សិល្បៈអន្តរជាតិ៖ ថ្មីៗនេះ តារាចម្រៀង Cai Xukun បានចេញមកបំភ្លឺជុំវិញព័ត៌មានរឿងអាស្រូវកាលពីសប្តាហ៍មុន និងអំពីទំនាក់ទំនងស្នេហាជាមួយនារីវ័យក្មេងម្នាក់ទៀត ហើយមុនបែកគ្នា នាងជាអនីតិជន និងបានបង្ខំឱ្យនាងរំលូតកូននោះ មិនមែនជារឿងពិត ប៉ុន្តែជា Fake News ។
យ៉ាងណាមិញ Paparazzi (អ្នកសរសេរព័ត៌មានសិល្បៈកម្សាន្ត) ក៏បានទម្លាយរឿងអាស្រូវមួយទៀតនៅលើបណ្ដាញសង្គមថា Cai Xukun កំពុងមានទំនាក់ទំនងស្នេហាជាមួយនារីម្នាក់ត្រកូល W មកពីទីក្រុង សៀងហៃ ព្រមទាំងទម្លាយរូបភាពស្និទ្ធស្នាលរបស់អ្នកទាំងពីរ និងក្រុមមនុស្សដែលមានសម្ព័ន្ធមិត្តជាមួយគ្នាថែមទៀតផង។
Paparazzi បន្តថា នារីត្រកូល W នាងគឺជាហ្វេនអ្នកគាំទ្ររបស់ Cai Xukun ជាច្រើនឆ្នាំមកហើយ រួចនាងបានជួបលោកនៅក្នុងកម្មវិធីសម្ពោធប្រេនមួយកាលពីខែ កុម្ភៈ ឆ្នាំ ២០២២ និងនៅថ្ងៃទី ១០ ខែមីនា Cai Xukun បានហៅនាងឱ្យចូលរួមក្នុងការថតឃោសនាពាណិជ្ជកម្ម បន្ទាប់មកលោកក៏ចាប់ផ្ដើមមានទំនាក់ទំនងជាមួយនាង និងបានទៅផ្ទះត្រកូល W។ ក្រៅពីនោះ ពួកគេក៏មានការណាត់ជួបគ្នានៅសណ្ឋាគារជាច្រើនដង ដោយបញ្ជាក់ថានារីនោះគឺ ត្រកូល W មានវ័យ ១៧ ឆ្នាំ។
នៅទីបំផុត Cai Xukun បានចេញមកបកស្រាយបញ្ជាក់ភាពស្អាតស្អំថា រូបភាពដែលកំពុងចែកចាយនៅលើបណ្ដាញអិនធឺណេតដែលអះអាងថាគឺជារូបលោក និងក្មេងស្រីអាយុ១៧ឆ្នាំនោះ គឺជាព័ត៌មានក្លែងក្លាយទាំងស្រុង គឺ “Fake News” ហើយបានដាក់ពាក្យបណ្ដឹងរួចរាល់ ដោយបញ្ជាក់ថា មិនមែនជារូបលោកឡើយ។
ជាមួយគ្នានោះដែរ KUN Studio ក៏បានបង្ហោះការបកស្រាយនៅលើ Weibo ដោយរៀបរាប់ថា រឿងអាស្រូវដែលលេចឡើងនោះ គឺជាការថែមល្បោយប្រឌិតរឿងឡើង ទាំងរឿងនារីជាអនីតិជន រឿងបង្ខំឱ្យនារីរំលូតកូន គ្រប់ការបង្ហោះទាំងអស់គឺបានហុចផលអាក្រក់ដែលប៉ះពាល់ដល់កិត្តិយស និងសេចក្ដីថ្លៃថ្នូររបស់សិល្បករ ដូច្នោះខាងភាគី KUN Studio បានប្រមូលភស្តុតាង និងដាក់ពាក្យបណ្ដឹងរួចរាល់ហើយ៕
ប្រភព៖ Teenee
