សិល្បៈជាតិ៖ ថ្មីៗនេះ លោក ម៉ា ច័ន្ទបញ្ញា បានប្រកាសថា លោកមានគម្រោង និងផែនការជួយដល់ក្មួយស្រី សាពូន តារាពិមាន ដែលជាកូនស្រីរបស់អ្នកនាង សឿ សុធា និងលោក សាពូន មីដាដា ក្នុងការបង្កើតស្នាដៃថ្មីមួយ។ ហើយតារាចម្រៀងប្រុសរូបនេះក៏បានបង្ហាញរូបភាពសារឆ្លើយឆ្លងរវាងលោកជាមួយលោក សាពូន មីដាដា ដោយសួរនាំពីការផលិត ប៉ុន្តែរឿងនេះបែរជាបញ្ឆេះកំហឹងអ្នកលេងបណ្ដាញសង្គមឱ្យស្អប់លោក សាពូន មីដាដា ទៅវិញ។
ដំបូងឡើយ លោក ម៉ា ច័ន្ទបញ្ញា បានប្រកាសថា ដោយសារតែឃើញភាពកតញ្ញូរបស់ក្មួយស្រី ពិមាន ទើបលោកចង់បង្កើតស្នាដៃសិល្បៈថ្មីមួយឱ្យរូបនាង។ លោក ម៉ា ច័ន្ទបញ្ញា រៀបរាប់ដូច្នោះ៖ «សំណេរក្មួយ ពូរំភើបណាស់! ឃើញពីកតញ្ញូភាពរបស់ក្មួយ បើខ្ញុំរៀបចំផែនការនិងគ្រប់គ្រង បងប្អូនយល់យ៉ាងណាដែរទៅបងប្អូន?»។ បំណងល្អរបស់លោក គឺបានកើតឡើងបន្ទាប់ពីថ្ងៃទិវាឪពុក ១៨ មិថុនា ថ្មីៗនេះ។
បន្ទាប់មកទៀត លោក ម៉ា ច័ន្ទបញ្ញា ក៏បានឆាតសួរនាំ ឆ្លើយឆ្លងជាមួយលោក សាពូន មីដាដា តាមរយៈហ្វេសប៊ុកឆាត ដោយលោកព្យាយាមសួររកលេខទូរស័ព្ទទំនាក់ទំនងទៅក្មួយស្រី សាពូន តារាពិមាន។ ក្នុងឆាតនោះ លោក ម៉ា ច័ន្ទ និយាយថា៖ «ដោយបានឃើញពីសមត្ថភាពក្មួយស្រី ខ្ញុំមានគម្រោងតូចមួយ ធ្វើដោយខ្លួនឯងទេ ចង់សូមអនុញ្ញាតបង បង្ហាញគម្រោងនេះបង។ ខ្ញុំកំពុងតែព្យាយាមសរសេរចម្រៀងមួយបទ នឹងត្រៀមថត ដោយថវិកាផ្ទាល់ខ្លួនតិចតួចទេ និយាយអំពីម្ដាយ និងត្រៀមចេញនៅថ្ងៃ…..ខាងមុខ ហើយខ្ញុំចង់យកសាច់រឿង និងទេពកោសល្យក្មួយ យកទៅផ្សព្វផ្សាយ ចង់ឱ្យក្មួយមានកេរ្តិ៍ឈ្មោះ…»។ ប៉ុន្តែលោក សាពូន មីដាដា តបថា លោកមិនយល់ពីគម្រោងនោះទេ និងសុំឱ្យពន្យល់បន្ថែមទៀត។
លុះយល់ពីគម្រោងការណ៍ច្បាស់លាស់រៀងៗខ្លួនហើយ លោក ម៉ា ច័ន្ទបញ្ញា បានសុំលេខទំនាក់ទំនងទៅអ្នកនាង សឿ សុធារ៉ា ពីលោក សាពូន មីដាដា ហើយក៏ត្រូវបានលោក សានពូន មីដាដា បដិសេធវិញថា លោកមិនមានលេខទូរស័ព្ទទំនាក់ទំនងជាមួយអ្នកនាង សឿ សុធារ៉ា នោះទេ ដោយសារតែលោកនិងអ្នកនាងបានចែកផ្លូវគ្នាយូរមកហើយ បានន័យថា លែងទាក់ទងគ្នាតទៅទៀតហើយ។
សារឆ្លងឆ្លើយទាំងអស់នោះ ត្រូវបានលោក ម៉ា ច័ន្ទបញ្ញា បង្ហោះនៅលើបណ្ដាញសង្គមហ្វេសប៊ុកឱ្យសាធារណជនបានឃើញ ពីចេតនា និងបំណងល្អរបស់លោក ក្នុងការចង់ជួយជ្រោមជ្រែងក្មួយស្រី សាពូន តារាពិមាន ឱ្យមានស្នាដៃថ្មី។ ក៏ប៉ុន្តែបំណងល្អនេះ បែរជាបានបញ្ឆេះអ្នកលេងបណ្ដាញសង្គមឱ្យកាន់តែស្អប់ខឹងលោក សាពូន មីដាដា ជាឪពុកថែមទៀត។
ត្រយងសូមដកស្រង់មតិអ្នកលេងបណ្ដាញសង្គមហ្វេបប៊ុកមួយបាន Comment ស្ដីថាឱ្យលោក សាពូន មីដាដាចំៗថា ៖ «ចាំបាច់សួរនាំអា-ឪ-អត់កំណើតនិងធ្វើអី»។ តែលោក ម៉ា ច័ន្ទបញ្ញា តបវិញថា ៖ «សូមបងកុំប្រើពាក្យទៅកាន់គាត់បែបនេះ ប៉ះពាល់ក្មេង។ ខ្ញុំធ្វើនេះជាការគោរព ផ្ដល់គំរូដល់ក្មួយ»។ ហើយអ្នកលេងបណ្ដាញសង្គមនៅតែឆ្លើយឆ្លងវិញថា ៖ « ខ្ញុំក៏មានកូនដែរ តែខ្ញុំមិនធ្វើចរិតឆ្កែដូចគាត់ទេ»។
យ៉ាងណាមិញ ក្រៅពីមតិមិនពេញចិត្តមួយនេះហើយ គេឃើញមានមតិជាច្រើនទៀតបានគាំទ្រ និងពេញចិត្តចំពោះទង្វើរបស់លោក ម៉ា ច័ន្ទបញ្ញា ដោយពួកគេលើកឡើងស្រដៀងគ្នាថា «សូមគាំទ្រ លើការដុសខាត់ក្មេងស្រីដ៏ឆ្លាតម្នាក់នេះ» «អគុណបងប្រុសសំរាប់ទឹកចិត្ត» «សូមគាំទ្រ នឹងអរគុណដែលបានជួយជ្រោមជ្រែងក្មួយពិមាន» ជាដើម។
សូមជម្រាបថា ពេលនេះមហាជនកំពុងរង់ចាំទន្ទឹងមើលថា តើស្នាដៃបទថ្មីដែលលោក ម៉ា ច័ន្ទបញ្ញា ផលិតឡើងឱ្យក្មួយស្រី សាពូន តារាពិមាន ច្រៀងនេះ នឹងមានភាពទាក់ទាញកម្រិតណា? តាមដានបន្ត៕
