គ្រួសាររបស់នារីរងគ្រោះក្នុងឧបទ្ទវហេតុ ជណ្ដើរយន្ដគៀបដាច់ជើងម្ខាង នៅអាកាសយានដ្ឋានដនមឿង កាលពីថ្ងៃព្រហស្បតិ៍សប្តាហ៍មុន នឹងឲ្យមេធាវីរបស់ពួកគេដាក់ពាក្យបណ្តឹងទៅកាន់តម្រួតប្រទេសថៃ។ នេះបើយោងតាមការចេញផ្សាយដោយសារព័ត៌មាន Bangkok Post នាថ្ងៃ ព្រហស្បតិ៍ ទី០៦ ខែកក្កដា ឆ្នាំ២០២៣។
ជនរងគ្រោះអាយុ ៥៧ឆ្នាំ ដែលជាអ្នកដំណើរឆ្លងកាត់ចូលប្រទេសថៃ ត្រូវបានផ្សព្វផ្សាយជាសាធារណៈថា បានធ្លាក់ចូលក្នុងផ្លូវដើរជណ្ដើរយន្ដ ខណៈដែលនាងឆ្ពោះទៅច្រកទ្វារ (Gate) សម្រាប់ជើងហោះហើរទៅខេត្ត Nakhon Si Thammarat ។
អាជ្ញាធរជឿថា កម្លាំងនៃការធ្លាក់នេះ បានផ្តាច់គម្របសុវត្ថិភាពសម្រាប់ផ្លូវដើរ ដែលជាលទ្ធផល ជើងរបស់ស្ត្រីរូបនោះត្រូវបានគៀបជាប់នៅក្នុងជណ្ដើរយន្តផ្នែកខាងក្នុងនៃផ្លូវដើរ។
កូនប្រុសរបស់ជនរងគ្រោះឈ្មោះ Krit Kittirattana សរសេរនៅលើបណ្ដាញសង្គមហ្វេសប៊ុកកាលពីថ្ងៃអង្គារថា ស្ថានភាពម្តាយរបស់ខ្លួនគឺមានស្ថិរភាពធម្មតា ហើយម្ដាយរបស់ខ្លួន ត្រូវបានគេព្យាបាលនៅមន្ទីរពេទ្យក្នុងបន្ទប់ ICU តាំងពីមានគ្រោះថ្នាក់មកម្ល៉េស។
លោក Krit បានឲ្យដឹងទៀតថា ម្ដាយគាត់ចាប់ផ្ដើមមានអារម្មណ៍ល្អ និងអនុញ្ញាតឲ្យគេចូលមកសួរសុខទុក្ខហើយ ប៉ុន្តែជួនកាលគាត់នៅតែងើបកណ្ដាលយប់ ដោយភាពភ័យខ្លាចដដែល។
ទាក់ទិននឹងបញ្ហានេះ ស្ត្រីរងគ្រោះកំពុងទទួលការព្យាបាលទាំងផ្លូវកាយ និងផ្លូវចិត្តក្នុងមន្ទីរពេទ្យអន្តរជាតិ Bumrungrad។ លោក Krit បន្ថែមថា គ្រួសារបានស្វែងរកយុទ្ធសាស្រ្តពីគ្រូពេទ្យចិត្តសាស្ត្ រដើម្បីព្យាបាលម្ដាយរបស់ខ្លួន។
លោក Krit បានសរសេរថា «យើងកំពុងព្យាយាមជួយឲ្យម្ដាយខ្លួន ស្រឡាញ់ខ្លួនឯងឲ្យបានច្រើនតាមដែលអាចធ្វើទៅបាន ដើម្បីកុំឲ្យគាត់មានអារម្មណ៍ថា គាត់បាត់បង់តម្លៃខ្លួនឯង ហើយពន្យលឲ្យគាត់បើកចិត្តអាចរស់ឡើងវិញបានធម្មតាដូចកាលពីមុន»។
លោកក៏បានបញ្ជាក់ថា ក្រុមគ្រួសារបានឲ្យមេធាវីរបស់ពួកគេ ដាក់ពាក្យបណ្តឹងទៅតម្រួតជុំវិញគ្រោះថ្នាក់នេះហើយ រួមទាំងទាក់ទងមន្ត្រីស៊ើបអង្កេតដើម្បីឲ្យពួកគេសាកសួរម្តាយគាត់ដោយផ្ទាល់តែម្ដង។
កាលពីថ្ងៃទី២ ខែកក្កដា លោក Krit បានសរសេរនៅលើហ្វេសប៊ុក ថា ក្រុមគ្រួសារចង់ដឹងថា តើមានសាក្សីនៅកន្លែងកើតហេតុណាម្នាក់ អាចផ្តល់ព័ត៌មានលម្អិតអំពីឧបទ្ទវហេតុនេះនៅក្នុងតុលាការដែរឬទេ។
ទាក់ទិននឹងបញ្ហានេះ ស្នងការតម្រួតនៅអាកាសយានដ្ឋាន ដនមឿន លោក Adirek Tongkeamkeaw បាននិយាយកាលពីថ្ងៃអង្គារថា ប៉ូលីសកំពុងពិនិត្យមើលវីដេអូកាមេរ៉ាសុវត្ថិភាព CCTV នៅអាកាសយានដ្ឋាន ហើយក៏កំពុងត្រួតពិនិត្យផ្លូវដើរផ្សេងៗទៀត នៅក្នុងបរិវេណនោះផងដែរ ដើម្បីធានាសុវត្ថិភាពដល់អ្នកដំណើរក្រោយៗ៕
