សិល្បៈជាតិ៖ ថ្មីៗនេះ តារាសម្ដែងឯកប្រុស ខាត់ វៃហាំង និងតារាសម្ដែងឯកស្រី ស៊ិន យូប៊ីន បានដឹកដៃគ្នាទៅទទួលពានរង្វាន់កម្រិតអន្តរជាតិក្នុងកម្មវិធី AsiaTopAwards2023 ដែលពួកគេទទួលបានពាន Popular Actor & Actress ពីកម្មវិធី។
ដំណឹងនេះបានធ្វើឱ្យហ្វេនអ្នកគាំទ្រក៏បានបង្ហាញនូវអារម្មណ៍រំភើបជំនួស និងនាំគ្នាចូលរួមអបអរសាទរចំពោះអ្នកទាំងពីរដែលបានបង្ហាញទេពកោសល្យក្នុងវិស័យសម្ដែងរបស់ប្រទេសកម្ពុជាឱ្យបរទេសបានឃើញនិងស្ញប់ស្ញែង។
តាមការរៀបរាប់របស់កញ្ញា ទូច បុប្ផា បានរៀបរាប់នៅលើបណ្ដាញសង្គមថា ៖ «សូមចូលរួមអបអរសាទរដល់តារាសម្តែងទាំងពីរដួង លោក ខាត់ វៃហាំង និងកញ្ញា ស៊ិន យូប៊ីន ដែលទទួលបានពានរង្វាន់ Popular Actor & Actress ពីកម្មវិធី AsiaTopAwards2023 សូមបញ្ជាក់ថា ខាត់ វៃហាំង និងកញ្ញា ស៊ិន យូប៊ីន នឹងនៅបន្តចូលរួមកម្មវិធីសម្ភាសន៍ របស់បណ្តាញសារព័ត៌មានជាច្រើនកម្មវិធីទៀតនៅប្រទេសថៃ នេះជាសមិទ្ធផលរបស់តារាសម្តែងទាំងពីរបានបន្តផ្សព្វផ្សាយនូវវិស័យភាគយន្តខ្មែរទៅបណ្តាប្រទេសក្នុងតំបន់អាស៊ីបន្ថែមទៀត….»។
គួររំលឹកដែរថា តារាសម្ដែងឯកប្រុស ខាត់ វៃហាំង និងតារាសម្ដែងឯកស្រី ស៊ិន យូប៊ីន ធ្លាប់ទទួលបានពានរង្វាន់តួឯកប្រុសស្រី Thailand Digital Awards កាលពីឆ្នាំ ២០២២ ផងដែរ៕
