សិល្បៈជាតិ៖ មហាជននិងអ្នកគាំទ្រតារាចម្រៀង យឿន សូតអនុស្សាវរីយ៍ មានការភ្ញាក់ផ្អើលបន្តិចដែរ នៅពេលទទួលបានដំណឹងថាអ្នកចម្រៀងរូបនេះប្រកាសចែកផ្លូវជាមួយនឹងផលិតកម្ម សាន់ដេ ដែលជាទ្រនំចាស់ធ្លាប់រួមរស់ជាមួយគ្នាច្រើនឆ្នាំ និងបានជួយកសាងកេរ្តិ៍ឈ្មោះឱ្យលោកល្បីល្បាញក្នុងរង្វង់សិល្បៈ។ យ៉ាងណាមិញដំណឹងចែកផ្លូវគ្នារបស់តារាចម្រៀងវ័យក្មេងរូបនេះ បានធ្វើឱ្យអ្នកគាំទ្របានព្យាករណ៍ទុកថា ផលិតកម្មយក្ស២ អាចនឹងក្លាយជាទ្រនំថ្មីរបស់លោក។
សូមអាន៖ យឿន សូតអនុស្សវរីយ៍ ប្រកាសចាកចេញពីផលិតកម្ម សាន់ដេ
យោងតាមការបញ្ជាក់ពីសាមីខ្លួន លោក អនុស្សាវរីយ៍ ការបញ្ចប់កុងត្រាជាមួយនឹងផលិតកម្មសាន់ដេ និងព្រមព្រៀងចែកផ្លូវគ្នាលើកនេះគឺធ្វើដោយពេញចិត្តរៀងខ្លួន ខណៈដែលម្ចាស់បទ «មួយកំប៉ុងពីរកំប៉ុង» អះអាងថាខ្លួនគ្មានថ្ងៃភ្លេចអរគុណអ្នកមានគុណចាស់ (ផលិតកម្មសាន់ដេ) ដែលបានជួយដុសខាត់ និងជ្រោមជ្រែងខ្លួននាពេលកន្លងមក ដោយភាពកក់ក្ដៅនោះឡើយ។
មែនទែនទៅការចាកចេញពីផលិតកម្មសាន់ដេ របស់តារាចម្រៀងរូបនេះ ធ្វើឱ្យមជ្ឈដ្ឋានសាធារណជនមានការចាប់អារម្មណ៍យ៉ាងខ្លាំង និងកំពុងតាមដានចង់ដឹងថាតើផលិតកម្មថ្មីណាមួយដែលនឹងក្លាយជាទ្រនំថ្មីរបស់តារាចម្រៀងសំនៀងធ្ងន់រូបនេះ?
ថ្វីត្បិតមិនទាន់មានការបញ្ជាក់ណាមួយចេញពីមាត់របស់តារាចម្រៀង យឿន សូតអនុស្សាវរីយ៍ ថាតើផលិតកម្មមួយណាដែលនឹងក្លាយជាផលិតកម្មថ្មីរបស់ខ្លួន ប៉ុន្តែអ្នកគាំទ្របានព្យាករណ៍ថាផលិតកម្ម២ដែលមានសិទ្ធិក្លាយជាទ្រនំថ្មីរបស់លោកអាចជាផលិតកម្ម កាឡាក់ស៊ី ដោយយោងថាលោកអាច នឹងចូលរួមក្នុងផលិតកម្មនេះតាមរៀមច្បង វង្ស ថាណាន់ ព្រោះនៅក្រោមផុសរបស់អនុស្សាវរីយ៍ ដែលលោក វង្ស ថាណាន់ ចូលទៅ Comment មានអ្នកបានលើកឡើងថា៖ « វង្ស ថាណាន់ Vong Thanan អានុស្សាវរីយ៍ បែបចង់នៅជុំបង ថាណាន់ ហើយមើលទៅ» ហើយគេឃើញថា វង្ស ថាណាន់ បានឆ្លើយតបដោយ Sticker បេះដូង ទោះម្ចាស់ខ្លួនមិនបានឆ្លើយតបឱ្យបានជាក់លាក់ក្ដី ប៉ុន្តែរូបភាពនៃការឆ្លើយតបនេះ បានធ្វើឱ្យអ្នកតាមដានមានជំនឿថា អនុស្សារវីយ៍ ប្រហែលជានឹងក្លាយជាតារាចម្រៀងថ្មី ក្នុងផលិតកម្ម Galaxy Navatraដែលប្រមូលផ្ដុំដោយ អ្នកឧកញ៉ា និង ឧកញ៉ា។ ។ ចំណែកអ្នកគាំទ្រមួយចំនួនក៏បានចូលរួមបញ្ចេញមតិដែររថា៖ «អាយដលទៅកាឡាក់ស៊ី 90%នាក់ណាគិតដូចខ្ញុំខ្លះ» «បើតាមខ្ញុំស្មានកន្លងមកនេះ idol ប្រាកដជាទៅរួមរស់ជាមួយគ្រួសារ Galaxy Navatra ហើយ» «ច្បាស់ណាស់អាដល ប្រាកដជាចូល Galaxy Navatra »។
ទោះជាមានធ្លាយតម្រុយខាងលើ ប៉ុន្តែបើងាកមកចាប់អារម្មណ៍ហ្វេនមួយក្រុមទៀត បែរជាមិនគាំទ្រឱ្យតារាចម្រៀងទើបផុតកុងត្រាពីផលិតកម្មសាន់ដេរូបនេះបោះជំហានចូលផលិតកម្មកាឡាក់ស៊ីនោះឡើយ ដោយអ្នកទាំងនោះបានបញ្ចេញមតិរៀងខ្លួនចង់ឱ្យលោកជ្រើសរើសចូលផលិតកម្ម ហង្សមាស យ៉ាងដូច្នេះ៖ «ហង្សមាស welcome កុំចូលផលិតកម្មមួយនោះ» «ចូលផលិតកម្មហង្សមាសទៅ» និង «ហង្សមាស ល្អបំផុតបន្ទាប់ពីសាន់ដេ»
បើមើលលើភាពជាក់ស្ដែង លោក យឿន សូតអនុស្សាវរីយ៍ ទើបតែទម្លាយពីការបញ្ចប់កុងត្រារបស់ខ្លួនជាមួយនឹងផលិតកម្មចាស់ប៉ុណ្ណោះ លោកមិនទាន់បានបង្ហើបឱ្យច្បាស់នោះទេថាតើលោកនឹងចូលរួមរស់ជាមួយនឹងផលិតកម្មណាមួយទៀត ប៉ុន្តែការព្យាករណ៍ខាងលើនេះ គឺហ្វេនៗដែលជាអ្នកគាំទ្រលោកបានចេញមកបង្ហាញពីមតិយោបល់និងការយល់ឃើញរបស់ពួកគាត់ប៉ុណ្ណោះ។ ដូច្នេះចម្លើយពិតបែបណាមានតែរង់ចាំមើលជាបន្តទៀតថា តើតារាចម្រៀងមកពីខេត្តកំពង់ស្ពឺ រូបនេះពិតជាចូលរួមក្នុងគ្រួសារផលិតកម្ម Galaxy Navatra ឬមួយក៏ចូលជ្រកក្រោមផលិតកម្ម ហង្សមាស និងរស្មីហង្សមាសទៅតាមការព្យាករណ៍ ឬជ្រើសរើសផលិតកម្មថ្មីណាមួយដែលអ្នកគាំទ្រនឹកស្មានមិនដល់ក៏ថាបាន ព្រោះនៅមានផលិតកម្មជាច្រើនទៀត មិនមែនតែផលិតកម្ម២ខាងលើនេះទេដែលមានសក្ដានុពលនិងកំពុងក្ដោបក្ដាប់ចំណែកទីផ្សារចម្រៀង ក្នុងស្រុក៕
សូមទស្សនាវីដេអូ៖
