អត្រាឆ្លងជំងឺនេះក្នុងឆ្នាំ២០២២ មានអ្នកឆ្លងថ្មីរហូតដល់១៤០០នាក់ ដែលមានការ កើនឡើង ៣០០នាក់ បើធៀបនឹងឆ្នាំ២០២១ ដែលទាមទារប្រជាពលរដ្ឋទាំងអស់ មានការប្រុងប្រយ័ត្នក្នុងការការពារខ្លួនពីជំងឺអេសដ៍។
នេះជាការរំលឹករបស់សម្តេចតេជោហ៊ុន សែននាយករដ្ឋមន្ត្រីនៃកម្ពុជានៅព្រឹកថ្ងៃទី២៤ខែ មិថុនាឆ្នាំ២០២៣នៅពេលសម្តេចអញ្ជើញជួបសំណេះសំណាលជាមួយកម្មករ កម្មការិនី នៅក្នុងរាជធានីភ្នំពេញនៅពហុកីឡដ្ឋានជាតិមរតកតេជោ។
សម្តេចតេជោ ហ៊ុន សែន បានបញ្ជាក់ថា៖ អត្រាឆ្លងនេះកើតឡើងដោយសារអ្នក ស្រលាញ់ភេទដូចគ្នា ប៉ុន្តែអ្នកដែលស្រលាញ់ភេទដូចគ្នានេះ ស្រីស្រលាញ់ស្រី មិនមែន ជាបញ្ហាចោទប៉ុន្មានទេ ប៉ុន្តែអត្រាឆ្លងនេះ កើតឡើងដោយសារតែ ក្រុមស្រលាញ់ភេទ ដូចគ្នា ប្រុសនិងប្រុស។
សម្តេចប្រមុខរាជរដ្ឋាភិបាលសង្កត់ធ្ងន់ថា «កុំភ្លេចថា នៅកម្ពុជាមិនទាន់អស់ មេរោគ អេដស៍ទេ ដូច្នេះសូមអ្នកទាំងអស់គ្នា កុំភ្លេចខ្លួនឱ្យសោះ មិនថាស្ត្រី និងបុរសទេ ប្រសិន បើមិនទុកចិត្តប្រើវិធីការពារទៅ និយាយឱ្យចំទៅវិធីការពារគឺស្រោមអនាម័យ»។
ប្រភពពី អាជ្ញាធរប្រយុទ្ធនឹងជំងឺអេដស៍បានឲ្យដឹងថា តាមការប៉ាន់ប្រមាណតាមបែបវិទ្យាសាស្រ្តកាលពីឆ្នាំ២០២២ គឺក្នុងឆ្នាំ២០២៣ មានអ្នកផ្ទុកមេរោគអេដស៍សរុបនៅទូទាំងប្រទេសប្រមាណជា ៧៦,០០០នាក់ ក្នុងនោះមានអ្នកឆ្លងថ្មីប្រមាណ ១,៤០០នាក់ ។
ក្រុមដែលប្រឈមនឹងហានិភ័យនៃការឆ្លងខ្ពស់ ក្រុមបុរសរួមភេទជាមួយនឹងបុរស ក្រុមស្ត្រីបំប្លែងភេទ ក្រុមអ្នកបម្រើសេវាកម្សាន្ត អ្នកប្រើប្រាស់គ្រឿងញៀន ប៉ុន្តែក្រុមបុរសរួមភេទជាមួយនឹងបុរស មានអត្រាឆ្លងមេរោគអេដស៍មានអាយុចន្លោះពី១៥ ទៅ២៤ឆ្នាំ៕
