សិល្បៈជាតិ៖ ថ្មីៗនេះ អ្នកនិពន្ធ យូ សុភា បានប្រកាសដំណឹងល្អសម្រាប់អ្នកដែលមានឧបនិស្ស័យស្រឡាញ់ការតាក់តែងនិពន្ធដូចជា ប្រលោមលោកវែងខ្លី និងអត្ថបទភាពយន្តវែងខ្លី លោកនឹងបង្រៀនពីសិល្ប៍វិធីនិពន្ធដោយឥតគិតថ្លៃតាមរយៈបណ្ដាញសង្គមយូធូប។
ឱកាសនេះគេមើលឃើញថា គឺជាការពង្រីកវិសាលភាព និងលើកកម្ពស់ដល់ការនិពន្ធ ការអាន អក្សរសាស្ត្រខ្មែរ ឱ្យកាន់តែមានភាពទូលំទូលាយបន្ថែមមួយកម្រិតទៀត។ យ៉ាងណាមិញ ក៏មានមតិមួយចំនួនលើកឡើងថា វិស័យតែងនិពន្ធនៅកម្ពុជាសព្វថ្ងៃនេះ គឺនៅមានកម្រិតនៅឡើយ ដែលតម្រូវឱ្យអ្នកនិពន្ធពង្រឹងគុណភាពតែងនិពន្ធបន្ថែមទៀត។ ហើយការផុសផុលក្នុងវិស័យតែងនិពន្ធ គឺបានផ្តល់ផលប្រយោជន៍ច្រើនសម្រាប់កូនខ្មែរបានរៀនសូត្របន្ថែមផងដែរ។
អ្នកនិពន្ធ យូ សុភា បានលើកឡើងថា ៖ «ខ្ញុំសូមផ្តល់ជូនជាពិសេសចំពោះសិស្ស និស្សិត និង សាធារណៈជនទាំងឡាយដែលមាននិស្ស័យខាងតែងនិពន្ធ ហើយចង់ឈ្វេងយល់ពីរបៀបនៃការសរសេរអត្ថបទប្រលោមលោកខ្នាតខ្លី ខ្នាតវែង អត្ថបទភាពយន្តខ្នាតខ្លី ខ្នាតវែង។ ខ្ញុំបាទចូលរួមចែករំលែកដោយរីករាយ និងដោយក្តីស្រលាញ់រាប់អានក្នុងនាមជាជនរួមលោកជាមួយគ្នា។ សូមអរគុណ ! សូមទស្សនាដោយរីករាយ !»៕
