នៅក្នុងយុគសម័យមួយដែលយើងទាំងអស់គ្នា ប្រើប្រាស់ប្រព័ន្ធផ្សព្វផ្សាយសង្គមដើម្បីភ្ជាប់ទំនាក់ទំនងជាមួយក្រុមគ្រួសារ និងមិត្តភក្តិ វាអាចពិបាកភ្ជាប់ទំនាក់ទំនង ប្រសិនបើពិភពលោកគ្មាន Facebook។ ប៉ុន្តែមានប្រទេសមួយចំនួន មិនអាចចូលប្រើបណ្ដាញសង្គមនេះបានទាល់តែសោះ។ នេះបើយោងតាមការចេញផ្សាយដោយគេហទំព័រ Makeuseof ។
ប្រជាជនរស់នៅក្នុងរដ្ឋទាំងនេះមិនអាចប្រើប្រាស់ Facebook បានទេ ដោយសារតែការរឹតបន្តឹងរបស់រដ្ឋាភិបាលនៃប្រទេសរបស់ខ្លួន។
ត្រយងនឹងបង្ហាញប្រទេសចំនួនបី ដែលហាមប្រជាជនប្រើ Facebook ហើយយើងនឹងពន្យល់ពីមូលហេតុដែលនៅពីក្រោយការហាមប្រាមនោះ។
១. ប្រទេសចិន
ប្រទេសចិនមានប្រវត្តិជាយូរមកហើយនៃការចាប់ពិរុទ្ធ និងបទប្បញ្ញត្តិអ៉ីនធឺណិតដ៏តឹងរ៉ឹង។ វាមិនមែនជារឿងចម្លែកទេដែលថា ពួកគេក៏មានការដាក់កម្រិតលើ Facebook ផងដែរ។
យោងតាមរបាយការណ៍នៅលើ Web2Asia ប្រទេសចិនបានបិទ Facebook នៅទូទាំងដីគោក បន្ទាប់ពីមានកុបកម្មក្នុងឆ្នាំ២០០៩ ដែលបានកើតឡើងនៅទីក្រុង Urumqi តំបន់ស៊ីនជាំង។ ជាក់ស្តែង សកម្មជនឯករាជ្យ Xinjiang មួយចំនួនបានប្រើប្រាស់ Facebook ជាផ្នែកនៃបណ្តាញទំនាក់ទំនងរបស់ពួកគេ។ក្រុមហ៊ុនបានអះអាងថា សកម្មជនកំពុងអនុវត្តសេរីភាពនៃការបញ្ចេញមតិនៅលើវេទិកាសង្គម។
ទាក់ទិននឹងបញ្ហានេះ Facebook បានព្យាយាមត្រលប់ទៅប្រទេសចិនវិញ ប៉ុន្តែប្រទេសចិន បានបង្កើតបណ្ដាញសង្គមក្នុងស្រុកជាច្រើនជម្រើសដើម្បីជំនួសហ្វេសប៊ុក ដូចជា៖ Weibo, WeChat និង Renren ជាដើម។ បច្ចុប្បន្នទីក្រុងពាណិជ្ជកម្មសេរីរបស់ប្រទេសចិន មួយចំនួនដូចជា៖ ទីក្រុងហុងកុង និង ម៉ាកាវ អាចប្រើប្រាស់បណ្ដាញសង្គម Facebook បានដោយពួកគេប្រើប្រាស់ VPN។
២. អ៉ីរ៉ង់
ការដាក់កំហិតលើ Facebook នៅក្នុងប្រទេសអ៉ីរ៉ង់ គឺជារឿងគួរឲ្យហួសចិត្ត ដោយសារតែ មេដឹកនាំនយោបាយមួយចំនួនរបស់ខ្លួនប្រើប្រាស់បណ្ដាញសង្គមដោយមិនគិតពីភាពចលាចលផ្នែកនយោបាយទាក់ទងនឹងបញ្ហាព្រំដែន។
CNN បានរាយការណ៍ថា រដ្ឋាភិបាលអ៉ីរ៉ង់បានហាមឃាត់ការប្រើប្រាស់ Facebook នៅពេលដែលសកម្មជនប្រើប្រាស់វា ដើម្បីប្រមូលផ្តុំការគាំទ្រសម្រាប់គណបក្សប្រឆាំងក្នុងអំឡុងពេលបោះឆ្នោតប្រធានាធិបតីឆ្នាំ២០០៩។
ការដាក់កំហិតដំបូងមានរយៈពេល២-៣ម៉ោង ប៉ុន្តែអ៉ីរ៉ង់បានដាក់មិនឲ្យប្រើប្រាស់វិញបាន ដោយមិនមានការពន្យល់តាំងពីពេលនោះមក។
៣. ប្រទេសកូរ៉េខាងជើង
កូរ៉េខាងជើង ជាប្រទេសសម្ងាត់បំផុតមួយក្នុងពិភពលោក ហើយក៏ជាប្រទេសដែលបានបិទបណ្ដាញសង្គមយូរជាងគេបំផុត ដោយសារតែមានការរឹតត្បិតយ៉ាងតឹងរ៉ឹងលើសិទ្ធិសេរីភាពពេញលេញក្នុងការប្រើប្រាស់ប្រព័ន្ធអនឡាញ និងទំនាក់ទំនង។
ក្នុងឆ្នាំ២០១៦ កាសែត The Guardian បានរាយការណ៍ថា ប្រទេសកូរ៉េខាងជើង បានប្រកាសជាផ្លូវការនូវការរឹតបន្តឹងលើបណ្ដាញសង្គម Facebook ក៏ដូចជានៅលើ Twitter និង YouTube។ មិនតែប៉ុណ្ណោះកូរ៉េខាងជើង ជាប្រទេសដែលរឹតត្បិតលើចុចទស្សនាកម្មវិធីបរទេសមួយចំនួនផងដែរ។
សូមជម្រាបថា បច្ចុប្បន្នមានអ្នកប្រើប្រាស់ហ្វេសប៊ុក ប្រមាណជា ២.៩៨ពាន់លាននាក់ គិតត្រឹមត្រីមាសទី១ ឆ្នាំ២០២៣ ដែលធ្វើឲ្យវាក្លាយជាកម្មវិធីធំបំផុតនៅលើពិភពលោក។ មិនតែប៉ុណ្ណោះបណ្ដាប្រទេសមួយចំនួនផ្សេងទៀតក៏បានហាមឃាត់មិនឲ្យប្រើប្រាស់បណ្ដាញសង្គមហ្វេសប៊ុកផងដែរ៕
