សិល្បៈជាតិ៖ ជិតដល់ថ្ងៃប្រកួតផ្ដាច់ព្រ័ត្រនៃកម្មវិធី Miss Supranational 2023 ហើយនោះ ស្រាប់តែកើតហេតុការណ៍ភ្ញាក់ផ្អើលព្រាតពេញបណ្ដាញសង្គមហ្វេសប៊ុករវាងហ្វេនអ្នកគាំទ្រកម្ពុជា ជាមួយកញ្ញា Melissa Bridgemohan ជាបវរកញ្ញា Miss Supranational Cayman Islands (កោះកៃម៉ាន)។
តាមរយៈបណ្ដាញសង្គមហ្វេសប៊ុកបានបង្ហាញឱ្យដឹងថា ហ្វេនអ្នកគាំទ្រកម្ពុជាជាច្រើននាក់ពិតជាកើតក្ដីមិនពេញចិត្តចំពោះបវរកញ្ញាកោះកៃម៉ាន ដែលបានបញ្ចេញកាយវិកា និងពាក្យសម្ដីរើសអើង ហាក់ដូចជាតម្កើងឫកខ្មឺតមកលើអ្នកគាំទ្រកម្ពុជានៅក្នុងពេល Live។ ក្រោយកើតហេតុនេះ ហ្វេនអ្នកគាំទ្រកម្ពុជាច្រើននាក់អ្នក បានធ្វើពហិការដាក់រូប Emoji ខឹងនៅលើរូបភាពរបស់ កញ្ញា Melissa Bridgemohan ដែលជា Miss Supranational Cayman Islands រហូតដល់ផ្អើលស្ថាប័ន Miss Supranational ទាំងមូលតែម្ដង។
ខាងស្ថាប័ន Miss Supranational បានចេញមកបញ្ជាក់ប្រាប់អ្នកគាំទ្រកម្ពុជាថា ខាងស្ថាប័នចង់ឱ្យហ្វេនអ្នកគាំទ្រកម្ពុជាពិចារណាឡើងវិញនូវហេតុការណ៍ដែលបានកើតឡើងនាពេល Live នេះ ព្រោះថា វីដេអូខ្លីដែលបានឃើញនោះ ក៏មិនអាចសបញ្ជាក់ពីការពិតទាំងស្រុងបានដែរ។ យ៉ាងហោចណាស់ បវរកញ្ញា និងបវរកញ្ញា គឺពួកគេស្រលាញ់គ្នាខ្លាំងណាស់ និងមានសម្ព័ន្ធភាពល្អនឹងគ្នាទៅវិញទៅមកផងដែរ។
យ៉ាងណាមិញ បើទោះមានអន្តរាគមន៍ពីខាងស្ថាប័ន Miss Supranational ក៏ដោយ ក៏ប៉ុន្តែកញ្ញា ជីលី ទេវី បានចេញវីដេអូមកបកស្រាយបញ្ចប់រឿងជាមួយអ្នកគាំទ្រកម្ពុជាថា រឿងដែលបានកើតឡើងនេះ គឺសុទ្ធតែជារឿងយល់ច្រឡំគ្នារវាងអ្នកគាំទ្រកម្ពុជា និងបវរកញ្ញា Miss Supranational Cayman Islands ដែលកញ្ញាអះអាងថា បវរកញ្ញាកោះកៃម៉ាន មិនយល់ពីអត្ថន័យរបស់ហ្វេនកម្ពុជាទេ ទើបជាហេតុធ្វើឱ្យមានការភ័ន្តច្រឡំកើតឡើង។ កញ្ញា ជីលី ទេវី បានសុំចិត្តឱ្យអ្នកគាំទ្ររំងាប់អារម្មណ៍ខឹងចំពោះបវរកញ្ញា កោះកៃម៉ាន ដោយឈប់គិតរឿងមិនល្អចោលឱ្យអស់ ហើយសូមឱ្យអ្នកគាំទ្រទទួលយករឿងអ្វីដែលល្អៗពីការប្រកួតវិញទៅបានហើយ។
សូមជម្រាបផងដែរថា ការប្រកួត Mister and Miss Supranational 2023 នឹងធ្វើការប្រកួតវគ្គផ្ដាច់ព្រ័ត្រនៅថ្ងៃទី ១៥ ខែកក្កដា ខាងមុខនេះ ដោយប្រទេសប៉ូឡូញគឺជាម្ចាស់ផ្ទះ ហើយបេក្ខភាពតំណាងឱ្យប្រទេសកម្ពុជាគឺមាន លោក វន សិលា និងកញ្ញា ជីលី ទេវី។ កុំភ្លេចរងចាំជួយគាំទ្រផ្ដល់កម្លាំងចិត្តដល់បេក្ខភាពតំណាងប្រទេសកម្ពុជាយើងទាំងអស់គ្នា៕
