សិល្បៈជាតិ៖ សកម្មភាពនៃការផ្ដល់អាហារនៃក្ដីស្រលាញ់ និង ប្រគល់អំណោយសប្បុរសធម៌ ជូនដល់កុមារកំព្រា នៅមណ្ឌលស្នាមញញឹមនៃក្ដីសង្ឃឹមកុមារ ទាំង១២០នាក់ ដែលសុទ្ធសឹងតែជាជំនួយសាមគ្គីរបស់សិល្បករ និង ក្រុមសប្បុរសជន តាមរយៈលោក ផាត់ តារារដ្ឋ ស្ថាបនិកក្រុមគ្រួសារតារាកម្ពុជា។ កម្មវិធីនេះធ្វើឡើងនៅថ្ងៃ២៥ មិថុនា ២០២៣ ខណ្ឌដង្កោ រាជធានីភ្នំពេញ។
សិល្បករដែលបានចូលរួមនៅក្នុងកម្មវិធីនោះដោយផ្ទាល់រួមមាន លោក សាន ផានិត តារាចម្រៀងលោកជំទាវ ភីយ៉ា តារាសម្ដែង អ្នកនាង និន សុធារ៉ា តារាសម្ដែង លោកជំទាវ រីយ៉ា តារាសម្ដែង អ្នកស្រី រ៉េតរ៉ូស តារាសម្ដែង អ្នកនាង សាង សុរិយា តារាសម្ដែង អ្នកនាង យិន ស្រីពៅ តារាសម្ដែង កញ្ញា អ៊ុង នីនិច តារាចម្រៀងលោក ឯក រ៉ាវ័ន្ត តារាសម្ដែង អ្នកនាង ណុប លក្ខិណា តារាសម្ដែងនិង សិល្បករសិល្បការិនីជាច្រើនរូបទៀត។
នៅក្នុងការផ្ដល់ជូនមណ្ឌលកុមារកំព្រារួមមាន៖ ទឹកប្រាក់៦លានរៀល អង្ករ 27 បេ (១បេ២៥គីឡូ) សាប៊ូដុសខ្លួនដបធំ ៦០ដប សាប៊ូកក់សក់មួយចំនួន ធូបមូស ៦០ប្រអប់ មីជាង៣០កេស ថ្នាំដុសធ្មេញ ១៥០ប្រអប់ ច្រាស់ដុសធ្មេញ ១៥០ដើម សៀវភៅ ២០០ក្បាល ប៊ិច ១៥០ដើម ខ្មៅដៃ១៥០ដើម កាតាបក្មេងមួយចំនួន បាយពីភោជនីយដ្ឋានបាយ័ន ១២០ប្រអប់ ទឹកសណ្ដែក ១៥០ដប ចាហួយ ១៨០កែវ សំលៀកបំពាក់មួយចំនួន និងនំចំណីមួយចំនួន។
លោក សាន ផានិត សិល្បកររៀមច្បងក្នុងវិស័យចម្រៀង បានលើកឡើងថា លោកពិតសប្បាយចិត្តនៅពេលដែលឃើញសិល្បករ និង ក្រុមសប្បុរសជន បានរួបរួមគ្នាផ្ដល់ក្ដីស្រឡាញ់តាមរយៈអាហារសាមគ្គីជាមួយកុមារកំព្រាទាំង ១២០ នាក់ និងបានប្រគល់អំណោយសប្បុរសធម៌ជូនដោយស្នាមញញឹមផងដែរ។
លោក ផាត់ តារារដ្ឋ ស្ថាបនិកក្រុមគ្រួសារតារាកម្ពុជា លើកឡើងថា នេះមិនមែនជាលើកទីមួយទេ ដែលក្រុមគ្រួសារតារាកម្ពុជាបានគិតគូរដល់កុមារកំព្រា ព្រោះកន្លងមកគ្រួសារតារាកម្ពុជាបានធ្វើសកម្មភាពនេះតាមបណ្ដាខេត្តនានា ដូចជាមណ្ឌលកុមារកំព្រានៅកំពង់ស្ពឺជាដើម។ លោករំពឹងថា សកម្មភាពនេះនឹងបង្ហាញឱ្យមហាជនបានឃើញថា តារាសិល្បៈ គឺមិនត្រឹមតែផ្ដោតតែលើអាជីពរបស់ខ្លួនជាសំខាន់នោះទេ ប៉ុន្តែពួកគាត់ក៏បានចូលរួមយ៉ាងសកម្មក្នុងកិច្ចការងារសង្គមជាតិ និងមនុស្សធម៌ផងដែរ៕
