សិល្បៈអន្តរជាតិ៖ តារាសម្តែងស្រីល្បីឈ្មោះរបស់ប្រទេសជប៉ុនគឺនាង Tominaga Sana ត្រូវបានមិត្តប្រុសចាក់សម្លាប់នៅក្នុងកន្លែងចំណតឡាន បន្ទាប់ពីអ្នកទាំងពីរបានឈ្លោះប្រកែកគ្នាយ៉ាងខ្លាំង ដែលពេលនេះឃាតករបានសារភាពហើយ។ នេះបើតាមសារព័ត៌មាន Teenee បានចេញផ្សាយថ្ងៃនេះ។
ថ្មីៗនេះសារព័ត៌មាន NHK របស់ប្រទេសជប៉ុនបានផ្សាយមកថា តារាសម្តែងវ័យក្មេងល្បីឈ្មោះគឺនាង Tominaga Sana បានទទួលមរណភាពយ៉ាងអាណោចអាធ័មក្នុងវ័យ ១៨ ឆ្នាំ បន្ទាប់ពីនាងត្រូវមិត្តប្រុសរបស់នាងបានចាក់សម្លាប់ជាច្រើនកាំបិត។ ម្តាយរបស់តារាស្រីរូបនេះ ឃើញកូនស្រីដេកដួលក្នុងថ្លុកឈាម រួចក៏ហៅរថយន្តសង្គ្រោះមកជួយនាង ប៉ុន្តែគួរឱ្យសោកស្ដាយជីវិតរបស់នាងបានផុតដង្ហើមបាត់ទៅហើយ។
សារព័ត៌មាន NHK បានលម្អិតឱ្យដឹងទៀតថា តារាស្រីរូបនេះកំពុងបន្តសិក្សានៅទីក្រុង Yokohama ប្រទេសជប៉ុន ហើយនាងមានទំនាក់ទំនងស្នេហាជាមួយ Haruki Ito មានវ័យ ២២ ឆ្នាំដែលជាឃាតកដែលចាក់សម្លាប់នាង។
ប៉ូលីសក្នុងតំបន់បាននិយាយថា ចាប់តាំងពីឆ្នាំ២០២១មកម៉្លេះ ពួកគេទទួលបានការហៅទូរស័ព្ទចំនួន ៤ ដងពីតារាស្រី Tominaka Sana ដើម្បីសុំឱ្យជួយនាង ដោយតារាស្រីរូបនេះបាននិយាយថា នាងត្រូវបានសង្សាររបស់នាងប្រើហិង្សាលើរាងកាយ។ ចំណែកអ្នកជិតខាងរបស់បុរសជាសង្សារក៏បានបញ្ជាក់ដែរថា ពួកគេតែងតែឮអ្នកទាំងពីរឈ្លោះប្រកែកគ្នាជាញឹកញាប់ ហើយក្នុងនោះក្មេងស្រីស្រែកខ្លាំងទាំងឈឺចាប់ ហើយសុំអង្វររូបគេឱ្យលើកលែងទោស។
រហូតដល់ថ្ងៃទី ២២ ខែមិថុនា ឆ្នាំ ២០២៣នេះ តារាស្រី Tominaga Sana បានណាត់ជួបសង្សាររបស់នាងហើយនាងសុំចែកផ្លូវគ្នាឱ្យដាច់ស្រេច ប៉ុន្តែភាគីជាសង្សារមិនយល់ព្រម។ ឃាតកសារភាពថា រូបគេបានលួចកូនសោផ្ទះរបស់ Sana ហើយព្យាយាមលួចចូលទៅក្នុងផ្ទះរបស់នាងគ្រប់ពេល។ នៅពេលដែលជួបនាងកន្លែងចំណតរថយន្ត បន្ទាប់មករូបគេបានចាក់សម្លាប់នាងដោយកាំបិត។ បន្ទាប់មករូបគេបានប្រញាប់ប្រញាល់រត់ទៅប៉ុស្តិ៍ប៉ូលិសដើម្បីបង្វែរដាន ទៅពេលដឹងថា ម្តាយរបស់ Sana បានទូរស័ព្ទទៅប្ដឹងប៉ូលីស។
សូមជម្រាបថា តារាស្រី Tominaka Sana គឺជាតារាស្រីវ័យក្មេងដ៏មានប្រជាប្រិយភាពនៅប្រទេសជប៉ុន ដែលបានចុះកុងត្រាជាមួយក្រុមហ៊ុន A-Team ។ Tominaka Sana នាងមានមិត្តរួមជំនាន់ដែលជាតារាវ័យក្មេងល្បីដូចគ្នាដូចជា Yoshioka Riho និង Asaka Kodai ហើយនាងបានផ្អាកពីសិល្បៈមួយរយៈកាលពីឆ្នាំ ២០១៩ ដើម្បីបន្តការសិក្សាបន្ថែម៕
