ទេស សម្បត្តិ, សារ ទី, ស រតនា, ឡេង ណូរ៉ា, ស៊ិន សុវណ្ណមករា និងអ្នកចាំទី កែវ សុខសិលា
- ភ្នំពេញក្រោន ចំនួន ៧រូប៖ មានអ្នកចាំទី អ៊ុ វិចិត្រ កីឡាករ អ៊ន ចាន់ប៉ូលីន, យើុ ម៉ូស្លីម, ប្រាក់ ធីរ៉ា, សឿត បារាំង, ជួន ចាន់ចាវ និងលឹម ពិសុទ្ធ
- ព្រះខ័នរាជស្វាយរៀង ចំនួន ៦រូប៖ មានកីឡាករ ប៊ីន ចន្ថាធារី, សឿយ វិសាល, សារ៉េត គ្រីយ៉ា, សេត រ៉ស៊ីប, ថេឡរ នីកូឡាស់ ឌឿង និងគីម សុខយុទ្ធ
- ណាហ្គាវើលដ៍ ចំនួន ៣រូប៖ មានកីឡាករ គួច សុកុម្ភះ, សុះ សូហ៊ាណា, រ៉េត លីហេង
- បឹងកេត ចំនួន ៣រូប៖ មានកីឡាករ ចាន់ វឌ្ឍនាកា, តាំង ប៊ុនឆៃ និងសៀង ចន្ធា
បើងាកទៅមើលប្រវត្តិជួបគ្នាកន្លងមករវាងកម្ពុជា នឹងបង់ក្លាដេស សរុបទាំងប្រកួតចុងក្រោយនេះកើនចំនួន៦លើកហើយ ខណៈកម្ពុជា បរាជ័យ៥លើក និងស្មើគ្នា១លើក ដោយទាត់ចូលទីបង់ក្លាដេស បាន២គ្រាប់និងរបូតវិញចំនួន៦គ្រាប់។
សូមបញ្ជាក់ថានេះជាការប្រកួតអន្តរជាតិជាលើកទី២របស់ក្រុមជម្រើសជាតិកម្ពុជា ក្នុងឆ្នាំ២០២៣ នេះ បន្ទាប់ពីបរាជ័យក្រោមថ្វីដៃរបស់ថៃ ដោយលទ្ធផល៣-១ ក្នុងវគ្គជម្រុះតាមពូលពានរង្វាន់ AFF Mitsubishi Electric Cup ក្នុងខែមករា កន្លងទៅ៕
