សិល្បៈជាតិ៖ មហាជនជាច្រើននាក់បានស្គាល់មកហើយពីឈ្មោះ «ចំប៉ីខ្មៅ» ដែលជាអ្នកលេងបណ្ដាញសង្គមផង និងជាអ្នកនិយមស្នេហាវប្បធម៌បុរាណខ្មែរផង។ តើឈ្មោះ «ចំប៉ីខ្មៅ» នេះមកពីណា អ្នកណាជាអ្នកដាក់ឱ្យ?
សព្វថ្ងៃនេះ ចំប៉ីខ្មៅ នៅតែប្រើឥទ្ធិពលរបស់ខ្លួននៅលើបណ្ដាញសង្គមទាំង TikTok និង Facebook ក្នុងការផ្សព្វផ្សាយ ក៏ដូចជាបកស្រាយពីជ្រុងនៃចំណុចខ្លះៗរបស់វប្បធម៌បុរាណខ្មែរឱ្យសាធារណជនបានជ្រាប។ ជាការពិតណាស់ ចំប៉ីខ្មៅ មានឈ្មោះពិត ហេង យិន បានបញ្ចប់ការសិក្សាលើផ្នែកនិតិសាស្ត្រ ហើយថ្មីៗនេះ ចំប៉ីខ្មៅ ក៏បានរំលឹកដល់គ្រូរបាំបុរាណម្នាក់ដែលបានដាក់ឈ្មោះឱ្យខ្លួន និងធ្វើឱ្យមានអ្នកស្គាល់ច្រើនរហូតដល់បច្ចុប្បន្ន។
ដូចពាក្យចាស់ពោលថា «គ្រូមួយថ្ងៃ គឺគ្រូមួយជីវិត » ទើប ចំប៉ីខ្មៅ ចេញមករៀបរាប់ជាសារនៅលើបណ្ដាញសង្គមយ៉ាងដូច្នោះ៖ «ហង់ ភូមិរ៉ា គាត់ជាអ្នកដាក់ឈ្មោះឱ្យខ្ញុំ ចំប៉ីខ្មៅ ដាក់ឈ្មោះក្នុងថ្ងៃអាទិត្យ ពេលាម៉ោង៩ព្រឹក ពេលហាត់ក្បាច់យក្សចប់ នៅសមាគមន៍សុវណ្ណភូមិ សិស្សមិនដែលភ្លេចគុណគ្រូម្ដងណាទេ ទោះក្នុងកាលៈទេសៈណាក៏ដោយ សិស្សជំនាន់ទី១ ពេលហាត់នៅស៊ីសុវត្ថិ»។
សូមជម្រាបថា លោក ហង់ ភូមិរ៉ា គឺជាសិល្បករ និងជាសាស្ត្រាចារ្យរបាំបុរាណម្នាក់ដែលមានច្ឆន្ទៈបណ្ដុះបណ្ដាលទំពាំងជំនាន់ក្រោយឱ្យចេះពី របាំបុរាណ របាំប្រពៃណី ល្ខោនខោល ដែលពួកគេទាំងអស់នឹងមានឱកាសក្លាយជាសិល្បករមហាជនបន្ទាប់ពីបញ្ចប់ការសិក្សាជាមួយលោក។ លោកបានបង្កើត «ក្រុមសិល្បៈយុវជនវិទ្យាល័យព្រះស៊ីសុវត្ថិ» តាំងពីជំនាន់ដំបូង ដោយបង្ហាត់សិស្សមិនគិតថ្លៃសិក្សា រហូតឈានដល់ប្ដូរឈ្មោះជាក្រុមសិល្បៈយុវជនល្ខោនខោល និងរបាំបុរាណជំនាន់ថ្មី ដែលបង្ហាត់នៅក្នុងទីតាំងសហភាពសហព័ន្ធយុវជនកម្ពុជារាជធានីភ្នំពេញ៕
