តើសមាសភាព គ.ជ.ប ពីឆ្នាំ១៩៩៨ ដល់ បច្ចុប្បន្នមាននរណាខ្លះ?

គិតចាប់តាំងពីឆ្នាំ១៩៩៣មក កម្ពុជាឆ្លងកាត់ការបោះឆ្នោតជ្រើសតាំងតំណាងរាស្ត្រចំនួន៦លើករួចមកហើយ ហើយកំពុងត្រៀមបោះឆ្នោតជ្រើសតាំងតំណាងរាស្ត្រនីតិកាលទី៧នៅថ្ងៃទី២៣ខែកក្កដាឆ្នាំ ២០២៣នេះ។ ការបោះឆ្នោតជ្រើសតាំងតំណាងរាស្ត្រនីតិកាលទី១ប្រព្រឹត្តទៅក្រោមការរៀបចំរបស់អង្គការសហប្រជាជាតិ។ប៉ុន្តែ ចាប់ពីឆ្នាំ១៩៩៨មក កម្ពុជាបានចាត់ចែងរៀបចំបោះឆ្នោតដោយខ្លួនតាមរយៈស្ថាប័នមួយដែលមានឈ្មោះថា គណៈកម្មាធិការជាតិរៀបចំការបោះឆ្នោត (គ.ជ.ប)។

គណៈកម្មាធិការជាតិរៀបចំការបោះឆ្នោត (គ.ជ.ប) ត្រូវបានបង្កើតឡើងដោយច្បាប់ស្ដីពីការបោះឆ្នោតជ្រើសតាំងតំណាងរាស្ត្រ (ច.ប.ត.រ) ដែលត្រូវបានប្រកាសឱ្យប្រើ ក្នុងឆ្នាំ១៩៩៧។ នៅឆ្នាំ២០១៤ គ.ជ.ប បានក្លាយទៅជាស្ថាប័ន ដែលមានចែងក្នុងជំពូកទី ១៥ ថ្មី (ពីរ) នៃរដ្ឋធម្មនុញ្ញ និងមានសមត្ថកិច្ចរៀបចំ ចាត់ចែង និងគ្រប់គ្រងការបោះឆ្នោតជ្រើសតាំងសមាជិកព្រឹទ្ធសភា ការបោះឆ្នោតជ្រើសតាំងតំណាងរាស្ត្រ ព្រមទាំងការបោះឆ្នោតផ្សេងទៀតតាមការកំណត់នៃច្បាប់ ដោយផ្អែកតាមច្បាប់ស្ដីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត ដែលបានប្រកាសឱ្យប្រើក្នុងឆ្នាំ២០១៥ ។

តើសមាសភាព គ.ជ.ប ពីឆ្នាំ១៩៩៨ ដល់ បច្ចុប្បន្នមាននរណាខ្លះ?

យោងតាមឯកសារដែលត្រូវបានផ្សព្វផ្សាយដោយគណកម្មាធិការជាតិរៀបចំការបោះឆ្នោតបង្ហាញថា សមាសភាពគជបត្រូវបានផ្លាស់ប្តូរជាបន្តបន្ទាប់ចាប់តាំងពីឆ្នាំ១៩៩៨រហូតមកដល់ពេលបច្ចុប្បន្ននេះ។

១. សមាសភាព គ.ជ.ប ឆ្នាំ១៩៩៨ – ឆ្នាំ២០០២

ពីឆ្នាំ១៩៩៨ – ២០០២ គ.ជ.ប មានសមាសភាព ១១ (ដប់មួយ) រូប ដោយមានសមាសភាពជាឥស្សរជនខ្មែរ ប្រជាពលរដ្ឋខ្មែរដែលមានសិទ្ធិបោះឆ្នោត តំណាងគណបក្សនយោបាយមានអាសនៈក្នុងរដ្ឋសភា មន្ត្រីជាន់ខ្ពស់របស់ក្រសួងមហាផ្ទៃ និងតំណាងអង្គការមិនមែនរដ្ឋាភិបាលជាតិក្នុងស្រុក។ សមាសភាព គ.ជ.ប ទាំង ១១(ដប់មួយ) រូប រួមមាន៖

១. ឯកឧត្ដម ឆេង ផុន ប្រធាន គ.ជ.ប
២. ឯកឧត្ដម នៅ កាស៊ី អនុប្រធាន គ.ជ.ប
៣. ឯកឧត្ដម ដូ កុងងួន សមាជិក គ.ជ.ប
៤. ឯកឧត្ដម យូ កន សមាជិក គ.ជ.ប
៥. ឯកឧត្ដម ទា ចំរ៉ាត់ សមាជិក គ.ជ.ប ត្រូវបានជំនួសដោយ ឯកឧត្ដម អ៊ួង ខេង នៅឆ្នាំ២០០១
៦. ឯកឧត្ដម ព្រហ្ម ញាណវិចិត្រ សមាជិក គ.ជ.ប
៧. ឯកឧត្ដម កែវ ឡងឌី សមាជិក គ.ជ.ប ត្រូវបានជំនួសដោយ ឯកឧត្ដម គួយ ប៊ុនរឿន នៅឆ្នាំ២០០១
៨. ឯកឧត្ដម ឆឹង គឹមអេង សមាជិក គ.ជ.ប
៩. ឯកឧត្ដម ឆាយ គីម សមាជិក គ.ជ.ប
១០. ឯកឧត្ដម ទិប ចន្ទវិបុល សមាជិក គ.ជ.ប
១១. ឯកឧត្ដម ជា ចំរើន សមាជិក គ.ជ.ប