សិល្បៈជាតិ៖ ថ្មីៗនេះ ស៊ីណូរ៉ា រ័ត្ន ដែលជាម្ចាស់បទ «60M» ប្រាប់ទៅអ្នកគាំទ្រថា លោកទទួលស្គាល់បទនេះពិតជាបទពិបាកច្រៀង និងពិបាកយល់អត្ថន័យបំផុត ព្រោះមានបង្កប់សាច់រឿងពិតមួយចំនួនដែលអ្នកនឹកស្មានមិនដល់។
ពិតមែនហើយ បទចម្រៀង «60M» របស់លោក ស៊ីណូរ៉ា រ័ត្ន ដែលបានបង្ហោះផ្សាយនៅលើបណ្ដាញសង្គមនាពេលកន្លងមកនេះ ត្រូវបានមហាជនមួយចំនួនលាន់មាត់ថា ពិបាកយល់អត្ថន័យ និងមានកន្លែងខ្លះទៀត រកឃ្លាជួនឱ្យប្រទាក់ក្រឡាមិនត្រូវ ដោយការច្រៀងរៀបរាប់អត្ថន័យចំៗពេក ។ យ៉ាងណាមិញ បទនេះក៏មានការពេញនិយមស្ដាប់ពីមជ្ឈដ្ឋានមហាជនមួយចំនួនធំដែរ ដោយពួកគេនិយាយថា ទាំងសាច់ភ្លេង និងការច្រៀងរបស់លោកមានភាពទាក់ទាញពីរោះទាក់ចិត្ត។ ក្នុងនោះ មានយុវវ័យមានចំនួនបានលើកបទនេះមកច្រៀង Cover ល្បីពេញ TikTok តែម្ដង។
ប្រាប់អ្នកសារព័ត៌មានក្នុងស្រុក លោក ស៊ីណូរ៉ា រ័ត្ន លើកឡើងថា បទ «60M» ជាបទពិបាកច្រៀងបំផុត បើទោះបីជាអ្នកស្ដាប់លឺការច្រៀងរបស់លោកមានលក្ខណៈរលូន។ លោកថា បទនេះត្រូវប្រើតិកនិកច្រៀងឡើងចុះៗ មានភាពសាំញ៉ាំច្រើន។ លោកបន្តថា អត្ថន័យរបស់បទចម្រៀងគឺត្រូវបានសរសេរពីសាច់រឿងពិតរបស់លោក និងមានលាយការច្នៃប្រឌិតខ្លះ បើទោះបីជាពិបាកយល់អត្ថន័យបន្តិចមែន ប៉ុន្តែបើអ្នកស្ដាប់ជាមនុស្សស្ថិតក្នុងចង្កោមក្រុមមនុស្សស្រឡាញ់ភេទដូចគ្នា ប្រហែលជាយល់អត្ថន័យបទបានលឿនរហ័ស។
សូមជម្រាបដែរថា លោក ស៊ីណូរ៉ា រ័ត្ន បានព្រលយបទចម្រៀងថ្មីៗចំនួន ៤ បទក្នុងឆ្នាំ ២០២៣នេះ ដែលស្ថិតនៅក្នុងអាល់ប៊ុម BLOOM មានទាំង ៥បទទាំងបទ «My Boyfriend Is a B*tch» ចេញកាលពី ២ឆ្នាំមុន។ ដោយឡែក ស៊ីណូរ៉ា រ័ត្ន ក៏បានចេញបទចម្រៀងរួមគ្នាជាមួយដៃគូ គឺតារាចម្រៀង នីគី នីគី និងចេននី គឺបទ «One Night» ជាបទកំពុងពេញនិយមខ្លាំងនាពេលនេះ៕
